Ова следува по кривичната пријава која што МВР ја поднесе против десет полициски службеници за незаконито наплатување средства од државниот Буџет. Тошковски ги охрабри истражувачките новинари да откриваат злоупотреби во однос на патните трошоци и кај пратениците и потенцираше дека законот мора да важи еднакво за сите.

-Поднесена е кривична пријава против десет полициски службеници за злоупотреба на патни трошоци. Во таа постапка има докази кои што потврдуваат на степен на основи на сомнение дека полициските службеници незаконито наплатувале средства од парите на македонските граѓани, од буџетот на Македонија. Заради тоа е поднесена кривичната постапка која што е поднесена од страна на Одделот за внатрешна контрола како и во сите останати случаи каде што ќе утврдиме дека криминалците во редовите на МВР наместо да ги штитат македонските граѓани, тие ги крадат и за секој еден ќе поднесеме кривична пријава без оглед дали во јавноста има информации дека истиот бил близок со едни, други, трети и четврти, рече министерот во изјава за медиуми по јавната дебата по повод Неделата на пешаците што се одржа во Идризово.

Во врска со прашањето за патните трошоци на пратениците, односно фактот што земаат патни трошоци и покрај тоа што во имотните листови имаат станови во Скопје, тој нагласи дека законот мора да важи еднакво за сите.

- Јас ве охрабрувам како истражувачко новинарство да најдете злоупотреби во рамките на ова што го наведувате дека злоупотребиле одредени законски одредби и овластувања кои што ги дава законот. Јас ве уверувам дека, како и во сите останати предмети каде што ние сме нашле докази, или, претходно биле најдени од страна на новинарите па биле процесуирани до нас па сме успеале да ги сработиме, сме процесуирале соодветни постапки за секој еден во оваа држава. Правилото дека законот мора да важи еднакво за сите, мора да важи, посочи Тошковски.

Тошковски: За пожарот во Кочани се отвораат многу прашања во јавноста, постапуваме по наредбите од Обвинителството

Истрагата за пожарот во Кочани е во тек и ќе одговара секој еден без оглед дали сторил или не сторил одредено дејствие врз основа на кое што ќе може да се извади причинско последична врска со предметниот кривично-правен настан, посочи денеска министерот за внатрешни работи Панче Тошковски по обраќањето на Јавната дебата по повод Неделата на пешаците во организација на Републичкиот совет за безбедност на сообраќајот на патиштата.

Многу прашања поврзани со овој случај се отвораат во јавноста, нагласи министерот, но сепак, вели во овој момент носител на самата постапка е јавниот обвинител.

– Многу прашања се отвораат во јавноста, но сепак, во овој момент носител на самата постапка е јавниот обвинител. Тој е „dominus litis“ којшто е носител на кривичната постапка. Минстерството за внатрешни работи постапува по сите наредби кои што се дадени од страна на Јавното обвинителство, истражуваме за разлика од претходно кога ниту едно лице не беше приведено, а притоа се загубија повеќе од 70 човечки животи во сите сообраќајни незгоди за кои во минатото не било поднесена ниту кривична пријава од страна на МВР. За разлика од тогаш сега покажуваме неселективна и ефикасна борба, рече Тошковски.

Од прес-службата на Јавното обвинителство, претходно информираа дека јавните обвинители од тимот кој ја води предистражната постапка за пожарот во дискотеката „Пулс“ во Кочани во кој животот го загубија 59 лица, а речиси 200 се повредени, континуирано преземаат повеќе истражни дејствија за обезбедување докази.

Вкупниот број на осомничени за пожарот во Кочани досега е 34 лица. Со истрагата се опфатени 27 физички и три правни лица, а истражни постапки има и против седум полициски службеници од СВР Штип и ПСОН Кочани.

Тимот од јавни обвинители кој работи на случајот, како што информира претходно, работи на активности кои вклучуваат распит на повеќе од 300 сведоци, како и други истражни дејствија и соодветни вештачења од повеќе области.