Здравствените организации „кројат“ шема - секоја земја да има пристап до „лек“. Истата е наречена „Ковакс“, а во неа стои и Македонија.
Засега не се знае дали вакцината за нас ќе биде бесплатна, вели за Канал 5, Александар Стојанов, директор на Центар за јавно здравје и член на Комисијата за заразни болести.
Но, додека ние се надеваме оти сите ќе имаат пристап до вакцина и никој нема да е обесправен, во време кога се уште не е пронајдена целосно ефикасна формула, светот во битка – секоја земја сака да си ги заштити прво своите граѓани.
Па додека глобалните здравствени организации говорат за правично дистрибуирање, веќе се ставаат потписи на официјални договори за набавка на вакцини.
Америка прва се договори, а и Британија објави дека веќе го официјализирала обезбедувањето на напредни потенцијални вакцини. Деновиве и земји членки на ЕУ интензивно преговараат со производители на лекови за да добијат милиони дози ветувачки вакцини.
Ваквите постапки се прекорувани од страна на Светската здравствена огранизација.
„Вакцинскиот национализам“ не е добар и нема да ни помогне. Делењето на вакцината и корисни третмани со другите не е давање милостиња, туку е начин заеднички да се победи вирусот и да се придонесе за побрзо економско закрепнување. Така и целосната штета предизвикана од КОВИД 19 ќе биде помала,вели Тедрос Аданом Гебрејезус - Генерален директор на СЗО.
Но, реалноста е дека т.н. „вакцински национализам“ никој и не може да го спречи, па се останува на совеста и расположението на најразвиените земји.
Засега околу 160 тимови се тркаат кој прв да дојде во вакцина, а научници од Универзитетот во Канзас тврдат дека веќе ја откриле „слабата точка“ на вирусот САРС-КоВ-2.