Македонија

СДСМ до владата достави предлог-членови на работни групи, Филков очекува други имиња

СДСМ ги достави до Владата првите предлог-членови за работните групи договорени на средбата Мицкоски-Филипче, но министерот за правда не е задоволен од имињата номинирани за правосудство.

Според него потпретседателката на СДСМ Ана Чупеска и професорката Ана Михајлова Стратилати не може да испорачаат резултати со оглед на тоа што биле дел од експертските тимови за кроење на уставните амандмани пред две години. Очекува од опозиционерите да дадат нови предлог-членови за во неговиот ресор кои потоа би учествувале во пишување на законите од реформската агенда.

„ Сакам да верувам во добрата намера да се помогне и да се учествува во било каков процес, но мораме да бидеме свесни дека со имиња коишто учествувале и биле креатори на проблемите, тешко ќе стасаме до добро решение. Тие две имиња во 2023 беа во групата којашто ги правеше уставните измени, така да се надевам дека ќе имаат посериозен пристап и ќе дадат нови. “--Игор Филков – министер за правда.

Одговор од опозициската партија дали ќе дадат нови предлози засега нема. Инаку, покрај Чупеска и Стратилати за правосудство, СДСМ ги предложи и Виктор Андонов, Славе Ивановски и Симон Узунов за членови на работната група за енергетика. Кога ќе почнат со работа, се уште не е познато, но според најавите, овие две области се приоритетни, бидејќи се работи за закони кои ЕУ бара од земјава да бидат усвоени до крајот на јуни.

Живот

Серена Вилијамс: Доколку јас бев на местото на Синер ќе ме казнеа 20 години

„Го сакам тој човек, ја сакам оваа игра“, изјави за магазинот Тајм легендарната Вилијамс.

Легендарната американска тенисерка Серена Вилијамс рече дека сигурно би добила 20 годишна суспензија и одземање на сите освоени грен слем титули доколку би била позитивна на допинг тест како во случајот со светскиот рекет број еден Јаник Синер минатата година.

Синер прифати тримесечна забрана во февруари по договорот со Светската антидопинг агенција, која ја оспори одлуката на независен суд да го ослободи од вината по двата позитивни теста за анаболниот агенс клостебол.

„Го сакам тој човек, ја сакам оваа игра“, изјави за магазинот Тајм легендарната Вилијамс, која се пензионираше во 2022 година откако освои 23 грен слем трофеи.

„Синер е одличен за овој спорт, потребен му е на машкиот тенис. Но, да го направев тоа јас, ќе добиев 20-годишна казна“, додаде таа.

Синер, чија забрана истекува на 4 мај, отсекогаш тврди дека е виновен, иако неговиот случај иницира прашања за тоа дали добил повластен третман од спортските федерации./МИА

Тагови: Серена Вилијамс

Фудбал

Медиуми: Анчелоти го напушта Реал, ќе биде селектор на Бразил

Се очекува тренерот на Реал Мадрид, Карло Анчелоти да ја напушти клупата на шпанскиот гигант по финалето на Купот на кралот, што ќе се одигра на 26 април против Барселона во Севиља, дознава „Скај Спорт“.

Анчелоти дополнително ги подгреа сомнежите околу неговата иднина во Реал вчерашната елиминација од Арсенал во четвртфиналето во Лигата на шампиони.

Според „Скај Спорт“, 65-годишниот италијански стратег ќе остане на клупата на Реал до финалето на домашниот Куп, но се очекува потоа да го напушти клубот.

Анчелоти сè почесто се споменува и како најсериозен кандидат за нов селектор на Бразил, а оваа вест би можела и официјално да биде потврдена пред крајот на сезоната.

Фото: ЕПА

Тагови: Бразил Карло Анчелоти Реал Мадрид

Свет

Нетанјаху: Израел нема да дозволи Иран да развие нуклеарно оружје

Израелскиот премиер Бенјамин Нетанјаху денеска изјави дека Израел нема да дозволи Иран да развие нуклеарно оружје, прецизирајќи дека извршил безброј „отворени и прикриени“ акции кои ја уназадиле иранската нуклеарна програма за „речиси една деценија“.

Ова е прва изјава на Нетанјаху за Иран откако администрацијата на американскиот претседател Доналд Трамп ги почна преговорите со Техеран во обид да склучи нов ирански нуклеарен договор.

- Како што многупати изјави премиерот – Израел нема да дозволи Иран да се здобие со нуклеарно оружје, се вели во соопштението од кабинетот на Нетанјаху.

- Премиерот предводеше безброј акции, отворени и прикриени, во борбата против иранската нуклеарна програма, без која Иран денес би имал нуклеарен арсенал. Тие акции ја вратија иранската нуклеарна програма речиси една деценија назад, се додава во соопштението.

Западните земји, предводени од САД, се сомневаат дека Иран сака да се здобие со нуклеарно оружје. Техеран ги отфрла тие обвинувања и го брани правото на нуклеарна енергија за цивилни цели, особено за енергија.

Иран и САД, кои немаат дипломатски односи од 1980 година, минатата сабота ги одржаа првите разговори, со посредство на властите во Оман, за иранската нуклеарна програма.

Втората средба на официјалните претставници на двете земји е закажана за в сабота во Рим./МИА

Тагови: Бенјамин Нетанјаху Иран