Македонија

Жерновски: Владата на Мицкоски ја водат лажни патриоти со бугарски пасоши

Имаме многу важна тема којашто мора да продолжиме да ја дискутираме во јавноста, затоа што ова прашање допрва се отвора и е прашање коешто го открива и го прикажува вистинскиот карактер на денешната влада.

Во оваа влада на Христијан Мицкоски има повеќе бугарски пасоши отколку што можевме да замислиме досега.

Значи, можеме веднаш на самиот почеток да заклучиме дека се работи за влада на лажни патриоти со бугарски пасоши. И тоа, пазете, тоа се претставници на Влада којашто наводно треба да го чува македонскиот национален идентитет токму од Бугарите, а имаме Влада и цела екипа којашто е преполна со бугарски државјани.

Сите тие сега без проблем би можеле да се кандидираат на наредните парламентарни избори во Бугарија. Можеа и на овие избори да се кандидираат, затоа што поседуваат бугарски државјанства.

Но, она на што мора да одговорат пред македонските граѓани е следното: чии интереси тие ги застапуваат? Македонски интереси или бугарски интереси?

И така, една по една, сите предизборни лаги на Мицкоски и на ВМРО-ДПМНЕ излегуваат на површина.

Прво, ако се сеќавате, да потсетиме, Мицкоски молеше, коленичеше да дојде на власт. Кажа дека ќе го поништи Преспанскиот договор, излажа за името дека ќе го врати. Потоа, се сеќавате, ќе организира измени за договорот со Бугарија, па ќе има нова преговарачка рамка и така натаму, лага до лага.

Меѓутоа, сега дознавме дека заборавил на тие избори кога ја доби довербата да им каже на граѓаните дека кога гласаат за него и кога гласаат за ВМРО-ДПМНЕ, всушност гласаат за бугарски државјани.

Имаме чувство дека сите тие граѓани коишто се излажани сега имаат непријатно чувство и дека не би ја добил истата доверба кога повторно би одел на избори, а да знаат за што гласаат.

Што всушност се случи?

Тргна Мицкоски со еден „црвен детектор“ на којшто пишува „патриотска Македонија“ во парламентот да лови двојни државјанства, за да ни покаже колкав патриот е.

Почна да потсвирнува детекторот во неговата пратеничка група, па одлучи да не важи законот за двојно државјанство за овој состав, туку за наредниот парламентарен состав.

Но, не беше тоа најголемата белја. Најголемата белја беше кога со детекторот отиде во Владата. Е таму, што би рекол Миле Јанакиевски, почна детекторот да вришти и да пишти, затоа што беше преполно со бугарски државјани.

Сега, кога вистината излезе на виделина и кога како СДСМ побаравме законот за двојно државјанство да важи, се разбира, за сите избрани и именувани функционери, односно за целата влада, сега имаме ретерирање.

Значи, што се случи? Премиерот ретерира поради следново. Во среда премиерот беше лажен комита Христијан којшто ќе се бори за македонските интереси. Во четвртокот стана Мицкоски – уставобранителот лажен.

Меѓутоа, се поставува прашањето – не можеа ли да ги консултираат своите уставни експерти за законот пред да биде поднесен? Тогаш не важеше? Јасно е дека ќе излезе на површина целата вистина.

Да не нè чуди да се повлече целиот закон, затоа што не може Мицкоски и целата партија да објаснат како тоа законот да важи за оние коишто се во Собранието, за пратениците, а да не важи за неговите министри.

Проблемот е што веќе е евидентно дека во ВМРО-ДПМНЕ има голем број функционери со бугарски пасоши, министри, пратеници, градоначалници, директори на јавни претпријатија и така натаму.

Или можеби една од причините зошто ќе се повлече ова законско решение е и поради Груевски – колку што слушнавме, освен унгарски пасош добиен од Орбан, поседува и српски пасош добиен од Вучиќ.

Сите овие лаги на Христијан Мицкоски завршуваат исто, прочитани од народот, како книга којашто веќе е здодевна и на сите им е јасно што содржи.

Го дознавме и нивниот план за евроинтеграциите.

Така, сега можат да влезат во Европската Унија само граѓаните коишто имаат бугарски пасоши. Односно, да бидеме до крај отворени, што се однесува до голем дел од членовите на Владата, тие веќе се во Европската Унија, затоа што имаат бугарски пасоши.

Но тоа мора да им се објасни на граѓаните, за што всушност се борат.

