Триесет дневен притвор доцна синоќа добија пет лица осомничени во истрагата на СЈО наречена “Империја”. Причината за изречената мерка за сега не е објавена во јавноста. Петмината осомничени во предметот, меѓу нив, бизнисменот Јордан Камчев и Ненад Јосифовиќ, беа префрлени во затворот Шутка по одлуката на судија на претходна постапка.. Ова е исходот по долгата серија распити во кривичниот суд, која заврши неколку часови по полноќ. Од СЈО велат дека очекуваат и проширување на истрагата кон нови лица и за нови кривични дела.
,,Во скоро време се очекува и проширување на истрагата кон нови лица и за нови кривични дела, а во насока на обезбедување на имотно – правните барања од оштетените лица и обезбедување на предметите кои потекнуваат од кривичните дела ќе бидат побарани и мерки за привремено обезбедување на имот.– соопштија вчера од СЈО
Освен петтемина спроведени пред судија, во Империја се опфатени уште 8 други лица, меѓу нив мајката и сестрата на Јордан Камчев. Двајцата осомничени, Камчев и директорот на “ЗК Пелагонија” Панделески вчера и писмено се обратија до јавноста, изјавувајќи дека нивните фирми работат според сите законски прописи. СЈО ги товари за неколку кривични дела, меѓу кои за злосторничко здружување, перење пари, измама, злоупотреба на службена должност, како и оштетување на доверители.