Обвинителството за гонење на организиран криминал и корупција во декември лани отворило предистрага откако добило известување од МВР за настан од 24.11.2025 година дека од информатичкиот систем во претседателскиот кабинет неовластено биле извлекувани податоци. Обвинителството веднаш од Кривичниот суд побарало наредба за пребарување на компјутерскиот систем како и наредба за екстракција на податоци од персонални и лап топ компјутери доставени до МВР од Кабинетот на Сиљановска. Побарани се и видео снимките од безбедносните камери од Кабинетот, и анализа на екстрахираниот доказен материјал, но досега одговор не добиле.

-Од страна на МВР до денес не се доставени повратни информации, ниту известување за преземени дејствија во врска со обезбедувањето на копиите од видео надзорот. На 16.03.2026 година, МВР достави известување за дел од преземените активности кои се однесуваат на обезбедување пристап до криптираните податоци од дотогаш екстрахираната компјутерска опрема. Воедно, до ОЈО ГОКК беа доставени и два мобилни телефони одземени од пријавениот, со барање за нивна екстракција во Истражниот центар на ОЈО ГОКК, по што веднаш беше издадена соодветна наредба за постапување.- -ОЈО ГОКК.

Велат од Обвинителството од каде додаваат и дека на 25 март до МВР доставиле наредба за анализа на податоците од мобилните телефони и заедничка анализа од податоците екстрахирани од компјутерската опрема, но оттаму досега не добиле никакво известување за резултатите од преземените дејствија.

Од МВР пак тврдат дека веќе постапуваат по две наредби од обвинителството од февруари и март.

-Во тек е анализа на сите електронски докази кои се екстрахирани од одземената опрема. Напоменуваме дека станува збор за поголема количина на електронски доказен материјал за кој е потребен поголем временски период. Анализата е во завршна фаза и во наредниот период целокупниот доказен материјал ќе биде доставен до ОЈО за ГОКК. – МВР.

До ОЈО ГООК пристигнала и пријава потпишана од „група вработени во МВР“, со која под сомнение е ИТ-администратор во Кабинетот на претседателката, кој наводно копирал, енкриптирал и складирал доверливи податоци и бил поврзан со разузнавачката служба. Во пријавата се споменуваат и други функционери од Кабинетот и од Агенцијата за разузнавање, за кои имало сомнежи дека можеби учествувале во прикривање на доказите, па дури и високи владини функционери кои наводно ургирале кај претседателката и кај обвинителката да го затворат случајот.

Премиерот Христијан Мицкоски пак вели дека сомнежите за наводна шпионска афера потекнуваат од структури од минатото а паниката ја создал шефот на обвинителството Ислам Абази.

-Тоа се шпионски талог на општеството, структури од минатото, коишто се наоѓале во кабинетите како глодари на некои поранешни политичари, претседатели, премиери и така натаму. И тие се претставуваат како група вработени и испраќаат анонимни дописи до обвинителства. Се разбира, таму е Ислам Абази, веднаш да истрча и да создаде паника во јавноста дека нешто се случувало. изјави – Христијан Мицкоски – Претседател на Влада.

Случајот во ОЈО ГОКК го води обвинителката Катерина Коларевиќ, која овој период е во центарот на вниманието на јавноста за набаваката на Мазут за ЕСМ, а и од Обвинителствоот и од МВР најавуваат информации по расчистување на случајот.

Засега коментар нема ниту од Кабиентот на Претседателката Гордана Сиљановска Давкова..

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.