Министерот за внатрешни работи Панче Тошковски вчера и денеска во Загреб учествува на министерска конференција во рамки на Салцбуршкиот форум, штој е централно-европска владина платформа за мултилатерален дијалог и соработка за прашања во врска со внатрешната безбедност, во која Македонија е дел од групата пријатели на оваа платформа.
На сесијата „Прекугранична соработка во справувањето со нелегалната миграција и организираниот криминал“, како што денеска соопштија од МВР, Тошковски имал обраќање во кое потенцирал дека со заедничката соработка преку мисијата Фронтекс досега е постигнато подобрена контрола на нелегални мигрантските рути, зајакнат капацитет за борба против прекуграничниот криминал и зголемен капацитет на македонските гранични операции да бидат поблиску до стандардите на ЕУ.
- Користејќи ја помошта од Европската унија, ја зајакнавме граничната инфраструктура, ги подобривме нашите системи за азил и добивме поддршка во операциите против шверцот и спречувањето на трговијата со луѓе. Придонесуваме кон регионалната стабилност со воспоставување на подобрена гранична безбедност. Постигнавме намалување на нерегуларната миграција. Интензитетот на нелегалните обиди за преминување на границата е намален од почетокот на 2025 година. Во периодот од 1 јануари до 12 јуни 2025 година, спречени се вкупно 1.956 обиди, што во споредба со истиот период во 2024 година претставува намалување за триесет проценти, посочил министерот Тошковски, како дел од успесите постигнати на ова поле.
Тој дефинирал и неколку места за подобрување на соработката кои ќе донесат подобри резултати како олеснување на брзата размена на податоци, континуирана размена на разузнавачки податоци со цел ефективни истраги против меѓународните криминални групи, заеднички програми за обуки на лица и развој на електронски алатки и истражни методологии вклучително и разузнавање од отворени извори со цел собирање на критичните информации и докази.
Министерот Тошковски на форумот изразил желба Македонија, како земја пријател на форумот да биде домаќин на таков еден иден настан со што уште еднаш ќе ја потенцираме посветеноста на заедничката соработка и иднина на Западен Балкан како дел од Европа која е побезбедна, посилна и пообединета.
Во рамките на форумот, Тошковски остварил и билатерална средба со министерот за внатрешни работи на Хрватска, Давор Божиновиќ.
- Фокусот на средбата беа начините на справување со илегална миграција и активностите поврзани со борбата против организираниот и транснационален криминал. Се разговараше за реорганизација на границата и поставеноста на полицијата со цел поуспешно обезбедување на истата. Министрите изразија загриженост за настаните на Блискиот исток и можноста за создавање на нова мигрантска криза и заедничкиот заклучок беше дека е потребно уште сега да почнат да се вршат подготовки во однос на материјални, технички и човечки ресурси со цел успешно справување со таков нов евентуален мигрантски бран, се додава во соопштението.
Министрите на форумот ја разгледале и соработката помеѓу Центарот за обука на МВР и Полициската академија на Хрватска, можностите за размена на искуства, наставни програми за средното полициско училиште кое ќе биде најблиску до хрватскиот модел.