„Кумот на вештачката интелигенција“ испрати порака до младите: Нема причина за оптимизам - Канал 5

Технологија

„Кумот на вештачката интелигенција“ испрати порака до младите: Нема причина за оптимизам

Џефри Хинтон, добитникот на Нобелова и Тјурингова награда за неговата работа во областа на сметачката машинерија

„Кумот на вештачката интелигенција“ испрати порака до младите: Нема причина за оптимизам

Кого често во научните и технолошките кругови го нарекуваат „кумот на вештачката интелигенција, неодамна во интервју за „Фајненшл тајмс“ им порача на младите дека не треба да бидат оптимисти во врска со развојот на вештачката интелигенција.

Денес, Хинтон ретко зборува за позитивните придонеси што може да се очекуваат од вештачката интелигенција, без истовремено да предупреди за нејзините опасности.

Неговото име влезе во историјата благодарение на откритијата од 1980-тите што овозможија развој на денешните длабоки невронски мрежи. Но, во последните две години, тој стана најпознатиот песимист кога станува збор за иднината на вештачката интелигенција.

Тој не е единствен во тоа. Многу други луѓе вклучени во развојот на вештачката интелигенција, како што се ко-основачот на Институтот за истражување на машинската интелигенција, Елиезер Јудковски, сопственикот на „Х-AI“, Илон Маск, и физичарот од МИТ, основачот на Институтот за иднината на животот (Future of Life Institute), Макс Тегмарк, размислуваат слично.

Помал број луѓе ќе се богатат, а повеќето ќе осиромашат

Во неодамнешно интервју за „Фајненшл тајмс“, Хинтон предупреди дека светот влегува во фаза во која вештачката интелигенција ќе „создаде огромен профит и огромно богатство за малкумина, додека мнозинството ќе станува сè посиромашно“.

„Она што всушност ќе се случи е дека богатите луѓе сè повеќе ќе ја користат вештачката интелигенција за да ги заменат работниците. Ова ќе создаде масовна невработеност и огромен раст на профитот. Неколкумина ќе станат многу побогати, а повеќето луѓе посиромашни. Тоа не е вина на вештачката интелигенција, туку на капиталистичкиот систем“, објаснува Хинтон.

Вештачката интелигенција како закана за работните места

Предвидувањата на Хинтон се во спротивност со идеите што сакаат да ги создаваат некои извршни директори на големи технолошки компании, како што се извршниот директор на OpenAI, Сем Алтман, коосновачот и директор на DeepMind на Google, Демис Хасабис, или извршниот директор на Alphabet на Google, Сундар Пичаи, кои истакнуваат претежно оптимистички предвидувања според кои вештачката интелигенција ќе стане алатка што ќе помогне во решавање на гладот, болестите и климатските промени.

Хинтон тврди дека првото влијание од развојот на вештачката интелигенција ќе биде драстичен удар врз пазарот на трудот. Вештачката интелигенција веќе може да автоматизира цели категории на работни места, од канцелариски до креативни, а како што моделите напредуваат во следните пет до дваесет години, овој процес ќе се забрза.

„Нема сомнение во технолошката заедница дека овие работи ќе станат попаметни“, вели Хинтон, прашувајќи што ќе се случи ако вештачката интелигенција стане многу попаметна од луѓето.

„Ако асистентот е многу попаметен од вас, како ќе ја одржувате моќта? Единствениот пример што го знаеме за помалку интелигентно суштество кое контролира поинтелигентно суштество се бебе и мајка. Кога бебињата не би можеле да ги контролираат своите мајки, тие би умреле.“

Хинтон заклучува дека единствена шанса за човештвото е да „ја дизајнира вештачката интелигенција да ни биде како мајка, бидејќи мајката се грижи за животот на детето.“

Универзалниот основен приход и човековото достоинство

На прашањето дали ова сценарио може да се ублажи со универзален основен приход, решение што го предложиле некои технолошки лидери, Хинтон вели дека тоа не е доволно.

„Универзалниот основен приход нема да го реши проблемот со човековото достоинство, бидејќи луѓето вредноста ја црпат од својата работа“, објасни тој. Со други зборови, не е доволно само со пари да се компензира губењето на работата: работата на луѓето им дава значење и општествена улога.

Порака до младите: Нема причина за оптимизам

Можеби најпесимистичкиот дел од интервјуто е оној што се однесува на помладите генерации.

Кога го прашале како младите луѓе можат да останат позитивни во свет кој се соочува со закана од вештачка интелигенција, тој решително одговара: „Во искушение сум да прашам зошто би останале позитивни? Можеби би направиле повеќе ако не би биле толку позитивни... Замислете кога преку телескоп би можеле да видите инвазија на вонземјани која би се случила за десет години - дали тогаш би се запрашале како да останете позитивни? Не, би се запрашале како да се справиме со тоа. Ако „да се остане позитивен“ значи да се преправаме дека нема да се случи, тогаш луѓето не треба да останат позитивни“, порачува тој.

