Средба Божиновска – Милер: Поддршка од КфВ банка за нови енергетски проекти - Канал 5

Македонија

Средба Божиновска – Милер: Поддршка од КфВ банка за нови енергетски проекти

Поддршка од КфВ банка за нови енергетски проекти и зајакнување на стратешкото планирање.

Средба Божиновска – Милер: Поддршка од КфВ банка за нови енергетски проекти

Напредокот и понатамошната реализација на втората фаза од ветерниот парк Богданци, фотонапонската електрана „Битола 2“, како и третата фаза од ревитализацијата на големите хидроелектрани беше во фокусот на работната средба меѓу министерката за енергетика, рударство и минерални суровини Сања Божиновска и Клаус Милер, директор на КфВ банка за Југоисточна Европа и Турција, што се одржа во рамките на ЕСГ Адриа самитот 2025 во Тиват, на која присуствуваше и директорот за финансии на АД ЕСМ Иван Стојановски.

-Овие проекти не само што го зголемуваат домашното производство на електрична енергија, туку и го зајакнуваат целиот енергетски систем на државата. Партнерството со КфВ банката е значаен поттик за трансформацијата кон одржлива енергетика, истакна Божиновска.

Посебно внимание, како што информираат од Министерство за енергетика, рударство и минерални суровини (МЕРМС), беше посветено на нови иницијативи за техничка помош насочена кон унапредување на интерните капацитети на АД ЕСМ, за среднорочно и стратешко планирање, со акцент на инвестициските проекти.

КфВ банката, како што посочуваат од МЕРМС, потврди дека останува стратешки партнер и дека ќе продолжи со поддршка за нови проекти, меѓу кои се и фотонапонската електрана „Битола 3“ и други инвестиции во обновливи извори на енергија.

Тагови: електрична енергија Сања Божиновска

Свет

Бајден на Х: Ракот сите нè погодува

Поранешниот американски претседател Џо Бајден денеска им изрази благодарност на сите добронамерни луѓе за пораките на поддршка што ги доби откако објави дека му е дијагностициран рак на простата.

Бајден на Х: Ракот сите нè погодува

„Ракот сите нè погодува“, напиша 82-годишниот поранешен претседател на платформата X.

Бајден рече дека тој и неговата сопруга Џил, како и многу други, откриле дека се најсилни во најтешките времиња.

„Ви благодариме што нè кревате со љубов и поддршка“, продолжи Бајден.

Поранешниот американски претседател објави фотографија на која се смешка кон камерата, а неговата сопруга држи мачка во раце.

Вчера се дозна дека Бајден има рак на простата. Кабинетот на Бајден објави дека станува збор за агресивна и напредна форма на болеста што се проширила на коските, додавајќи дека состојбата може да се контролира.

Претседателот Доналд Трамп, претходник и наследник на Бајден, му посака на Бајден брзо закрепнување откако беше објавена дијагнозата, а пораки со поддршка испратија и поранешниот претседател Барак Обама и неговата сопруга Мишел.

Ова не е прва дијагноза на рак во семејството Бајден. Неговиот најстар син Бо почина во 2015 година од тумор на мозокот на 46-годишна возраст. /МИА

Тагови: Бајден

Формула

Леклер очекува многу тежок викенд за Ферари во Монако

Пред една година, Шарл Леклер доживеа едно од најголемите задоволства за секој возач на Формула 1, имено победа на домашна трка.

Леклер очекува многу тежок викенд за Ферари во Монако

Возачот на Ферари беше двојно среќен, бидејќи негова домашна трка е во Монако, а трката во Кнежевството е онаа што секој возач сака да ја освои.

Сега, сепак, тој очекува викендот во Монако да биде многу тежок за него и за Ферари. Според него, слабостите на автомобилот на Скудерија ќе бидат откриени во Кнежевството. Тој не ја исклучи можноста за изненадувања, бидејќи во Монако поставките се најважни за квалификациите, со оглед на речиси невозможното претекнување во трката.

-Очекувам многу тежок викенд. Мислам дека Монако ќе открие многу од слабостите на нашиот тим, па не знам... но има и многу работи што не можат да се предвидат. Ризиците што ги преземате во квалификациите, поставките на болидот, кои се многу различни, па се надевам на изненадување, изјави Леклер по вчерашната трка за Големата награда на Емилија-Ромања. /МИА

Тагови: Формула 1 Монако

Свет

Стотици демонстранти протестираа против Хамас во Кан Јунис, на југот од Појасот Газа

Медиумите во Газа објавија снимки на кои се гледаат стотици демонстранти во Кан Јунис, на југот од Појасот Газа, како протестираат против Хамас и повикуваат на прекин на војната.

Стотици демонстранти протестираа против Хамас во Кан Јунис, на југот од Појасот Газа

„Тајмс од Израел“ објави дека демонстрантите скандираа „Стоп на војната и раселувањето“ и „Хамас надвор“.

Ова е прв протест против Хамас во Кан Јунис по неколку недели. Во последните недели слични спорадични демонстрации се одржаа и во северните делови на Појасот Газа.

Претходно денеска Израелските одбранбени сили (ИДФ) издадоа општа наредба за евакуација за целиот Кан Јунис, наведувајќи дека целата област сега е „борбена зона“./МИА

Тагови: Појасот Газа Хамас
притисни ентер