СЗО: Британскиот сој на коронавирус го има во 50 земји, загрижени сме за јапонскиот

Новиот сој на коронавирус кој првпат беше откриен во Велика Британија е присутен во 50 земји и територии, а новиот јужноафрикански вид во 20 од нив, објави Светската здравствена организација (СЗО).

Третата мутација на вирусот, чие откритие го објави Јапонија во неделата, може да има влијание врз имунолошкиот одговор и бара дополнително истражување, соопшти организацијата, оценувајќи го како „загрижувачка варијанта“.

„Колку повеќе се шири вирусот САРС-КоВ-2, толку е поголема веројатноста за мутација“, соопшти СЗО.

„Високата стапка на инфекција значи дека треба да очекуваме да се појават повеќе варијанти на вирусот.

Британската варијанта на вирусот, VOC 202012/01, која за првпат е пријавена до СЗО на 14 декември, е пронајдена во 50 земји, територии и зони, според организацијата на ООН.

Резултатите од тестот покажуваат распределба по возрасни групи и пол слична на онаа на другите варијанти на вирусот што циркулираат меѓу популацијата.

Следењето на контактите покажало дека новата варијанта на вирусот е позаразна.

Варијантата идентификувана во Јужна Африка, 501Y.V2, која за првпат е пријавена до СЗО на 18 декември, е откриена во 20 земји, територии и зони.

Можеби е позаразна од варијантите што циркулирале досега во земјата, но се чини дека не предизвикува потешки форми на болеста, објави СЗО во билтенот објавен во вчера вечер.

СЗО забележува дека преваленцата на овие две нови варијанти на вирусот е веројатно многу потценета.

Најдено е телото на американски планинар во близина на вториот највисок врв на светот

Американски планинар кој исчезна во близина на К2, втората највисока планина во светот, е пронајден во планинскиот венец Каракорум во северен Пакистан од екипаж на воен хеликоптер, пренесуваат агенциите.

Пакистански воен тим го забележал телото на Алекс Голдфарб Румјанцев од хеликоптер, откако започнала интензивна операција за пребарување и спасување ден претходно, соопшти Пакистанското планинарско друштво (АЦП).

Тоа е втора смрт на странски алпинист на таа планина за помалку од една недела.

„Телото на руско-американскиот алпинист Алекс Голдфарб беше пронајдено од пакистански воен тим на планината Пасторе Пик висока 6209 метри“, рече Карар Хаидри, портпарол на АЦП.

Се претпоставува дека алпинистот паднал, додава Хаидри.

Голдфарб и унгарскиот планинар Золтан Сланко планирале да се аклиматизираат на врвот Пасторе, лесен врв за пешачење лоциран помеѓу базните логори за К2 (8611 м) и Брод Пик висок 8047 м.

Тие биле дел од унгарскиот тим на Magyar Expedicios чија цел била да го освојат Брод Пик во зима и без помош на боци и носачи на кислород.

На Брод Пик сè уште не е забележано зимско искачување.

Планинарското дуо се соочило со екстремни временски услови при искачувањето до Пасторе Пик и Сланко решил да се врати, додека Голдфарб самостојно го продолжил искачувањето.

Откако не се вратил до неделата, Сланко ја предупредил АЦП и се вклучил во потрагата.

Голдфарб е лекар и предавач на Харвард, Бостон и е доброволец во лекување на пациенти со ковид-19 од почетокот на пандемијата, изјавил неговиот син Леви Голдфарб.

„Тој го имаше прекрасното искачување. За него, тоа беше ослободувачко искуство, бидејќи на висорамнините не е важно дали сте лекар, адвокат, па дури и крадец. Сите тие етикети веќе не се важни и вие сте целосно голи затоа што тогаш играте според сосема нови правила. Тој оствари прекрасни пријателства во планините, спаси животи и себе си и го стори тоа патувајќи по светот“, го опиша Леви својот татко.

Неколку дена претходно, светски познатиот шпански алпинист Серхио Монготе загина на Каракорум откако паднал во леден процеп кога се спуштал кон базниот логор на К2.

