Запечатени буриња со ракија за најубавите животни моменти, адет во Тиквешијата

Запечатени буриња со ракија со години па и децении се чуваат во Тиквешко, за ракијата да се пие за најубавите моменти во животот. Да се наздрави, тогаш кога и срцето пее од радост, а душата плаче од среќа.

Панче Арсовски, претседател на здружението „Ж’та” од Кавадарци, за МИА потврди дека и самиот го испочитувал овој адет и кога му се родиле децата запечатил садови со ракија, за да одлежи и да се пие во посебни моменти.

– Ракијата ја запечатив во бирлаци. Бирлак е поголем сад од стакло, обложен од посебен вид исплетени врби, појасни Арсовски.

Раде Зоков од кавадаречкото село Ресава, познато по производството на убави вина и ракии, откри за МИА дека и самите со сопругата запечатиле ракија, кога им се родиле синот и ќерката.

– Ги чуваме во дрвени буриња, дабови. Едната ракија е стара 24, а другата 22 години. Ја ставивме ракијата бела, но со годините таа природно пожолтува од дабовото дрво. Ќе ја пиеме, здравје нека е, за убави моменти, затоа е ставена, за да се испие и да се наздрави со неа за среќа, рече Зоков, напоменувајќи дека веќе имаат регистрирано семејна винарија, па се во подготовка изградба на фамилијарна мини винарница.

Кавадарчанецот Дане Јошев раскажа за МИА дека традиција е буриња со ракија да се запечатуваат главно кога ќе се роди дете. Ракијата потоа со години се чува и не се допира. Бурето се отвора кога детето ќе матурира, дипломира, докторира, се вдоми или доживее било каква друга среќна околност во животот.

-Таков е адетот кај нас, тоа останало од прадедо, дедо. Кога има веселба во куќата, да се пие ракија која зреела со години во бурето или бирлакот, нагласи Јошев.

Соговорниците со кои разговаравме на оваа тема, рекоа дека така било и за матурските прослави што се славеа годинава во овој крај. Во екот на матурските прослави во Тиквешко како најголем лозарски регион во државата, се отвораат бурињата со домашна ракија стара 18 години, која родителите на сегашните матуранти ја запечатиле кога им се родиле децата. Најблиските на славениците ги вадат печатите и дозволуваат гостите да се насладуваат со домашната лозова, која тие ја запечатиле при раѓањето на годинашниве матуранти.

Всушност, тоа е стар обичај во Тиквешко. Кога ќе се роди мало дете, неговите најблиски во негова чест, ставаат ракија во дрвено буре и ја чуваат со години. Литражата на ракијата која се остава за посебни прилики зависи од можностите на домаќините. Кога детето ќе порасне, ракијата се пие со гости во свечени пригоди кои одбележуваат матурирање, дипломирање, веридба, мажачка или женачка.

Јошев, кој е и претседател на регионалното здружение „Тиквешки лизароовоштари”, се сети дека така било и пред неколку години, кога имал внука матурантка која завршила гимназија.

– Кога се роди, ставивме домашно произведена ракија во дрвено буре со цел да наздравуваме со неа во посебните моменти за неа. Така беше и за останатите внуци. Бурето на природен начин низ годините троши или како што ние во Тиквешијата велиме, пие од ракијата. Затоа одвреме навреме на секои две три години надополнувавме по малку ракија во бурето. После околу осум или девет години старост, ја флаширавме ракијата и ја чувавме за убави денови како матурска, веридби. И навистина за матурската, извадивме дел од ракијата на маса за да пијат гостите и да бидат задоволни со нашите обичаи, раскажа Јошев.

Му било тоа прва внука матурантка и бил многу среќен поради тоа.

– Гостите многу ја бендисаа ракијата стара 18 години. Рекоа дека не е убава, ами преубава. Нема ниту безалкохолен, ниту алкохолен пијалок што би ја заменил, па макар имал и звучно име, па макар и да е произведен во странство. Таа стара ракија е мелем за душата. Зејтин, што би рекле некои, бидејќи кога се става од шишето во чашата се развлекува како масло. Тие што пробаа, знаат, нагласи тој.

Откри дека се уште не е чепната ракијата која ја чува за свадбата на внуката, па здравје кога ќе се омажи, ќе се дегустира и таа. Исто како што ќе се дегустира и ракијата чувана за другите внуци.

Во нормални услови, на веридба, кажа, се трошеле околу шест литри ракија. За свадба, триесетина.

Го прашавме дали јачината на ракијата губи низ годините.

– И кога ќе одлежи, нејзината јачина останува тука некаде. Се менуваат густината и вкусот. Се добива шмек што се вели. Колку е постара, толку е подобра ракијата. Кога ја ставаме, таа има околу педесет степени. Може да падне до кај 47 степени. Останува чиста лозова ракија, без никакви шеќери, ништо вештачко, без хемикалии, појасни Јошев.

