Ситуацијата со корона во САД се влошува, Ѓоковиќ им се обрати на тенисерите да не одат на US Open

US Оpen е закажан за периодот од 31 август до 13 септември, но со оглед на новиот бран на зарази со коронавирус што ги погоди САД, големо прашање е што ќе се случи со последниот Гренд слем турнир во сезоната.

Во четвртокот имало скоро 55.000 нови заразени, најголемото дневно зголемување, а водечките епидемиолози предупредуваат дека може да има и повеќе од 100 000 нови инфекции на ден во САД доколку не се затегнат безбедносните мерки.

Затоа, тешко може да се очекува дека ќе се одржи УС Опен, и покрај планот на организаторите да ги одиграат натпреварите без гледачи.

Шпанска „Марка“ пишува дека првиот светски тенисер Новак Ѓоковиќ, како претседател на Здружението на играчи, им се обратил на тенисерите на видео состанок и ги предупредил дека во овие околности ќе биде многу тешко да се патува во Соединетите држави за споменатиот турнир.

Ѓоковиќ рече дека проблемот е во тоа што сите тенисери кои се враќаат од Америка во Европа може да завршат во двонеделен карантин, а ден по УС Опен, треба да започне во Мадрид турнирот Мастерс 1000 , а на 27 септември, Ролан Гарос во Париз.

Ѓоковиќ ги советувал сите оние кои веќе резервирале сместување и купиле билети до Соединетите држави да ги замолат организаторите да им ги вратат парите, односно да ги покријат сите трошоци доколку турнирот биде откажан.

Во Крушево ќе се одржи првиот пливачки маратон „Тоше Проески"

Пливачкиот Клуб „Вардар 2018", со поддршка на Општина Крушево, денеска ќе го организира Првиот крушевски маратон кој го носи името на Тоше Проески.

Маратонот ќе се одржи на Крушевското Езеро. Ќе почне во 11 часот, а должината што ќе ја пливаат учесниците е 2,5 километри.

Според објавата на пливачкиот клуб „Вардар 2018", не случајно првиот крушевски пливачки маратон го носи името на нашата музичка ѕвезда Тоше Проески.

-Името го одбравме во чест на нашата легенда Тоше Проески. Ова е нова атракција во Крушево, нова причина многу туристи да дојдат тука. Крушевското Езеро е особено популарно откако се асфалтира патот и секојдневното одржување на патеките за трчање и возење велосипед носи многу луѓе тука, наведува клубот.

Општина Крушево ги поканува сите да дојдат на првиот пливачки маратон.

-Ги покануваме сите да не посетат за манифестацијата научно-културни средби „Десет дена Крушевска Република" и воедно да го проследат овој нов тип на настан во Крушево в недела, велат од Општината.

Течат роковите за нова влада, партиите преговараат, но не соопштуваат детали

Течат роковите за формирање ново парламентарно мнозинтво и нова влада, поради што со засилено темпо се одвиваат преговорите меѓу политичките партии кои освоија пратенички места. 

Сите тврдат дека разговараат, но никој засега не изнесува детали за текот на преговорите и за тоа дали има евентуален напредок.

СДСМ вчера повтори дека води сериозни преговори за формирање на влада со полн четиригодишен мандат, која, како што потенцира, треба да обезбеди прочистување на правосудството и проверка на потеклото на пари и имот на секој функционер.

Новата влада, велат од партијата, посветено ќе се зафати со борба со криминалот и корупцијата на сите нивоа – без разлика дали некој доаѓа од партија, од општина, од институција, дали е експерт, функционер, познат или непознат, а приоритет е прочистување на правосудството.

Портпаролот на ВМРО-ДПМНЕ, Димче Арсовски, пак, вчера истакна дека партијата има комуникација со политичките партии, но оти не би навлегувал во детали да не ги наруши.

-Од она што може да се забележи од претходно што го говорел и претседателот Мицкоски, но и што се постулатите на ВМРО-ДПМНЕ, програмските, економските определби треба да се идентификуваат. Но не би навлагувал во детали за да не наштетам на процесите, рече Арсовски.

Во однос на комуникацијата на ВМРО-ДПМНЕ со останатите партии, според него, забележливи се пријателски односи и комуникација буквално со сите партии.

По конституирањето на Собранието пред пет дена ДПА соопшти дека на средба на нејзиниот лидер Мендух Тачи со Зоран Заев, СДСМ им понудил да бидат дел од новата владина коалиција. Демократската партија на Албанците начелно е согласна да биде дел од Владата, но било договорено да се формираат работни групи кои ќе ги предводат секретарите на двете партии кои треба да се договорат за деталите.

По предвремените парламентарни избори што се одржаа на 15 јуни, на 4 август се конституираше новиот парламентарен состав и почна да тече 10-дневниот рок за формирање парламентарно мнозинство, по што претседателот на државата треба да го додели мандатот за формирање Влада. Мандатарот во рок од 20 дена од денот на доверувањето на мандатот, на Собранието му поднесува програма и го предлага составот на Владата. /МИА

Сообраќајот по влажни коловози, АМСМ препорачува внимателно возење

Сообраќајот на државните патишта се одвива по наместа влажни коловози, со умерен интензитет надвор од градските средини. 

АМСМ препорачува прилагодена брзина на движење, почитување на поставената сообраќајна сигнализација и исклучително внимателно управување со возилата.

Посебно се препорачува внимателно возење низ клисурите каде има можност од појава на одрони и тоа на делниците Катланово – Велес, Маврово – Дебар – Струга, Виница – Берово и Кочани – Делчево.

Според АМСМ, на граничните премини, од македонска страна, нема подолги задржувања за влез и за излез од државата.

На регионалниот патен правец Р2431 Штип – село Аргулица – Плачковица (детско одморалиште), на делот од кракот за село Прналија, 500 метри после аеродромот кон викенд населбата (28050км.), сообраќајот е во прекин поради оштетување на патот во должина од 50 метри На местото е поставена вертикална сигнализација.

притисни ентер