Умрел истиот ден кога непалски тим алпинисти напишаа нова страница на планинарењето со прво зимско искачување на оваа крајно тешка планина. Стотици врвни алпинисти од Европа и САД се обиделе да го сторат тоа, но К2 се покажал немилосрден.

Или како што рече американскиот планинар Џорџ Бел: „Тоа е дива планина која се обидува да те убие“.

Во 2008 година, 11 алпинисти загинале на К2.

Непалскиот тим од 10 алпинисти го предводел Нимсдаи Пурја и сите заедно се искачиле на врвот во исто време. Непалските водичи, најчесто од народот Шерпа, се неопходни и незаменливи членови на странските експедиции.

„Со децении, Непалците им помагаат на странските алпинисти да се искачат на врвовите на Хималаите, но никогаш не сме го добиле признанието што го заслужуваме“, рече Ками Рита, кој се искачил на Монт Еверест дури 24 пати.

Груби-Абазовиќ: Односите меѓу Македонија и Црна Гора се одлични

Првиот вицепремиер и министер за политички систем и односи меѓу заедниците,Артан Груби оствари онлајн средба со вицепремиерот на Црна Гора Дритан Абазовиќ, се наведува во соопштението од неговиот кабинет.

На оваа средба и двајцата соговорници г.Груби и г. Абазовиќ разменија мислења за актуелните политички теми во земјата и регионот. Двајцата заедно високо ја оценија соработката меѓу Македонија и Црна Гора, соработка која е на одлично ниво.

Првиот вицепремиер Груби му честиташе на неговиот колега од Црна Гора, Дритан Абазовиќ за функцијата вицепремиер и за успешното спроведување на досега клучните политики кои одат во прилог на сите граѓани во Црна Гора.

Груби исто така му соопшти на својот колега Абазовиќ дека Македонија е посветена на исполнувањето на потребните реформи и обврски со цел што побрзото отворање на преговорите со Европската Унија.

Од негова страна, вицепремиерот на Црна Гора, Дритан Абазовиќ му кажа на Груби дека Македонија е пријателска земја и стратешки партнер на неговата земја. Абазовиќ вели дека односите со Скопје се изградени преку дијалог и добра соработка.

Груби и Абазовиќ за време на оваа онлајн средба се согласија дека полноправното членство на Македонија и Црна Гора во НАТО, пријателството со меѓународната заедница и особено со стратешките партнери на двете земји, Соединетите Американски Држави и заедничкиот пат кон Европската Унија се додадена вредност за развојот на регионот и особено за мирот и стабилноста.

Заев: Да ги послушаме препораките на здравствените работници и на Синодот на МПЦ-ОА

Премиерот Зоран Заев го честиташе денешниот празник Богојавление – Водици, на сите православни верници во земјава, на Синодот на Македонската православна црква – Охридска архиепископија, и на сите свештеници и монашки братства и сестринства.

-Со овој празник кој се слави во име на осветувањето на водите, во име на Христовото крштевање во реката Јордан, кога се јави Бог како бел гулаб, се осветува сè: водата и воздухот, природата и сите созданија, целата земја и сета вселена за очистување на човековата природа која со крштевањето станува нова твар и започнува нов живот, нова можност за обнова на високите универзални хуманистички вредности што ги споделуваме во нашата заедница, напиша Заев на Фејсбук.

Како никогаш досега, продолжува премиерот во честитката, во услови на пандемијата со Ковид-19, овој празник силно нѐ повикува да го просветлиме нашиот ум, да се очисти нашето срце и да се облагороди нашата душа, за да ги поминеме во здравје искушенијата на пандемијата.

-Оваа година да ги послушаме препораките на здравствените работници и на Синодот на МПЦ-ОА и да го прославиме празникот одговорно и со отворени срца да прифатиме дека оваа година ќе се лишиме од традицијата во име на идните празнувања на овој голем празник. Нека е вековит денешниот ден Богојавление – Водици!, напиша премиерот Зоран Заев на Фејсбук.

притисни ентер