Македонија

Шест странски компании во трка за поставување Интелигентни транспортни системи на Коридор 10

На македонските патишта ќе се користат иновативни решенија за да се подобрат условите за безбедност и да се дигитализира управувањето со сообраќајот.

Ќе се поставуваат Интелигентни транспортни системи (ИТС) а со првичните активности е опфатен Коридорот 10 и веќе се евалуираат понудите од шест странски компании кои конкурираа на тендерот за избор на изведувач.

ИТС системите треба да бидат поставени на 200 километри патишта до крајот на 2027 година. Се очекува да ги унапредат транспортните услуги, да обезбедат информации во реално време за патување, поголема безбедност преку употреба на напредни системи за предупредување и информации за состојбата на патиштата и несреќи во реално време. Исто така и да се намалат и времето на патување и емисиите на штетни гасови.

Национален центар за управување со сообраќај ќе биде одговорен за следење, надзор и управување на сообраќајот и мобилноста на сите државни патишта и за обезбедување информации за корисниците на коридорите во врска со состојбата на патиштата, сообраќајот и патувањата.

Од Министерството за транспорт за МИА ги споделија активностите кои се спроведуваат за да се овозможи имплементацијата на ИТС по должина на Автопатот А1, Коридор 10 од ГП „Табановце“ до ГП „Богородица“.

Конкретно, преземени се активности за изработка на проектна документација за воведување на системи за контрола на тежината на возила при движење (WIM), за контрола на движење на возила кои превезуваат опасен товар (HAZMAT) и за мерење на загадување на воздухот по должина на Автопатот А1 (Е75) - Коридор 10. Исто така и за идејна проектна документација за Националниот центар за управување со сообраќајот (НЦУС), кој треба да биде во рамки на објектот на Јавното претпријатие за државни патишта во Петровец. Дел од активностите е и изработка на проектна документација за неколку информациски системи и апликации во НЦУС како: систем за дистрибуција и управување со видео-материјали, апликации за управување со инциденти на патиштата, моделирање на сообраќајот, анализа на податоци од сообраќајот и веб страница со апликација за НЦУС.

- Обезбедивме Инвестициски грант во износ од 13,5 милиони евра, кој треба да се спроведува во рамки на Програмата за безбеден и одржлив транспорт. Во тек е евалуација за избор за изведувач за поставување на ИТС по должина на Автопатот А1 (Е75) – Коридор 10. Понуди, по однос на овој проект, се доставени од страна на шест кредибилни странски компании. Завршена е евалуацијата за избор на Надзор на поставувањето на ИТС на Автопатот А1 (Е75) – Коридор 10, велат за МИА од Министерството за транспорт.

Оттаму најавуваат дека тендерската постапка за реконструкција и адаптација на објектот за Националниот центар за управување со сообраќајот во Петровец треба да започне во јуни годинава, а работите да се извршат до крајот на август 2027 година.

Според планираната динамика за реализација на сите проектни активности, поставувањето на целокупната опрема за ИТС на скоро 200 километри автопатишта треба да заврши до септември 2027 година. Во овој период треба да се изврши и реконструкција на објектот на ЈПДП во Петровец за да се намени за Национален центар за управување со сообраќајот.

- Со оглед на планираното поставување на ИТС на Коридор 10 и Коридор 8, вклучувајќи ја и делницата на автопатот Миладиновци – Штип, а се со цел да не се создаваат повеќекратни трошоци за изведба на посебен центар за секој дел од Коридорот, се наметна потребата управувањето на сообраќајот на државните патишта да се регулира од еден заеднички центар. Националниот центар за управување со сообраќај ќе биде одговорен за следење, надзор и управување на сообраќајот и мобилноста на сите државни патишта и обезбедување информации за корисниците на Коридорите во врска со состојбата на патиштата, сообраќајот и патувањата, појаснуваат од Министерството за транспорт.

Целата мрежа на државните патишта е поделена на пет региони која ќе биде сервисирана од соодветен стручен кадар. Исто така, од НЦУС треба да се управуваат и сите тунели во државата подолги од 500 метри.

- Се очекува воведувањето на ИТС да доведе до зголемување на бројот на туристи кои го користат Коридорот 10 и индиректно да се поттикне локалната економија преку зголемен приход од туристите. Имплементацијата на ИТС ќе придонесе за економски развој на поширокиот регион и промоција на одржлив и безбеден транспорт и трговија, ефикасност во управувањето и одржувањето со патиштата. Овој проект ќе го поттикне транспортот, туризмот и трговската размена на стоки и услуги меѓу сите земји по должина на Коридорот 10, посочуваат од Министерството за транспорт.