Вештачката интелигенција и глобалната трка

Во интервјуто, Хинтон, меѓу другото, ја критикува американската администрација за недостатокот на волја сериозно да ја регулира вештачката интелигенција, бидејќи нејзина примарна грижа е да остане пред Кина во трката за развој на вештачката интелигенција.

Напротив, тој тврди дека откако разговарал со кинески политичари во Шангај, добил впечаток дека Кина ја сфаќа заканата сериозно.

„Многу од политичарите таму се инженери. Тие го разбираат тоа на начин на кој адвокатите и трговците не го разбираат“, додава тој.

На прашањето дали може да ѝ се верува на Кина дека ќе ги заштити интересите на човештвото, тој одговорил: „Тоа е секундарно прашање. Опстанокот на човештвото е поважен од тоа да се чувствуваме добро. Можете ли да ѝ верувате на Америка? Можете ли да му верувате на Марк Закерберг?“

Песимизам со искуство

Хинтон е свесен дека неговата возраст ги става неговите грижи во различен контекст.

„Имам 77 години и крајот наскоро доаѓа“, рекол тој.

Тој изразил загриженост за помладите генерации, истакнувајќи дека човештвото е на историски раскрсница: „Се наоѓаме во историски момент каде што се случува нешто неверојатно и тоа може да биде неверојатно добро или неверојатно лошо. Можеме да шпекулираме, но работите нема да останат онакви какви што се сега.“

Не се согласуваат сите со Хинтон

Важно е да се напомене, како што забележавме во воведот, дека многу експерти за вештачка интелигенција не го делат песимизмот на Хинтон.

На пример, неговиот долгогодишен колега и добитник на Тјуринговата награда, Јан Лекан, сега главен научник за вештачка интелигенција во Мета, верува дека големите јазични модели како ChatGPT се сè уште далеку од вистинската интелигенција и дека тврдењата на Хинтон за непосредни егзистенцијални закани се претерани.

Критичарите, исто така, истакнуваат дека неговите проценки за губењето работни места не ги земаат предвид историските обрасци во кои новите технологии прво ги истиснувале луѓето од одредени работни места, за потоа да отворат цели нови сектори на занимања.

Некои критичари го обвинуваат дека со своите изјави дава аргументи за претерана контрола, а тоа оди во прилог на големите технолошки компании кои би можеле да ги задушат помалите конкуренти преку построга регулатива.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Култура

Битолските актери премиерно ја одиграа Шекспировата „Кориолан“ на „Охридско лето“

Народниот театар – Битола вчеравечер на „Охридско лето“  премиерно  ја изведе претставата „Кориолан“ од Вилијам Шекспир во режија на американскиот режисер Џон Блондел.

Битолските актери премиерно ја одиграа Шекспировата „Кориолан“ на „Охридско лето“

Претставата се покажа дека е идеално дело за актерите од Битолскиот театар бидејќи нивната енергија и сценски израз совршено одговараат на материјалот, а визуелните и музичките автори од ансамблот ја издигнаа оваа политичка трагедија до високо ниво на театарска поезија.

Во „Кориолан“ играа Огнен Дранговски, Петар Горко, Борче Ѓаковски, Марјан Георгиевски, Сандра Грибовска, Јулијана Мирчевска и Петар Спировски. Сценографијата и костимите се на Благој Мицевски, а музиката за претставата ја напиша Александар Димовски.

Режисерот Џон Блондел посочи дека „Кориолан“, иако е напишан пред повеќе од четири века, останува актуелен поради темите за моќта, политиката и односот меѓу власта и народот.

-Видете го овој неверојатен простор во кој се наоѓаме моментално.Навистина магично место со стари корени за изведување претстава. Атмосферата е извонредна за гледање претстава како оваа вкоренета во минатото и сегашноста. Ова е перформанс полн со интимни, автентични и изненадувачки моменти. Се надевам дека гледачите понесени од приказната ќе ја вметнат во нивната имагинација за да се почувствуваат како да се на сцената, рече режисерот Блондел кому ова му е петта соработка со битолските актери.

Според директорот на Народниот театар-Битола, Васко Мавровски, се работи за многу интересна претстава со нова естетика, претстава којашто од 40-тина ликови е сведена само на седум и во неа, како што вели, е собрано само есенцијалното од текстот.

-Секогаш кога ќе се спомене Шекспир, луѓето очекуваат дека тоа ќе трае два часа и повеќе. Ние успеавме за 80-тина минути да направиме многу добра и естетски поткована претстава на еден наш препознатлив јазик, односно препознатлив јазик и за режисерот Џон Блондел којшто по стотти пат го покажува тоа на сцена, појаснува Мавровски.

Концептот на претставата е насочен кон минималистички сценски израз, со акцент на актерската игра и текстот.

-Сум играл на „Охридско лето“ многупати со Битолскиот театар и сцената ја доживувам како матична. Воодушевувачки е да се игра на толку импознатно место каде што има акустика, историја, има сè. Овде, на оваа сцена, прошетале илјадници глумци од цел свет, прошетале и наши драги колеги кои ги нема повеќе, така што возбудата доаѓа од сите страни, вели битолскиот актер Петар Горко.