Да заклучам на крај: оваа тендер коалиција помеѓу ВМРО и ЗНАМ веќе е јасно како е формирана.

Сакаме да се обратиме и до членовите на ЗНАМ, за кои знаеме дека беа излажани и манипулирани, дека не знаеле во тој момент дека партијата е формирана само за да му наштети на СДСМ, ништо друго.

Бидејќи тие што гласаа за ЗНАМ сме сигурни дека немаше да гласаат за ВМРО-ДПМНЕ, ниту да ја формираат таа партија доколку знаеа дека целиот тој проект служи за измама.

Но, како што кажав, ќе се бориме до крај вистината да излезе на виделина, бидејќи доаѓа времето на вистината, времето на правдата и секако времето на одговорност.

Благодарам.

Андреј Жерновски - член на Извршниот одбор и Секретар за меѓународна соработка

Тагови: Жерновски

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Наскоро во Чикаго се отвора музеј на Барак Обама

Музеј посветен на кариерата на поранешниот американски претседател Барак Обама ќе биде отворен во Чикаго на 19 јуни, на американскиот празник Јунити, кој го одбележува ослободувањето на афроамериканското население од ропство во 1865 година.

Изложбата, сместена во голема бетонска кула, го прикажува животот на демократот пред и по неговото искачување на функцијата прв афроамерикански претседател на Соединетите Американски Држави, вклучувајќи ја и макотрпната реформа на здравствената заштита што ја протурка Обама, која стана позната како „Обамакер“, и убиството на лидерот на Ал Каеда, Осама бин Ладен.

Дипломатските напори на Обама беа почестени, меѓу другото, со неговиот говор пред Бранденбуршката порта во Берлин, заедно со поранешната германска канцеларка Ангела Меркел. Посетителите можат да се прошетаат и низ реплика на Овалната соба во природна големина.

„Тој повеќе или помалку им дозволи на луѓето да си ја работат својата работа“

„Обама го постави правецот за концептот на музејот и сака да ја разгледа изложбата“, изјави за ДПА Мајкл Страутманис, раководител на корпоративните комуникации и политика во Фондацијата Обама. „Но, генерално кажано, тој повеќе или помалку им дозволи на луѓето да си ја работат својата работа“, рече тој.

Покрај музејот, комплексот, кој се простира на околу 7,8 хектари, што е приближно со големина на 11 фудбалски игралишта, вклучува и форум, повеќенаменска сала и дел од градската јавна библиотека.

Силна врска со Чикаго

Изборот на Обама на паркот Џексон за сместување на музејот не беше случаен. Неговата сопруга, Мишел, пораснала на јужната страна на Чикаго, каде што двојката се венчала и каде што се родиле нивните ќерки Малија и Саша. Обама предавал на Универзитетот во Чикаго 12 години и ја започнал својата политичка кариера на јужната страна, на крајот станувајќи 44-ти претседател на Соединетите Американски Држави.

Тагови: Барак Обама

Наука

Ловците на вонземјани скенирале гостин од далечната вселена- објавени се шокантни резултати (ФОТО)

Група научници задолжени за потрага по вонземски живот, поради што се нарекуваат и ловци на вонземјани, конечно испитаа гостин од длабоката вселена - меѓуѕвездената комета 3I/ATLAS - и утврдија дали содржи траги од вонземска технологија.

Објектот 3I/ATLAS е само третиот меѓуѕвезден посетител идентификуван досега, по 1I/Oumuamua и 2I/Borisov. Беше забележан на 1 јули 2025 година, а на крајот од тој месец, физичарот од Харвард, Ави Лоеб, познат по своите контроверзни теории за посетителите од вселената, објави тврдења дека е можно ова да не е меѓуѕвездена комета, туку вонземско вселенско летало кое ќе изврши посебен маневар пред крајот на годината. Научната заедница реагираше на неговите теории со јасна критика.

Институтот SETI (Потрага по вонземска интелигенција) соопшти дека обемните радио скенирања со неговиот телескоп во Северна Калифорнија не пронајдоа докази за вонземска технологија на кометата, објави АП.

Неколку вселенски летала на НАСА и други вселенски агенции ја набљудуваа „небесната ледена топка“ додека минуваше покрај Марс минатиот октомври, приближувајќи се на 30 милиони километри од Црвената планета. Таа беше најблиску до Земјата во декември, кога беше оддалечена 269 милиони километри.