Таквата природна ракија, се согласуваат и други тиквешани со кои разговаравме, ако се консумира умерено заради уживање и со мерка, благотворно влијае врз човечкиот организам.

Добра стара ракија во Тиквешко можете да пробате и кога некој оди во пензија, па за свечено одбележување на нечиј влез во третата доба од животот, има шанса да дегустирате домашна ж’та која преспала и неколку децении.

Ставањето на домашна ракија да стои со години па и децении со цел со неа да се одбележат најубавите моменти од нечиј живот, е адет кој се пренесува од генерации на генерации.

И не е важно дали старата ракија се чува на таванот или во подрумот. Важно е дека таа претставува вистинско богатство и гордост за домаќинот. Со неа, секој убав миг во животот, е поубав.

Двегодишно девојче од Турција гризнало змија, животното ѝ вратило (ВИДЕО)

На истокот на Турција, во село во близина на градот Бингол, змија каснала двегодишно девојче, по што детето ја каснало змијата, пишуваат турските медиуми.

Девојчето е пренесено во болница и е во добра состојба.

Таткото на девојчето за локалните медиуми изјавил дека инцидентот се случил во дворот на семејната куќа.

„Додека бев на работа ми се јавија и ми рекоа дека моето дете го каснало змија. За среќа, додека стигнав детето веќе беше пренесено во болница. Како што ми кажаа соседите, детето ја држело змијата во рака и си играла со неа кога го каснала.Им благодарам на моите соседи и Господ нека ги благослови“, изјавил таткото Мехмет Еркан.

Соседот кој го видел малото девојче како ја гризе змијата го оддалечил животното од двегодишното дете и повикал помош. Змијата ја каснала за долната усна.

"Лекарите ми рекоа дека наодите се чисти и дека таа треба да биде под опсервација 24 часа. Би ги повикал родителите да внимаваат на своите деца. Секогаш внимавајте на нив", рекол таткото на девојчето.

Инцидентот се случил минатата среда.

На изборите во Бразил на Болсонаро ќе му се спротистави претходникот, излезен од затвор

Изборната трка за бразилски претседател, официјално започнува денеска, а ќе ја одбележи борбата меѓу актуелниот Жаир Болсонаро и поранешниот левичарски претседател Луис Инасио Лула да Силва.

Главните кандидати, Болсонаро и Лула, кои всушност водат кампања со месеци, на настани како дел од кампањата, ќе ги покажат своите сосема спротивни стилови. Болсонаро (67) планира да ја започне својата кампања со митинг во Јуиз де Фора, малиот југоисточен град каде што беше избоден и за малку убиен од напаѓач за време на неговата кампања во 2018 година.

Нападот го зацементира имиџот на Болсонаро меѓу поддржувачите како борец против политичкиот естаблишмент. Неговиот имиџ е нарушен од серија кризи што го погодија Бразил - од пандемијата на „Ковид-19“ до зголемената инфлација.

Лула (76), кој води во анкетите, ќе ја започне својата кампања со посета на фабриката на Фолксваген во Сао Бернардо до Кампо, во индустриското срце на државата Сао Паоло, каде што ја започна својата политичка кариера како синдикален лидер.

Двата настани се полни со симболика, рече политичкиот аналитичар Адријано Лаурено, кој ја нарече трката „најполаризирачки претседателски избори од враќањето на демократијата“ во Бразил кон крајот на 1980-тите.

„Болсонаро се обиде да изгради божествено избран наратив за неговото претседателствување во која преживувањето откако беше прободен одигра централна улога“, рече Лаурено од консултантската компанија „Проспектива“.

„Лула секогаш се обидува да се врати во Сао Бернардо во клучните моменти од неговата политичка кариера, претставувајќи се себеси како човек на народот“, изјави тој за АФП. Според последната анкета на Институтот „Ипек“, објавена вчера, Лула моментално води со 44 отсто од гласовите, додека Болсонаро може да смета на 32 отсто од гласовите.

Доколку ниту еден кандидат не освои повеќе од 50 отсто од важечките гласови на изборите на 2 октомври, вториот круг ќе се одржи на 30 октомври.

Од март минатата година изборот се сведе на Болсонаро и Лула откако Врховниот суд ја укина пресудата за корупција против Лула, поради што тој заврши во затвор и ја напушти политиката. Лула беше уапсен како дел од операцијата „Car Wash“, масовна истрага за системска корупција околу државната нафтена компанија „Петробрас“.

Лула, претседател од 2003 до 2010 година, ја напушти функцијата како најпопуларен претседател во историјата на Бразил, а неговиот мандат доживеа економски бум кој извлече 30 милиони луѓе од сиромаштија.

