Македонија

Секој трет тендер без конкуренција: За јавни набавки со една фирма потрошени над 400 мил. евра

Цути ли корупцијата во тендерските постапки за јавните набавки? 

Извештајот на Центарот за граѓански комуникации покажува дека секој трет договор за јавна набавка минатата година бил склучен во постапка во која учествувала само една фирма, а на ваков начин се склучени 9.305 договори во вкупна вредност од 427 милиони евра. Просечно лани имало по три понуди на тендер, што укажува на намалување на конкуренцијата во однос на 2021, а дури 90 % од мониторираните постапки се спроведени со задоцнување, без почитување на роковите.

- Ова укажува на трендови на дискриминација кои можат да бидат направени или преку тендерските документации и техничките спецификации кои се користат или, пак, преку дискриминаторскиот однос на самите институции кои ги спроведувале овие набавки. И ризикот во однос на овие договори е тоа што со право постои сомнеж дека вредноста со која се склучени, односно цените на купените производи, услуги или градежните работи се можеби повисоки од пазарните, бидејќи од нив отсуствувала конкуренцијата, вели за Канал 5, Сабина Факиќ од ЦГК.

Во 2022 година биле поништени 31 процент од тендерите што фрла сомнеж врз објективноста и законитоста во донесувањето на овие одлуки, нотираат од ЦГК. Од институциите, најголем број поништени тендери има АД Електрани, 230 тендерски постапки од вкупно спроведените 582 тендери. На второ место и трето место се МВР и одбрана.

- Една сериозна слабост која е воочена е растот на поништувањата на тендерите што повторно го зголемува ризикот од корупција, бидејќи во ситуации кога секој трет тендер во државата е поништен, постои оправдан сомнеж дека можеби кон поништувањето се прибегнува во оние ситуации кога не може да склучи договорот со фаворизираната фирма, изјави Факиќ. На ризиците од корупција укажува и анкетата која ја спроведовме со фирмите за 2022. Над 40 отсто се изјасниле дека сметаат дека има корупција во јавните набавки, а 18 отсто од нив велат дека лично се соочиле со корупција на тендерите, изјави Факиќ.

За да се спречат ваквите појави, од ЦГК потсетуваат дека Владата, општините и институциите се должни многу потранспарентно да ги изготвуваат тендерските документации а Бирото за јавни набавки да ги зголеми контролите за да спречи договори каде е очигледно дека се фаворизираат одредни фирми.

Свет

Британскиот тинејџер ја призна вината за убиството на трите девојчиња во Саутпорт

 Британски тинејџер денеска се изјасни за виновен за убиство на три девојчиња во северна Англија во јули, злосторство што ја згрози нацијата и предизвика неколкудневни немири.

Аксел Рудакубана (18) го промени своето признание во невин и се изјасни за виновен на првиот ден од судењето во Ливерпул.

Тој призна дека ги избодел Беби Кинг (6), Елси Дот Стенкомб (7) и Алис Дасилва Агиар (9), кои биле на час по танц на тема Тејлор Свифт во Саутпорт.

Во нападот беа повредени уште десет лица, меѓу кои осум деца.

Рудакубана се изјасни за виновен по десет точки од обвинението за обид за убиство, како и за производство на смртоносниот отров рицин и поседување на прирачник за обука на Ал Каеда.

Пресудата се очекува в четврток.

Фудбал

Тренерот на Порто доби отказ по само шест месеци на позицијата

Порто го отпушти тренерот Витор Бруно, објави португалскиот клуб по двата порази од Национал и Жил Висенте, а двократниот освојувач на Лигата на шампионите е трет во табелата во локалната лига по 18 натпревари.

Бруно беше назначен во јуни 2024 година, потпишувајќи двегодишен договор, кога го замени Серхио Консеиао, кој си замина по седум сезони во кои освои 11 титули, вклучувајќи три титули во португалската лига.

Односот на Бруно со играчите се влоши откако Порто испадна од Лига купот по поразот од Спортинг со 1-0 во полуфиналето, а играчот од средниот ред, Пепе го критикуваше тренерот на социјалните мрежи.

Порто, една од 32-те екипи кои се квалификуваа за проширеното Светско клупско првенство во 2025 година, што ќе се одржи во САД од 15 јуни до 13 јули, ќе се соочи со Олимпијакос во четврток во натпревар од Лигата на Европа.

Свет

Украина планира советувалишта за бегалците кои сакаат да се вратат дома

 Украина сака да ги зголеми напорите да ги убеди бегалците во Германија да се вратат, а украинската влада планира советувалишта за бегалците кои сакаат да се вратат во Украина, изјави денеска украинскиот вицепремиер, Олексеј Чернишов.

-Голем број бегалци во Германија сериозно планираат да се вратат во Украина и ние мора да им помогнеме во тоа, изјави Олексеј Чернишов за германските медиуми.

Чернишов, кој го предводи новоформираното Министерство за враќање на бегалците, минатата недела беше во Берлин подготвувајќи се да изгради центри каде што украинските бегалци во Германија би можеле да добијат совети и помош при враќањето во Украина.

Тој објасни дека Украина страда од недостиг од војници, како и од работна сила во важни сектори. „Ситуацијата е особено критична во енергетскиот сектор, воената индустрија и градежништвото“, рече Чернишов.

Тој им рече на регрутите дека ќе бидат ослободени од воена служба доколку се стават на располагање на еден од секторите со дефицит. „Секој што работи во електраната нема да биде регрутиран. Тоа е загарантирано“, изјави украинскиот вицепремиер.

Според него, центрите ќе даваат поддршка и за оние кои не сакаат да се вратат во Украина, а се невработени во Германија.

Од почетокот на руската агресија врз оваа земја во Германија пристигнале 1,1 милион бегалци од Украина.

Неодамна во Германија се засили дебатата за нивниот статус. Водечката Христијанско-демократска унија ЦДУ/ЦСУ постојано бараше да се намали државната помош за украинските бегалци.

притисни ентер