Тимот научници го набљудуваа 3I/ATLAS повеќе од седум часа со телескопот ATA, покривајќи помеѓу 1 и 9 гигахерци, соопшти Институтот SETI. Овој опсег им овозможи на научниците да бараат радио сигнали што не се јавуваат природно и што би можеле да бидат доказ за технологија.

SETI идентификуваше речиси 74 милиони теснопојасни радио сигнали. Откако ги земаше предвид човечките фактори или сигналите што одговараат на движењето на објектот, останаа нешто повеќе од 200 сигнали, за кои беше утврдено дека сите „потекнуваат од технологијата на површината на Земјата или од нашите сопствени сателити во орбитата на Земјата“, соопшти SETI.

Резултатите од студијата беа објавени во Астрономскиот журнал.

„Нашето вселенско летало „Војаџер“ еден ден ќе биде вонземски артефакт во друг ѕвезден систем. Имајќи го тоа предвид, важно е да се разбере природната дистрибуција на меѓуѕвездените објекти за да можеме да ги разбереме аномалиите што еден ден би можеле да бидат знаци на вештачки меѓуѕвездени објекти“, рече д-р Софија Шеик, главен автор на студијата од Институтот SETI.

„Нашите резултати покажуваат колку е реално да се детектира сигнал со технологијата што ја имаме денес. Затоа е важно да продолжиме да бараме техносигнали, дури и кога не очекуваме дека ќе бидат таму“, рече Валерија Гарсија Лопез, коавторка на студијата.

На растојание од речиси 1,3 милијарди километри додека се упатува назад во меѓуѕвездениот простор - од кој никогаш нема да се врати - се проценува дека кометата 3I/ATLAS е со големина помеѓу 440 метри и 5,6 километри. Научниците се сомневаат дека може да биде стара дури 11 милијарди години, двојно повеќе од Сонцето.

Тагови: вонземјани вселената

Свет

Израелскиот парламент изгласа закон за даночни олеснувања за илегалните доселеници

Парламентот на Израел, Кнесетот, денес конечно одобри закон со кој се даваат даночни олеснувања за десетици нелегални населби во окупираниот Западен Брег.

Во соопштението за медиумите на Кнесетот се наведува дека пратениците гласале за законот во конечното читање, доделувајќи даночни олеснувања на нелегалните населби лоцирани во таканаречената „зона на источната линија на конфликтот“.

Детали за законот

Законот го предложија пратениците Цви Сукот од партијата Религиозен ционизам, предводена од министерот за финансии Безалел Смотрич, и Лимор Сон Хар-Мелех од крајно десничарската партија Еврејска моќ на министерот за национална безбедност Итамар Бен-Гвир, заедно со други пратеници. За него гласаа 32 гласа „за“ и 23 „против“. Според законот, жителите ќе имаат право на даночни олеснувања во текот на целата година, а доколку ги исполнуваат условите за повеќе од една бенефиција, ќе можат да изберат една од достапните.

Влегувањето во сила на законот е закажано за јануари 2027 година и ќе важи до 31 декември истата година. Законот, исто така, го овластува министерот за финансии да ја продолжи неговата важност за дополнителни периоди до две години, со одобрение од парламентарниот Комитет за финансии.

Извештај на „Мир сега“

Израелската невладина организација „Мир сега“, која се спротивставува на политиката на населување, во извештај објавен кон крајот на мај изјави дека законот ќе класифицира десетици нелегални населби како области чии жители имаат право на значителни даночни олеснувања.

Организацијата забележува дека првичниот нацрт на законот имал намера да ги прошири даночните олеснувања на сите населби, но неговиот опсег бил стеснет поради високите трошоци и забелешките на експертите. Конечната верзија се однесува на 58 нелегални населби.

Според „Мир сега“, ажурираната верзија првенствено ги опфаќа нелегалните населби каде што поддршката за религиозната ционистичка партија е особено силна.

Меѓународен статус на населбите

Меѓународната заедница ги смета населбите изградени на окупираната палестинска територија за нелегални според меѓународното право и за голема пречка за решение со две држави.

Откако ја презеде функцијата кон крајот на 2022 година, владата на Бенјамин Нетанјаху отворено се залага за значително проширување на активноста за населување. Според „Мир сега“, повеќе од 750.000 израелски доселеници живеат на окупираниот Западен Брег, вклучувајќи го и Источен Ерусалим.

Тагови: доселеници