Болсонаро смета на нова голема програма за благосостојба за да ја зголеми својата популарност и да го намали јазот со Лула. Сè уште е рано за целосниот ефект на програмата да се види на анкетите. Многу Бразилци стравуваат дека доколку Болсонаро загуби, ќе ги следи стапките на неговиот политички модел, поранешниот американски претседател Доналд Трамп, кој не ги признава резултатите од претседателските избори во САД.

Болсонаро, кој редовно тврди дека има измами во електронскиот систем на гласање во Бразил, сака да каже дека „само Бог“ може да го отстрани од функцијата.

Откриена е неверојатна молекула, уништува 300 бактерии отпорни на антибиотици

Бактериите со текот на времето стануваат сè поотпорни на антибиотици, што им предизвикува проблем на многу научници и здравствени организации.

Имено, современата медицина се соочува со проблемот на развој на бактерии отпорни на сите постоечки лекови, вклучувајќи ги и оние кои се сметаат за последна линија на одбраната.

Но, неодамна научниците пронајдоа молекула која може ефикасно да ги контролира бактериите отпорни на сите видови антибиотици. Станува збор за соединение наречено фабимицин, кое доколку ги помине клиничките тестови (тестови на луѓе), би можело да се користи во борбата против некои од најупорните инфекции.

Новиот потенцијален третман ги таргетира грам-негативните бактерии, група на патогени кои тешко се уништуваат и кои најчесто се причина за инфекции на уринарниот тракт, пневмонија, па дури и крвотокот, пишува Science Alert.

Овие типови на бактерии се отпорни на антибиотици поради заштитната надворешна мембрана која создава еден вид ѕид кој не дозволува да минуваат супстанции штетни за нив. Според истражувањето објавено во 2022 година во „Лансет“, отпорноста на бактериите на антибиотици секојдневно одзема околу 3.500 животи, што ја прави водечка причина за смрт во светот.

Студијата спроведена во англиска болница имала слични обесхрабрувачки резултати, кои покажале дека повеќе од една третина од луѓето со инфекции на крвта со грам-негативни бактерии починале во рок од една година.

Во текот на истражувањето, Фабимицин успеал да го пробие тој проблематичен надворешен слој, притоа не предизвикувајќи премногу штета на здравите бактерии, односно бактериите кои ни се потребни.

Научниците прво анализирале антибиотик за кој било познато дека е ефикасен против грам-позитивни бактерии и направиле неколку структурни промени во него за да ѝ дадат на молекулата способност да се инфилтрира низ моќната одбрана на грам-негативните соеви.

Кога се тестирало во лабораторија и на глувци, ова соединение било ефикасно против повеќе од 300 видови бактерии отпорни на лекови. Згора на тоа, кај глувците со пневмонија или инфекции на уринарниот тракт, тоа дури и ги намалило нивоата на штетни бактерии.

„Со оглед на ветувачката активност на фабимицинот кај моделите на инфекција на глувци и охрабрувачките податоци дека фабимицинот е драматично постабилен во плазмата на стаорци и луѓе, разумно е да се верува дека неговата ефикасност може да се подобри при лекување на повисоки организми“, пишуваат експертите.

Откривањето на антибиотици кои би можеле да делуваат против грам-негативни бактерии не е нешто што се случува секој ден, така што биосинтезата на фабимицин е всушност многу значаен чекор. Како што поминува времето, сè повеќе разбираме како функционираат грам-негативните бактерии и ни е појасно на кои начини можеме да ги потиснеме.

Се разбира, ќе биде потребно време пред фабимицинот да се користи како лек. За да биде одобрен, лекот мора да помине низ три фази на клинички испитувања. Во првата фаза учествуваат помал број субјекти, обично помеѓу 20 и 100 (или поретко неколку стотици) и таа одредува прелиминарна проценка за безбедноста и ефективноста на лекот.

Во втората фаза, ефективноста се тестира на поголем број субјекти, обично помеѓу 50 и 300 и се анализираат различни начини на администрирање на дозите. Во третата фаза учествуваат најголем број учесници - од стотици до десетици илјади; во зависност од болеста за која се развива лекот или вакцината. Во овој момент, конкретен кандидат се споредува со плацебо за да се тестира вистинскиот успех на развиениот лек, а безбедноста дополнително се тестира и се утврдуваат несаканите ефекти.

Истражувањето, насловено како An Iterative Approach Guides Discovery of the FabI Inhibitor Fabimycin, a Late-Stage Antibiotic Candidate with In Vivo Efficacy against Drug-Resistant Gram-Negative Infections е објавено во списанието ACS Central Science.

притисни ентер