Македонија

Уставниот суд не обезбеди мнозинство за носење одлука по одредбите од Изборниот законик за изборното рекламирање

Уставниот суд не обезбеди мнозинство при гласањето за да се прифатат иницијативите од Левица и Демократи за оценување на уставноста на делови од Изборниот законик поврзани со платеното политичко рекламирање.

Од Уставен соопштија дека од вкупно 9 уставни судии, седуммина биле присутни, но ги немало потребните 5 гласа ЗА, за да донесат било каква одлука и затоа по предметот ќе се гласа на некоја од следните седници. Подносителите во иницијативите наведуваат дека оспорените одредби промовираат дискриминаторски пристап за помалите партии, додека четирите најголеми партии-по две од власта и две од опозицијата добиваат привилигиран пристап до медиумите и државните средства, а останатите се потполно исклучени.

Судијата известител Осман Кадриу предложи да се поведе постапка за двете иницијативи и да се оценуваат спорните одредби со аргументи дека изборната регулатива што се оспорува е штетна, противуставна и непропорционална, а помалите партии се дискриминирани за разлика од поголемите кои се привилигерани. Поддршка дадоа и претседателот на Уставниот суд, Дарко Костадиновски, судијките Ана Павловска Данева и Добрила Кацарска, иако имаше забелешки за неговата содржина.

- Сметам дека оспорувањето е основано, прави градација помеѓу политичките партии на тој начин што за поголемите партии предвидува привилегиран пристап до медиумите и до државните средства за рекламирање. На помалите партии на дискриминаторски начин им се оневозможува фер начело во изборната кампања за сите видови на избори што ги имаме, локални, парламентарни и претседателски. Оваа дискриминација се забележува посебно во нееднаквиот пристап и во можностите во изборните процеси на сите политички партии, изјави Кадриу.

– За плурализмот од суштествено значење е резултатот од слободните и демократски избори да биде резултат до кој е дојден низ еден процес во кој сите засегнати имале еднакви и фер шанси да ги понудат своите политички понуди. Дали со овие норми е тоа така направено? – Апсолутно, не. – изјави Костадиновски.

– И во овој модел на пропорционално плаќање и претставување треба да постои еднаквост, можност за сите, а сообено ако ОБСЕ тврди дека се исклучени одредени политички субјекти, тоа веќе зборува и за дискриминација и нееднаквост, изјави Павловска-Данева.

За разлика од овие ставови, дел од уставните судии се изјаснија против поведување постапка за иницијативите, а меѓу нивните аргументи беа дека на таков начин ќе се појави правна празнина за политичкото рекламирање, а Уставниот суд пред три години одлучувал по истите оспорени членови и веќе се произнел со неповедување постапка. Сметаат дека Собранието, а не Уставен е надлежно за промена на спорните законски решенија.

-Со оглед на тоа дека во услови кога тешко се постигнува консензус за измени и дополнувања на новиот Изборен законик со евентуалното потенцијално наше носење на одлука за поведување постапка, подоцна и за укинување на тие решенија ние ќе оставиме ден простор којшто нема да биде регулиран и во недостиг на законски одредби всушност нема да постои според мене платеното политичко рекламирање, изјави судијката Татјана Васиќ Бозаџиева.

-Судот ќе ги отфрли овие иницијативи ако за ова веќе одлучувал, а не постојат основи за поинакво ослучување, изјави судијата Насер Ајдари, а со сличен став беше и Фатмир Скендер.

Од Левица денеска предупредија дека евентуалното отфрлање на Иницијативата би значело легализирање на нерамноправните услови за учество на изборите и опасен преседан за политичкиот плурализам. Според нив Уставниот суд сака да го потврди авторитаризмот на власта преку Изборниот законик, а проблемот велат не е во финансирањето, туку во тоа што на Левица ѝ е оневозможен еднаков пристап до медиумскиот простор за време на изборната кампања.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Фудбал

Манчини се поблиску до клупата на Италија?!

Враќање по три години – Италија пронајде селектор

Претседателот на Италијанскиот фудбалски сојуз, Џовани Малаго, вели дека трофејниот стратег Роберто Манчини наскоро треба да стане новиот-стар селектор на „Аѕурите“.

По одбивањето од страна на Андреа Пирло и оставките на Паоло Малдини и Леонардо, во вторникот се одржа итен состанок на Асоцијацијата.

„Разговарав со Роберто Манчини за преземање на функцијата нов селектор. Го чекаме неговиот потпис“, изјави Малаго.

Манчини веќе еднаш ја извршуваше оваа функција, во периодот од 2018 до 2023 година, кога си замина и набрзо потоа ја презеде репрезентацијата на Саудиска Арабија.

Тој го освои Европското првенство во 2023 година со „Аѕурите“.

Со оваа репрезентација не учествуваше на Светското првенство во Катар во 2022 година, а има и две трети места во Лигата на нации, во 2021 и 2023 година.

По Саудиска Арабија, Манчини го водеше само катарскиот клуб Ал-Сад, кој неодамна го напушти. Манчини е тренер веќе две и пол децении.

Во кариерата до сега ги водел Фиорентина, Лацио, Интер, Манчестер Сити, Галатасарај, повторно Интер и Зенит.

