На долго најавуваниот „Ден на ослободување“ ја потпиша извршната наредба за царини за сите земји, вклучително и за Македонија. Како што појасни Трамп, станува збор за два пакета на царини, 10 проценти за увоз на секаков вид на стоки во САД, и т.н. реципрочни царини кои достигнуваат и до 90 проценти, каде влегува и земјава. Причината за тоа како што кажа тој е бидејќи САД според него со години биле ограбувани и од непријателите, но и од сојузниците.

-Со декади, нашата земја е ограбувана, силувана и разграбувана од блиски и далечни нации, и пријатели и непријатели исто така. Воведуваме реципрочни царини на земји низ светот. Реципрочни – тоа значи тие ни го прават на нас, а ние им го правиме на нив. Многу е едноставно, не може да биде поедноставно од тоа. Ова е еден од најважните денови според мене во американската историја, тоа е нашата Декларација на економска независност. / Тие ни наплаќаат на нас, ние им наплаќаме на нив и им наплаќаме помалку, па како може некој да биде вознемирен? Но, ќе бидат, бидејќи не сме наплаќале на никого ништо, но сега ќе наплаќаме.-Доналд Трамп – Претседател на САД.

Царините се очекува сериозно да влијаат врз Кинеската автомобилска индустрија која сега се соочува со потенцијална загуба на милиони работни места, вклучително и за Индија, Индонезија и повеќе држави од далечниот исток кои низ годините важеа за места со ефтина работна рака. На европскиот континент пак, Шефица на ЕК Урсула фон Дер Лајен најави соодветен одговор од Унијата која со над 450 милиони жители важи за најголем светски пазар. Според неа, чекорот на Трамп ќе ги зголеми цените на секое ниво, но тоа ќе го почувствуваат и американските граѓани.

-Ние веќе го финализираме првиот пакет на контра-мерки како одговор на царините за челикот. Исто така се подготвуваме за останати контра-мерки за заштита на нашите интереси и бизниси доколку преговорите не успеат. / Европа има сè што и е потребно за да ја преброди оваа бура. Заедно сме во ова. Ако нападнете еден од нас, ќе нè нападнете сите нас.-Урсула фон Дер Лајен – Претседателка на ЕК.

На листата на држави кои ги објави американскиот претседател Трамп, се најдоа и ненаселени места како островот Јан Мајен во близина на арктикот и островите Херд и Мекдоналд каде единствени жители се локалните пингвини. Објаснување за овој потег нема, но од Белата Куќа појаснија дека Русија и Белорусија не се во листата на држави бидејќи се под санкции. Долгогодишните американски сојузници пак, речиси без исклучок најавија дека ќе возвратат со контра мерки.

-Одлуките кои ќе ги преземеме во деновите и неделите кои доаѓаат ќе бидат водени само од нашиот национал интерес, во интерес на нашата економија,-- Кир Стармер – Премиер на В. Британија.

-Оваа одлука е катастрофа за светот на економијата. Ова е огромна тешкотија за Европа, но мислам дека е и катастрофа за САД-Франсоа Бајру – Премиер на Франција..

-Ќе се бориме против овие тарифи со контра-мерки, ќе го заштитиме нашиот народ,--Марк Карни – Премиер на Канада.

-Трговските рестрикции наметнати од владата на САД може да имаат значително влијание врз односите меѓу Јапонија и САД--Јошимаса Хајаши – Генерален секретар на владата на Јапонија.

Македонија која на листата на американскиот претседател се најде со царини во висина од 33 проценти е на второто место од соседите, по Србија која доби 37 проценти. Албанија и Косово имаат 10, а Бугарија и Грција како дел од ЕУ ќе се соочат со царини од 20 проценти.

Според листата на Трамп, земјава царинела стоки од САД во висина од 65 проценити, но не е познато врз основа на што е направена таа пресметка. Сепак, дел од странските новинари велат дека пресметката е извршена врз основао трговскиот дефицит кој САД го има со одредена држава. Како пример е посочена Индонезија која имала извоз од 28 милијарди долари и увоз од 17 милијарди долари, врз основа на што добила царини од 64 проценти.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.