Нагласуваат дека најважните придобивки се наменети за возачите и корисниците на автопатот во насока на унапредување на транспортните услуги, информации во реално време за патување, поголема безбедност преку употреба на напредни системи за предупредување и информации за состојбата на патиштата и несреќи во реално време, намалување на време на патување и намалени емисии на штетни гасови.

Имплементацијата на ИТС на Коридорот 10 во должина од 172 километри вклучувајќи го и делот од Коридорот 8 (делниците Миладиновци – Хиподром и Хиподром – Петровец, во должина од 25 км), опфаќа поставување на неколку напредни системи и опрема. Ќе се поставуваат светлосна сигнализација: неколку видови на знаци со променливи пораки и знаци со динамички приказ на информации; автоматски метеоролошки станици; опрема за снимање, обработка и анализа на видео-податоци: видео камери (CCTV), дистрибутивен систем, автоматски систем за видео детекција на инциденти: сопрено возило, сообраќајна незгода, пешаци, итн., систем за анализа на брзина на возила, броење и класификација на возила, мерење на висина на возила, систем за видео управување; уреди за контрола и управување на опремата и локалната комуникациска мрежа; потпорни конструкции (челични конструкции за опремата за знаци со променливи пораки, камери и метеоролошки станици).

Дел од тој пакет се и реконструкцијата на постоечкиот објект на Центарот за управување на сообраќајот Петровец со преминување НЦУС, оперативен центар, хардверска и софтверска опрема, напреден систем за управување со сообраќајот, како и Центар за контрола на сообраќајот Неготино – хардверска и софтверска опрема.

Од Министерството за транспорт појаснуваат дека имплементација на интелигентни транспортни системи стандардно вклучува употреба на повеќе иновативни решенија првенствено за подобрување на условите за безбедност на патиштата и дигитализација на управувањето со сообраќајот. Во наредните години, укажуваат, транспортната политика на Европската Унија е насочена кон имплементација на иновации за унапредување на безбедноста на транспортот и сообраќајот, чист и одржлив транспорт, интелигентни транспортни решенија и отпорност на патната мрежа кон климатските промени, дигитализација и управување со сообраќајот.

Транспортната политика опфаќа и транспортни истражувања и иновации, логистика и мултимодални решенија во транспорт, а посебно се нагласува потребата за поврзување на национални центри за управување со сообраќај и итни случаи и обезбедување на информации за сообраќај во реално време за што поголем број на корисници на патната мрежа, како во рамките на Европската Унија така и кај нас во земјите на Западен Балкан.

За поставување на паневропските коридори Собранието во декември, лани усвои измени на Законот за јавни патишта. Со нив се имплементираат одредбите од Директива 2010/40/ЕУ, со која се предвидуваат правила за распоредување на интелигентни транспортни системи во патниот транспорт. Целта на таа Директива е да го поттикне развојот на иновативни транспортни технологии за создавање интелигентни транспортни системи (ИТС).

На крајот на декември, лани, министерката за финансии Гордана Димитриеска-Кочоска и директорката на Светска банка за земјава Карол Межеван го потпишаа Договорот за грант помеѓу РС Македонија и СБ, со кој се обезбедија 13,56 милиони евра - дополнителни средства во рамки на Проектот за олеснување на трговијата и транспортот на Западен Балкан. Средствата се наменети за ИТС од Табановце до јужната клучка Велес, што вклучува и поддршка за воспоставување и опремување на националниот центар за управување со сообраќајот со потребните ИТС системски решенија за Коридорот 8 и Коридорот 10, вклучително и за кракот 10д.

Паралелно со активностите кај нас, се имплементираат интелигентни транспортни системи на Коридор 10 и во Република Србија во рамки на истиот проект на Светска Банка. Со тоа примената на делот од ГП Табановце до ГП Богородица ќе биде надополнување и продолжување на ИТС за сите корисници на тој коридор. /МИА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Судбина

Родители од пеколот: Ја силувале својата 11 годишна ќерка, па му ја дале на постар маж од БиХ да ја силува за да го исплатат долгот

Брачен пар од Рот ам Зе (округ Швебис Хол) во Германија е осуден на долги затворски казни од Регионалниот суд во Елванген за сериозно сексуално злоставување и силување на сопствената ќерка.

Судскиот совет го осуди 45-годишниот татко на 11 години и шест месеци затвор, додека неговата 41-годишна сопруга доби казна од девет години и шест месеци, пишува Nezavisne.com.

Во овој случај учествувал и нивниот семеен пријател, 54-годишен маж со двојно државјанство на Босна и Херцеговина и Хрватска, кој моментално е во бегство. По него е издадена меѓународна потерница. Според обвинението, германскиот пар му ја дал својата ќерка на овој маж, третирајќи ја како предмет на сексуална експлоатација.

