Како во приказната на Андерсен „Царот е гол“, денес е јасно дека премиерот Христијан Мицкоски, познат како „малиот Вучиќ“, поради слепото копирање на авторитарните методи на Александар Вучиќ, го разоткри вистинското лице на владата на Македонија, која ја претставува тендер коалицијата ВМРО-ЗНАМ.

Мицкоски не е самостоен лидер, туку марионета под директно влијание од Белград, што ја доведува нашата земја во опасност од регрес и изолација од Европа.

Ова не е само наше обвинување, тоа го потврдуваат бројни извештаи и статии од европски и меѓународни медиуми.

Од пред два дена сè се промени: апсењето на Николас Мадуро од страна на американските сили, доведе до обвинувања за нарко-тероризам и перење пари.

Вучиќ, кој до вчера го фалеше Трамп, сега директно го напаѓа (лично и преку специјален координиран програм на своите медиуми), нарекувајќи ја акцијата „уништување на меѓународното право“ и закон на „посилниот“, и најавувајќи двојно зголемување на српските воени капацитети за „одбрана“.

Ова доаѓа откако Џаред Кушнер, зетот на Трамп, ја повлече својата фирма „Affinity Partners“ од проектот за изградба на „Trump“ хотели во Белград, поради корупциски скандал, апсења на министри и владини функционери, судски процеси и протести, според пишувањата на американските медиуми „New York Times“ и „The Week“.

Сето ова се случува поради паниката на Вучиќ дека тој може да биде следниот на листата на американски санкции за корупција и криминал.

Американскиот претседател Трамп најавува понатамошни акции во светот, нагласувајќи дека Колумбија е следна на ред поради обвинувања за „кокаински фабрики“ и дрога, предупредувајќи го претседателот Густаво Петро да „внимава на себе“.

Овде не е крајот, очигледно постои некоја подолга листа.

Северна Македонија, Србија и Црна Гора ги чека поставување на нови амбасадори, а се очекува и примена на нова американска политика, против криминал и корупција, со санкции за корумпирани лидери, каде што американски официјални лица истакнуваат проширување на „црната листа“ за политичари и бизнисмени вмешани во корупција и организиран криминал.

Ова е дел од Законот за демократија на Западниот Балкан од декември 2025 година, кој ја критикува корупцијата меѓу клучните лидери во Србија и регионот.

Сè започнува од сликовитиот опис на Србија под Вучиќ како „Венецуела на Европа“, како што го нарече германскиот либерално-конзервативен магазин „Tichys Einblick“ во статија од септември 2025 година.

Во текстот, Србија е прикажана како земја во која корупцијата галопира, независните медиуми се систематски демонтираат, а стратешките суровини (како литиумот) служат како политички штит на режимот.

Авторот на текстот истакнува дека Вучиќ ја користи моќта за да ги уништува критичарите, да ги контролира медиумите и да одржува авторитарен систем, со примери како забрана на независни медиумски канали и обвинувања за корупција во инфраструктурата.

Оваа слика на Србија е огледало на она што се случува во Македонија под коалицијата ВМРО-ЗНАМ и копирањето на моделот што води во пропаст.

Оваа врска се манифестира преку бизнис и корупциски врски меѓу СНС (партијата на Вучиќ) и ВМРО-ДПМНЕ (партијата на Мицкоски).

Пример е влегувањето на српската Алта Банка на македонскиот пазар, која е директно поврзана со СНС на Вучиќ.

Според пишувањата на медиумите, Алта Банка, сопственикот Давор Мацура (близок до Вучиќ), е обвинета за перење пари од корупциски шеми во Србија, а нејзиното влегување во Македонија (превземање на Стопанска Банка АД Битола) е овозможено само неколку месеци по доаѓањето на власт на коалицијата ВМРО-ЗНАМ.

СДСМ јавно обвини дека ова е „банка на Вучиќ“ која стана и банка за бизниси на Мицкоски и ВМРО-ЗНАМ, со сомнежи за потеклото на капиталот и врски со криминалци како Милан Радојчиќ, обвинет за обид да предизвика вооружен конфликт на Косово.

