Како и многу мажи од неговата генерација, 28-годишниот Рајан Кеслер се плаши да разговара со жени. Но, недостатокот на самодоверба не е она што овој самец од Менхетен го спречува да ѝ пријде јавно на девојка, туку стравот дека може да биде сфатен како наметлив чудак или, уште полошо, токсичен мачо тип.

Кеслер, аналитичар за кибернетичка безбедност, вели дека нему му е најважно другата личност да не се чувствува непријатно. „Не сакам некој да се чувствува непријатно поради мене. Сакам да бидам пристоен и да имам почитување“, вели тој. „Некои девојки воопшто не сакаат да им се пристапува. Затоа секогаш сум внимателен и на штрек.“

Како резултат на тоа, признава тој, неговите средби со жени се ретки во денешно време - иако сè уште се надева дека ќе ја запознае „вистинската“.

Полесно е со апликациите за запознавање

Кеслер вели дека му е многу полесно да го направи првиот чекор на апликациите за запознавање, каде што сите, барем во принцип, пристапиле со истата цел. „Реално, многу жени не излегуваат за некој да им пријде. Па така целата ситуација станува некако... чудна“, вели тој.

Страв од етикетата „морничав тип“

Кеслер не е изолиран случај. Речиси половина од слободните мажи во САД денес се борат со т.н. „анксиозност од пристап“, покажува извештај од 2025 година. Истражувачите откриле дека стравот од тоа да бидат етикетирани како „морничави“ сериозно влијае врз подготвеноста на мажите да им пријдат на жените.

Дури 44% од 1.000 испитаници признале дека овој страв придонесува мажите помалку да иницираат контакт. Иронично е што овој тренд се чини спротивен на она што многу жени всушност го посакуваат. Всушност, 77% од жените на возраст од 18 до 30 години и 68% од оние помеѓу 30 и 40 години велат дека би сакале мажите почесто да им приоѓаат.

Претпазливоста не е без причина

Претпазливоста не се родила од каприц. Креаторката на содржини, Вив, преку едно популарно видео објаснува дека проблемот не е само во пристапот, туку и во тоа што некои мажи не знаат како да престанат откако ќе бидат одбиени.

„Проблемот е кога мажите продолжуваат да притискаат дури и откако е јасно дека жената не е заинтересирана“, рече таа. „Не можам да ви опишам колку пати дипломатски и учтиво сум укажала дека не сум заинтересирана, а тоа завршило на раб на вознемирување... Имаше мажи кои ме следеа, а еден дури и ме зграпчи.“

Совет од стручни лица

Стручњакот за односи од Њујорк, Конел Барет, се согласува со неа, но вели дека тоа не значи оти мажите треба целосно да се повлечат.

„Почитувањето не значи да те снема“, вели тој. „Слободен, хетеросексуален маж сепак треба до одреден степен да го води танцот на додворување. Жените не велат: „Не приоѓајте“. Тие велат: „Не објективизирајте нè, не малтретирајте нè и не бидете груби“.

Барет, чии клиенти се претежно мажи под 35 години, советува да нема претерано преиспитување, туку на жените да им се пристапува лесно, а не во грч. „Променете го вашиот начин на размислување. Барањето љубов е најнормалната човечка работа“, вели тој. „Во ред е да се каже „здраво“, сè додека тоа го правите со емпатија и доза на шарм“.

Некои кренале раце: „Не вреди маката“

Но, не се сите такви оптимисти. Грант Гринли, 24-годишен актер и модел од Тексас, се откажал од приоѓањето прв во живо, а и на апликациите, после бројни одбивања. „Никогаш повеќе нема да пристапувам, и сериозен сум. Не ме интересира како тоа влијае на мојот љубовен живот“, вели тој. „Денес, да им се пријде на жените, едноставно не вреди маката“.

Последната капка што му ја прелила чашата била неодамнешен обид во еден клуб кога една од девојките го одмерила ладно, а друга го дочекала со: „Уф. Кој си ти?“

„Денес, мажите, дури и оние кои не се чудаци, завршуваат исмејувани на интернет само затоа што некого го поканиле да излезат“, вели тој. „Ако некогаш ја запознаам девојката од моите соништа, таа ќе мора да го направи првиот потег.“

„Жени, на вас е редот“

Леви Мекејчен, 37, стендап комичар дели слично мислење, тој верува дека е време жените почесто да преземаат романтична иницијатива.

„Неодамна бев излезен и една жена која не беше мој тип започна разговор со мене. Беше одлично, го добив нејзиниот број“, вели тој. „Мислев дека е одлично што ми пристапи.“ Тој верува дека повеќето мажи би го сметале овој потег за исклучително храбар и привлечен.

„Ако му пристапите на момче за кое мислите дека е симпатично, тој ќе помисли: „Ова е најхрабрата жена што некогаш сум ја запознал“, вели тој. Тој дури преку Интернет повикува на целосна промена на улогите: „Мажи, треба целосно да престанеме да им пристапуваме на жените. Жени, ваш ред е.“

„Ме советуваа дека ако влезам во соба со сто жени, 99 од нив нема да бидат заинтересирани“, вели тој. „Но, една ќе биде. И ќе ми даде до знаење. Сè што треба да направам е да не зезнам.“

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.