Девојчето ѝ се доверило на својата наставничка

Според обвинението, родителите постојано ја принудувале нивната тогаш 11-годишна ќерка на сексуални односи во период од повеќе од една година. Подоцна, се сомнева дека нивниот семеен пријател, по потекло од Босна и Херцеговина, кој има и хрватско државјанство, исто така се придружил на злоставувањето.

Во обвинението се наведува и дека родителите му се заканувале на девојчето со електрошокови за да ја принудат да молчи. Истражителите се сомневаат дека таткото имал значителни долгови кон 54-годишниот познаник.

Случајот стана јавен откако девојчето ѝ кажала на својата наставничка за сè, која веднаш ја известила надлежната служба за заштита на деца и млади, која од февруари се грижи за девојчето, кое сега има 13 години. За време на судската постапка, родителите го искористиле своето право да не презентираат одбрана.

Контроверзната судска одлука предизвика вџашеност

За време на постапката, одлуката на судечкиот совет да ги ослободи обвинетите од притвор во јули привлече особено внимание. Во тоа време, судот процени дека нема доволно основа за итно сомневање дека сториле кривични дела, што е еден од условите за наредба за притвор.

Портпаролот на судот објасни дека во тој момент постоела можност обвинетите да бидат осудени, но дека нивната вина сè уште не била сигурна. Девојчето сè уште не било сослушано, а бидејќи родителите одбиле да се изјаснат за обвиненијата, судот се нашол во ситуација каде што имало две спротивставени верзии за настаните.

Сепак, Вишиот регионален суд во Штутгарт не се согласил со оваа проценка. Во август, повторно ја активираше потерницата за таткото и семејниот пријател. Сепак, дотогаш веќе беше предоцна да се спречи бегството на 54-годишникот, кој го искористил периодот на слобода за да ја напушти земјата.

Според властите, бегалецот најверојатно е некаде во Источна Европа. Портпаролот на судот потврди дека мажот, покрај хрватското, има и државјанство на Босна и Херцеговина, што би можело да го комплицира процесот на екстрадиција.

Таткото веќе бил осудуван

Судскиот совет ги отфрли тврдењата дека имало сериозна грешка во правдата за време на постапката. Судот рече дека одлуките се донесени врз основа на доказите и информациите што им биле достапни во тоа време.

Таткото веќе отслужувал затворска казна во Северна Рајна-Вестфалија за обид за измама. Претходно бил осуден и за дистрибуција на порнографски материјал.

За разлика од него, мајката била уапсена дури минатата недела. Една од клучните причини за проценката дека постои ризик од нејзино бегство беше психолошката експертска проценка на сведочењето на девојчето, која судот ја оцени како особено значајна.

Во случаите на сексуална злоупотреба, експертската анализа на сведочењето на жртвата игра важна улога во утврдувањето на фактите и донесувањето судска одлука. За време на сослушувањето, 13-годишното девојче го даде своето сведочење за насилството што го претрпела преку видео-снимка. Снимката, како и наодите и мислењето на вештакот, беа дискутирани на затворена седница, без присуство на јавноста.

Сомнителни финансиски трансакции на двојката

Дополнително, против мајката се води посебна постапка поради сомнение за злоупотреба на хуманитарни донации. Според истрагата, таа собрала пари преку платформата GoFundMe, презентирајќи им лажни информации на донаторите.

Надлежните органи истражуваат и сомнителни финансиски трансакции на банкарските сметки на двојката. Банките пријавиле сомневања за можно перење пари до надлежните институции. Според досегашните сознанија на истражителите, 54-годишен маж кој е во бегство бил исто така вмешан во спорните финансиски трансакции.

Тагови: ќерка родители

Бизарно

Пијан ракун, кој го насмеа светот, помогна да се соберат 290.000 долари (ВИДЕО)

Ракун кој минатата година провалил во продавница за алкохол во американската држава Вирџинија, испил неколку шишиња алкохол и заспал покрај тоалетот, му помогнал на локалното засолниште за животни.

Ракун кој минатата година провалил во продавница за алкохол во американската држава Вирџинија, испил неколку шишиња алкохол и заспал покрај тоалетот, му помогнал на локалното засолниште за животни да собере повеќе од 290.000 долари, објави Засолништето за животни во округот Хановер, објави АП.

Ракунот стана глобална медиумска сензација откако менаџерот на продавницата го пронашол во несвест покрај тоалетот неколку часа по провалата.

Засолништето купува камери

Животното се опоравило и било пуштено во дивината, на околу една милја од продавницата во Ашланд.