И на сценографот и костимограф Благој Мицевски, оваа театарска претстава не му е прво гостување на „Охридско лето“.

-Повеќе од 30 години сме биле скоро секоја година учесници на „Охридско лето“. Да бидам искрен, сум учествувал и со неколку претстави. Сме биле на Плаошник, на Самоиловата тврдина, Канео, многупати и на Долни Сарај, кај изворите во „Свети Наум“, кај некогашниот хотел „Парк“, но „Света Софија“ си има своја енергија. Едноставно, те прима, те прифаќа и те прегрнува, вели Мицевски.

По македонската премиера на „Охридско лето“, претставата „Кориолан“ ќе ја има и својата светска фестивалска премиера на Verona Shakespeare Fringe Festival во Италија.

Тагови: Охридско лето

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Фудбал

Тухел: „Нашиот најдобар натпревар, за ништо не жалам“

Германецот Томас Тухел очекува да остане селектор на Англија и покрај болниот пораз од Аргентина во полуфиналето на Светското првенство.

Тухел: „Нашиот најдобар натпревар, за ништо не жалам“

По поразот, Тухел се соочи со лавина критики од навивачите поради крајно пасивната игра на неговиот тим откако го постигнаа голот. Податокот дека Аргентинците имале 88% посед на топката од моментот кога примиле гол па сѐ до крајот на феноменалниот натпревар, претставува уште еден – а можеби и највпечатлив – показател за срамниот дефанзивен пристап на Англичаните во поголемиот дел од второто полувреме.

Англичаните не го остварија својот долгогодишен сон: останаа без толку посакуваниот пласман во финалето, во кое последен пат игра пред цели 60 години во далечната 1966 година.

Но, Тухел не е загрижен за својата позиција – тој вели дека ја има поддршката од Федерацијата и дека ќе го испочитува договорот што истекува во 2028 година, кога Англија ќе биде еден од коорганизаторите на Европското првенство. „Продолжуваме со договорот до Европското првенство. Со нетрпение го очекувам тоа, иако во моментов е тешко да се гледа толку далеку во иднината. Многу големи фудбалски нации беа елиминирани пред полуфиналето, така што она што го постигнавме е навистина успех. Никој не сака да го слушне тоа во овој момент, па ни јас, бидејќи бараме максимум од самите себе. Тоа едноставно е природата на натпреварувачкиот дух“, изјави Тухел.

За натпреварот против Аргентинците, тој изјави дека неговиот тим одиграл можеби најдобар натпревар на турнирот и дека не жали за одлуките што ги донел.

„Не жалам за ништо. Тимот го даде својот максимум и бевме многу, многу блиску. Сметам дека го заслуживме водството од 1:0. Одигравме еден од нашите најдобри натпревари, можеби и најдобриот, со оглед на околностите. Тимот беше фантастичен. Едноставно не успеавме соодветно да го завршиме натпреварот. Разочарани сме. Бевме многу блиску, но станавме премногу пасивни откако поведовме. Му дозволивме премногу шанси на противникот и не успеавме да ја вратиме контролата врз топката. Од тој момент дозволивме многу нафрлувања, шанси и удари кон нашиот гол. Бевме блиску, но не успеавме да го задржиме тоа ниво на игра по нашиот гол“, рече Тухел, а потоа ги објасни измените што ги направил:

„Едноставно се обидувавме да им помогнеме на играчите. Примивме гол уште на самиот почеток. Одлучивме да преминеме на формација со петмина во одбраната бидејќи линиите на тимот беа премногу развлечени. Тие ги добиваа сите воздушни дуели и постојано упатуваа нафрлувања. Се разбира, одговорноста е кај тренерот. Ако работите не тргнат како што треба, лесно е да се каже дека тоа било грешка“, нагласи тој.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

На покана од Рубио, Муцунски во Вашингтон на министерска конференција „Подемот на политичкиот тероризам“

Министерот за надворешни работи и надворешна трговија Тимчо Муцунски, на покана на американскиот државен секретар Марко Рубио, денеска и утре ќе престојува во дводневна работна посета на Вашингтон.

На покана од Рубио, Муцунски во Вашингтон на министерска конференција „Подемот на политичкиот тероризам“

Министерот за надворешни работи и надворешна трговија Тимчо Муцунски, на покана на американскиот државен секретар Марко Рубио, денеска и утре ќе престојува во дводневна работна посета на Вашингтон, каде што ќе учествува на министерска конференција посветена на заканите од политичкиот тероризам.

Состанокот, како што соопшти министертвото, ќе обедини високи претставници од повеќе од шеесет држави, со цел унапредување на меѓународната соработка и зајакнување на институционалната подготвеност за справување со современите форми на политички мотивирано насилство и тероризам.

Во фокусот на разговорите ќе бидат транснационалниот карактер на политичкиот тероризам, радикализацијата во дигиталната ера, како и потребата од зајакната меѓународна координација во превенцијата и раното препознавање на заканите.

Тагови: Тимчо Муцунски

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер