По четири дена од крвавиот судир меѓу косовските специјалци и група етнички Срби, кој резултираше со пет жртви, отстранета блокадата за влез во селото Бањска во Звечан. Сепак на сите кои влегуваат им се препорачува да не скршнуваат од главниот пат, поради опасност од неексплодирани мини. Чекор кон деескалација на состојбата, ако воопшто во моментов тоа е возможно е ослободувањето на четворица Срби, поради како што пренесоа косовските медиуми, недостаток на докази за вмешаност во неделните инциденти. Во 30-дневен притвор остануваат четворица други. Во Белград и на северот на Косово е ден на жалост, а Србија и денеска го обвинува КФОР дека интервенирал еднострано.
-Не се работи само за прогон, пукање, буквално стрелање кон Срби, туку и упаѓање по куќи, малтретирање, масовни апсења. Ние очекувавме дека КФОР активна улога, а не дека ќе посматра од страна што се случува. , изјави за РТС, Милош Вучевиќ, министер за одбрана на Србија
За Приштина нема дилеми дека Вучиќ е директно инволвиран во инцидентите, особено по објавата на видеото на кое наводно меѓу групата напаѓачи е и вториот човек на Српската листа, Милан Радоичиќ, снимка за кој официјален Белград тврди дека датира од поодамна, а не од неделата. Денеска Приштина тврди и дека меѓу убиените напаѓачи е екс телохранител на директорот на српската безбедносна агенција, Александар Вулин. За косовскиот премиер Курти дојдено било време косовските Срби да бидат ослободени од туторство на Србија.
-Со над 5 милиони евра воено вооружување и доволни количества за група од стотици борци, се докажа сценариото за крвопролевање на Косово. Тие (теористите ) се појавуваат рамо до рамо, на маса во Белград со претседателот Вучиќ, предупредувајќи на директната улога на српската држава во оваа ситуација. , изјави на владина седница Албин Курти, премиер на Косово
И додека Брисел и Вашингтон апелираат дека единствениот пат за нормализација е враќање на дијалогот, дел од регионалните експерти сметаат дека пораките на меѓународната заедница се премлаки и дека е неопходен поголем притисок.
-Немате со кого друг да разговарате. Го имате Вучиќ и го Курти. Дали треба да се притиснат? Апсолутно. Дали се право доволно? Секако дека не. Дали е реално да очекуваме дека некогаш ќе ги дознаеме вистинските резултати од истрагата? Прашање е само дали ќе има договор под маса. , изјави на дебата на ХРТ Денис Авдагиќ, политички аналитичар од Хрватска
За вечерва е најавено ново обраќање на српскиот претседател Вучиќ.