Неговата авантура инспирирала скеч во емисијата „Saturday Night Live“, а Засолништето за животни во округот Хановер ја искористило неговата популарност за да собере пари со продажба на маици, дуксери со качулки, капи, шолји и налепници со зашеметениот ракун.

Производите го носат слоганот „Wacky Panda“, додека се создадени тематски колекции за лето и Ноќта на вештерките.

Директорот за заштита на животните во округот Хановер, Џефри Паркер, рече дека собраниот износ е многу пати поголем од вообичаените годишни донации на засолништето, кои обично не надминуваат 20.000 долари.

Дел од парите ќе бидат искористени за купување камери за тело што ги носат осум службеници за заштита на животните.

Камерите ќе им овозможат да собираат докази во случаи на злоупотреба на животни, како и да ги документираат постапките на службениците за време на интервенциите.

Проба алкохол од повеќе шишиња

Локалната самоуправа едногласно го одобри купувањето на камерите на 28 октомври, а се очекува службениците да почнат да ги користат околу јануари.

Паркер рече дека сака дел од преостанатите пари да се издвојат за фонд за финансирање на третманот на повредени животни пронајдени за време на интервенциите.

„Не знам кога некогаш сме му должеле на животно толку голема благодарност како што му должиме на овој ракун“, рече членката на локалната самоуправа Феј Причард.

Ракунот се скрши и веројатно вкусил алкохол од неколку шишиња во продавницата, вклучувајќи рум, виски, вотка и други жестоки пијалоци.

Откако беше пуштен во дивината минатиот ноември, контролата на животните не добила ниту еден извештај за друга провала на ракун, рече Паркер, изразувајќи надеж дека животното сега живее мирен живот.

Продажбата на сувенири сè уште е во тек, а за да се одбележи годишнината од необичната провала, во продажба се појавија нови маички со слоганот: „Една лоша ноќ. Многу добри дела“.

Тагови: ракун

Свет

Иран откри што планира со збогатениот ураниум- на Трамп нема да му се допадне

Иран нема да дозволи ниту една честичка збогатен нуклеарен материјал да ја напушти земјата, а во случај на нови напади на САД врз Исламската Република, ќе има последици, изјави шефот на иранската безбедност Мохсен Резаи во телевизиско обраќање.

Резаи зборуваше за либанската телевизиска станица Ал Мајадин, која е блиску до Иран, откако американските претставници ја намалија потребата од дополнителни воени дејствија против Иран.

Аналитичарите посочија на помирувачкиот тон на американскиот претседател Доналд Трамп по поразот на републиканците на изборите за Конгресот во САД одржани на 3 ноември.

Резаи рече дека во моментов нема преговори меѓу Техеран и Вашингтон.

„Ќе одговориме на секој нов напад на САД со таргетирање на американските бази далеку од нас“, рече тој.

Врховниот лидер на Иран издаде директива со која наредува иранскиот ураниум збогатен на нивоа блиски до оние потребни за производство на нуклеарно оружје да не може да се испраќа во странство, изјавија двајца високи ирански претставници во мај.

„Ни треба збогатен материјал за дизајнирање бродови и подморници на нуклеарен погон“, рече Резаи, додавајќи дека Техеран ја информирал Москва дека неговиот збогатен нуклеарен материјал ќе остане во земјата и „ќе го користиме ние самите“.

Iran will not allow enriched nuclear material to leave the country, security chief says https://t.co/d1tf2XHDry
— Reuters (@Reuters) November 11, 2026

Русија претходно понуди да зема збогатен ураниум од Иран како дел од потенцијален договор за ублажување на загриженоста на САД, но рече дека Техеран е тој што треба да одлучи дали да го отстрани од земјата.

Меѓународната агенција за атомска енергија (МААЕ) проценува дека Иран имал 440,9 килограми ураниум збогатен до 60 проценти - ниво далеку над она што било потребно за цивилна употреба кога Израел и САД ги нападнаа иранските нуклеарни објекти во јуни 2025 година. Не е познато колку од тој материјал ги преживеал нападите.

Израел, САД и другите западни земји долго време го обвинуваат Иран дека се обидува да произведе нуклеарно оружје. Иран ги негира обвинувањата.

Вашингтон изјави дека нуклеарните прашања мора да бидат дел од сите почетни разговори со Иран насочени кон прекин на војната меѓу двете земји. Иран достави нуклеарен предлог до САД, преку Катар, кој ќе се дискутира дури откако Вашингтон ќе исполни седум барања што ги постави Техеран, изјави висок ирански функционер за Ројтерс минатата недела.

Тагови: збогатен ураниум Иран