Од Владата целосно ја осудуваат вчерашната изјава на лидерот на „Единствена Македонија“ Јанко Бачев. Апелираат до надлежните институции да истражат дали содржи говор на омраза и соодветно да реагираат на истата.

Владиниот портпарол ги повикаа сите политичките субјекти во земјава се изјаснат и да го осудат ваквиот, како што рече,, „недемократски чин“, кој во ваква ситуација, според него, би можел да предизвика насилство во земјава.

Изјавата беше дадена вчера пред Владата кога Бачев како дел од Делегацијата на Кризниот штаб против референдумот побараа финансиски средства од Владата за водење на јавна пропаганда.

На изјавата на лидерот на „Единствена Македонија“ реагираа и останатите партии. За СДСМ истата е чин на омраза и ширење етничка нетрпеливост.

,,СДСМ го осудува вчерашниот говор на омраза, ксенофобија и навреди јавно искажани од претседателот на партијата Единствена Македонија, Јанко Бачев. Очекуваме надлежните органи соодветно да постапат, да го санкционираат ваквото неодговорно однесување и бесрамно ширење говор на омраза, се наведува во партиското соопштение.

Од ВМРО-ДПМНЕ велат оти се против секој констатиран говор на омраза.

,,Секој констатиран говор на омраза не го поддржуваме, но воедно тоа не и дава право на власта за притисоци кон формирање мислење што неа и одговара. Потребно е практикување слобода на говор според демократски принципи со почитување на човековите права, велат од ВМРО-ДПМНЕ за Канал 5.

Од говорот на Бачев се огради и претседателката на „Глас за Македонија“ Солза Грчева, која присуствуваше на изјавата и чија партија е дел од Кризниот штаб против референдумот.

Од ОЈО за Канал 5 велат по изјава на Бачев ќе постапуваат доколку се утврди дека во конкретниот случај постојат елементи на сторено кривично дело.