Тагови: Манчини

Шоу биз

Тејлор Свифт и Тревис Келси донирале два милиона долари

Светската музичка ѕвезда Тејлор Свифт и нејзиниот сопруг, рагбистот Тревис Келси донираа 2 милиони долари на организацијата „Answer the Call NYC“, која обезбедува финансиска помош за семејствата на полицајци, пожарникари и болничари...

Светската музичка ѕвезда Тејлор Свифт и нејзиниот сопруг, рагбистот Тревис Келси донираа 2 милиони долари на организацијата „Answer the Call NYC“, која обезбедува финансиска помош за семејствата на полицајци, пожарникари и болничари кои ги загубиле животите вршејќи ја својата должност.

По овој гест, направен пред нивната свадба, тие добија бројни емотивни пораки на благодарност од организацијата и од семејствата на настраданите.

Патриша Полимени, сопругата на покојниот њујоршки детектив Џек Полимени, изјави дека донацијата од славниот пар носи многу повеќе од само пари:

– Вашата донација носи надеж, утеха и чувство на заедништво за семејствата кои се обидуваат да продолжат со животот по загубата на личност што го посветила својот живот на служење на другите. Слични пораки на благодарност упатија и Аманда Ривера, ќерката на полицаецот Вилијам Ривера, како и Алисон Гаргер, сопругата на Томас Џ. Кенеди, кој го загуби животот во терористичкиот напад на 11 септември.

Извршната директорка на организацијата, Лорен Профета, потврди дека овие значителни средства ќе овозможат продолжување на неопходната помош за семејствата во Њујорк. Оваа донација е дел од поширокиот хуманитарен ангажман на парот; Тејлор Свифт и Тревис Келси досега имаат донирано вкупно околу 26 милиони долари на разни организации низ САД.

Култура

Нови успеси за „скејтбордингот не е за девојчиња“ на Дина Дума

Во трка за срцето на Сараево и со награда од Ерусалим: Нови успеси за „скејтбордингот не е за девојчиња“ на Дина Дума.

„Скејтбордингот не е за девојчиња“ на режисерката Дина Дума е селектиран во главната натпреварувачка програма за игран филм на 32. Сараевски филмски фестивал, каде што ќе ја има својата европска премиера и ќе се натпреварува за престижното Срце на Сараево. Истовремено, филмот ја освои наградата „Камингс“ како победник во конкуренцијата „Во духот на слободата“ на 43. Филмски фестивал во Ерусалим.

Учеството во Сараево има посебна симболика за филмот. Токму на „CineLink Industry Days“, индустриската платформа на Сараевскиот филмски фестивал, „Скејтбордингот не е за девојчиња“ во 2022 година, додека сè уште беше проект во развој, ги освои наградите „Film Centre Serbia CineLink Award“ и „Female Voices CineLink Award“. Четири години подоцна, филмот се враќа во Сараево како завршено остварување и како еден од само деветте наслови во главната натпреварувачка програма за игран филм. Фестивалот ќе се одржи од 14 до 21 август 2026 година.

Наградата во Ерусалим ја додели жирито во состав Исак Заблоцки, Нир Бергман и Рони Абулафија. Во образложението, жирито го истакнува комплексниот портрет на женското растење во општествено и економски ограничувачка средина и начинот на кој филмот ги прикажува дискриминацијата, општествените очекувања и односите на моќ што ги обликуваат животите на младите жени.

Жирито посебно ги издвојува самоувереноста и чувствителноста со кои Дина Дума го гради светот на своите ликови, како и оригиналниот и нијансиран портрет поддржан од три исклучителни актерски изведби.

Во образложението се наведува и дека филмот пристапува кон тешките теми со простор за хумор, сочувство и животност, без да нуди едноставни одговори, создавајќи „прецизно и длабоко емотивно филмско искуство што останува со гледачот долго по проекцијата“.

Наградата во Ерусалим е најновото меѓународно признание за „Скејтбордингот не е за девојчиња“. Филмот ја имаше својата светска премиера на фестивалот Трајбека во Њујорк, каде што Дина Дума ја освои престижната награда „Нора Ефрон“.

Филмот ја следи приказната на сестрите Адела и Зара, кои растат во средина во која економската неизвесност, семејните околности и општествените правила сè повеќе ги ограничуваат нивните избори. Нивната блискост е ставена на тест кога традиционалните очекувања се закануваат да ги разделат. Преку нивната лична приказна, филмот отвора теми за женското растење, слободата, солидарноста и правото на сопствен избор.

Сценариото го потпишуваат Дина Дума, Лидија Мојсовска и Теона Стругар Митевска. Во главните улоги настапуваат Ефќар Абаз, Џефрина Јашари, Симонида Селимовиќ и Ганимет Абдула.

„Скејтбордингот не е за девојчиња“ е копродукција меѓу Северна Македонија, Белгија, Словенија и Хрватска. Филмт е реализиран со финансиска поддршка од Агенцијата за филм на Република Северна Македонија. Продуценти на филмот се Лабина Митевска, Себастијан Делоа, Даниел Хочевар и Вања Сремац.

Продукцијата „Сестри и брат Митевски“ годинава ќе биде двојно застапена на Сараевскиот филмски фестивал. Покрај „Скејтбордингот не е за девојчиња“ во главната натпреварувачка програма, филмот „Мајка“ ќе биде прикажан во селекцијата „Во фокус“, каде што ќе ја има својата босанскохерцеговска премиера.