Технологија

ВИ што може да го прикрие акцентот на вработени во центрите за повици

Компанија со седиште во американската сојузна држава Калифорнија создаде вештачка интелигенција (ВИ) што го прикрива нагласокот на вработените лица во одделенијата за повици и информирање, со цел намалување на предрасудите и дискриминацијата.

Шарат Нарајана е еден од основачите на „Санас АИ“, чија технологија може да го прилагоди начинот на којшто звучи говорителот, со цел акцентот да биде прифатлив. Разликата може да биде суптилна, но Нарајана истакнува дека им помага на вработените да избегнат злоупотреба, пренесува „Гласот на Америка“.

- Во глобалната економија, на јавувањето до центарот за телефонски повици понекогаш веројатно ќе одговори и лице од подалечен дел на светот. Вработените во овие одделенија може да минат и месеци вежбајќи поубаво да комуницираат со клиентите чиј мајчин јазик и култура се разликуваат од нивните, но и со таквите обуки, нагласокот честопати повторно е пречка, појасни Нарајана.

Како што вели тој, секој ден од нивниот живот има барем по неколку случаи кога се соочуваат со одреден степен на дискриминација, а понекогаш и вистинска злоупотреба. Од друга страна, противниците и скептиците велат дека така се потиснува и се губи различноста меѓу луѓето.

- Не е дека се обидуваме да го скриеме фактот дека одредена личност е од Индија или дека онаа личност е од Филипините. Но, таа личност би звучела појасно, самоуверено и толку посвежо, што другата личност ќе сака да разговара со неа / него, вели управителот.

И самиот Нарајана порано работел како човек зза информации по телефон и, иако не го оправдува однесувањето на оние што се јавуваат, вели дека разбира за што се работи.

- Кога ќе слушнат нагласок, првото нешто што го гледам е недоверба во таа личност (која одговара на повикот). Оној што се јавува размислува на следниов начин: „Толку долго чекав да го решам овој проблем. Сега сум поврзан со некој со кого не 'се сложувам' или со чиј говор не може да се поврзам. Може ли таа личност да ми го реши проблемот“, вели Нарајана.

Социологот Анеш Анеш, од друга страна, стравува од дехуманизирачки трендови во технологијата, како и бришење на различноста.

- Поголем дел од нашата комуникација е посредувана од некоја технологија. Но, кога технологијата ќе почне да го менува нашиот акцент, таа нѐ претвора во свој аватар (олицетворение, б.п.). Во крајна линија, тогаш разбирањето не се развива меѓу луѓето, туку тоа е деловна трансакција во чувство дека бизнисот мора функционално да се прилагоди, објаснува Анеш.

Нарајана вели дека ВИ „Санас“ се користи по избор, и оти 97 отсто од вработените лица би го користеле секој ден, според нивното внатрешно испитување.

- Ако има технолошко решение за да не морам лично да го менувам начинот како звучам, но и за другиот да ме разбере најјасно, тогаш зарем тоа не е одлична работа, истакнува тој.

Се чини, како што се сложуваат познавачите, ВИ зема сè поголем замав во поврзувањето меѓу луѓето, и тоа на сè повеќе и сè поразлични начини. /МИА

Свет

Уапсени се тинејџери во Германија- на мобилните имале упатства за составување бомби

Четворица тинејџери биле уапсени за католички Велигден во Германија под обвинение дека подготвувале напади со исламистичко потекло, информирајќи се за склопување на експлозивни направи, објавија денеска германските медиуми.

„Обвинетите се подготвувале за напади со експлозивни направи кои првенствено служат за ширење оган и за напади со мачети“, известува јавниот сервис WDR, повикувајќи се на извори во истражните кругови.

При анализата на податоците на мобилните телефони на четворицара малолетници, уапсени во април под сомнение дека подготвувале напад со исламистичка позадина, пронајдени се упатства за составување експлозивни направи.

При претресот во станот на еден од осомничените биле пронајдени нож и мачета. Во исто време, како што се наведува, не се пронајдени информации за можни конкретни цели, туку како места на можни напади се споменуваат само градови како Келн, Дизелдорф, Дортмунд и Штутгарт.

Четири малолетници на возраст од 15 и 16 години, од кои три се момчиња и едно девојче, се уапсени во сојузните покраини Северна Рајна-Вестфалија и Баден Виртемберг откако Канцеларијата за заштита на уставниот поредок ги следела активностите на еден од осомничените на форуми каде што се собрани од исламистите и поддржувачите на т.н исламски држави.

Во последно време исламистите, меѓу другото, поради зголемениот број на пропалестински протести кои често ги организираат забранети организации поврзани со Хамас, повторно станаа во центарот на вниманието на истражните органи.

Минатиот викенд во Хамбург се одржа протест на кој отворено се повика на воведување шеријат во Германија, поради што на удар е министерката за внатрешни работи Ненси Фезер.

Македонија

Двајца загинати во тешка сообраќајна несреќа на патот Радовиш-Штип

Во сообраќајната несреќа што се случи на магистралниот пат Радовиш-Штип загинаа двајца возачи, а сопатничка од едното возило е пренесена во штипската Болница.

Веста за МИА ја потврди портпаролката на СВР Струмица, Александра Трајанова, која информираше дека во несреќата учествувале автомобили „пасат“ и „опел“.

- На местото на несреќата починале возачите на двете возила, а сопатничка од патничкото возило „опел" е пренесена во Медицински центар Штип, изјави Трајанова.

Увид на местото на несреќата врши јавен обвинител, а сообраќајот се пренасочува по стариот пат.

Од полицијата повеќе детали за несреќата најавуваат за утре.

Свет

Во ЕУ 7,1 отсто од вработените работат 49 или повеќе часа неделно, најмногу во Грција

Во Европската унија во 2023 година, 7,1 отсто од вработените работеле 49 или повеќе часа неделно, што спаѓа во долго работно време, покажуваат податоците објавени од Евростат.

Од земјите на Европската унија најголем удел на работници со долго работно време има Грција, поточно 11,6 отсто, потоа Кипар со 10,4 отсто и Франција со 10,1 отсто.

Најмал удел на вакви работници е забележан во Бугарија, 0,4 отсто, како и во Литванија и Летонија, по 1,1 отсто.

Речиси една третина од самовработените или поточно 29,3 отсто од оваа категорија работат 49 или повеќе часа неделно, додека кај вработените овој процент е значително помал и изнесува 3,6 отсто.

Долгите работни часови најчесто се застапени кај квалификуваните работници во земјоделството, шумарството и рибарството, како и кај менаџерите.

Како што пренесува порталот Статиста, вработените со полно работно време во Европската унија во првиот квартал од 2023 година работеле во просек по 40,4 часа неделно.