Од вчера, екстрадицијата на Милан Радојчиќ на косовските институции е поставена како услов за понатамошен продолжување на нормализацијата на односите меѓу Србија и Косово.

Ова е дел од поширокото влијание на Вучиќ врз ВМРО и Македонија, каде што „српскиот свет“ (наведен во извештајот на ЕП), како националистички концепт што ЕУ го гледа како закана за стабилноста во регионот, се користи за да се блокираат ЕУ интеграциите на Северна Македонија.

На 7 септември 2025 година, српскиот министер за одбрана Братислав Гашиќ и поранешен директор на БИА, на државната комеморација на Кајмакчалан, во Македонија испрати порака оттаму започнало „враќањето во татковината“, и дека „Капијата на слободата“ низ која српската војска повторно „зачекорила во својата земја“. Немаше никаква официјална државна реакција за оваа изјава.

Според „EUObserver“ од ноември 2024 година, „српскиот свет“ на Вучиќ (копија на „рускиот свет“ на Путин) ја цели Северна Македонија, спречувајќи го нејзиниот напредок кон ЕУ.

„Balkan Insight“ од декември 2025 година истакнува дека ЕУ мора да ја зајакне улогата за да го „скрши“ овој проект и да го ограничи ова влијание во нашата земја.

Мицкоски, под влијание на Вучиќ, покажува дволичност во реакцијата на апсењето на Мадуро: ја поддржува акцијата на САД но истовремено не ја поддржува, тврдејќи дека не е почитувано меѓународното право и дека ова е „опасен преседан“ што го поткопува глобалниот поредок.

Веројатно, како и Вучиќ, се плаши што го чека, токму поради неговиот личен однос со Вучиќ.

Ова е уште еден доказ за неговата зависност од Белград, каде што ги копира ставовите на Вучиќ за да избегне притисок од Вашингтон.

Актуелниот случај „мигранти за пари“ покажува колку е ова опасно. Тие се подготвени на сè, за да ја зачуваат власта, па не бегаат ниту од преземање на мигранти што трајно можат да ги запрат ЕУ интеграциите, но и да доведат до загрозување на безбедноста на граѓаните на Македонија, имајќи предвид на кои лица се однесува овој договор.

Пред сè се мисли на лица со криминална историја. За ова показател е усвоениот предлог за измени на точките од Конвенцијата за човекови права (10 декември), на одредбите на Конвенцијата за депортација на мигранти кои имаат било каква врска со криминал.

За оваа тема, во последниот месец, британските медиуми известуваат за постоење на договор со македонската влада.

По нашите реакции и предлози за усвојување на Резолуција со која би се спречил таков договор, Владата ВМРО-ЗНАМ одговори со донесување на собраниска Резолуција по урнек на Хитлеровиот Декрет од 1933 година, која ја осудува опозицијата за ширење приказни за мигрантите, што всушност е обид да се ограничи слободата на говорот и критиката на сметка на корупцијата и откривањето на криминални дела, со кои се занимава Антикорупцискиот тим на СДСМ.

Оваа резолуција, усвоена со 65 гласа за, претставува директен напад врз демократијата, која веќе е критикувана во ЕУ извештајот за С.Македонија за 2025 година.

За ВМРО да го реализира овој договор, потребно е да се организираат избори и да се добијат уште четири години за имплементација на овој план, кој подразбира обезбедување на престој и работни визи за мигрантите, сместување и обезбедување на вработување со невозможност за депортација од земјата.

Некои земји во регионот официјално започнаа со овој процес, како Албанија.

На ова СДСМ веќе предупреди со детално објаснување на сите претстојни чекори, на кои веќе сега, сведоци се сите граѓани на Македонија.

Ненадејни, ненajавени, блиц - предвремени избори, за да се фати неподготвена опозицијата.

Објаснувањето би било, по моделот на Вучиќ, опозицијата бараше - еве и доби избори, со претходна најава: „опозицијата да внимава што сака - може да се оствари“, алудирајќи на предвремени избори.

Под власта на ВМРО во последните две години, Македонија назадуваше и на листата на „Transparency International“.

Во CPI индексот за 2024 (објавен 2025), паднавме од 76. на 88. место, со оценка од 42 на 40 поени, поради системска корупција и слабо владеење на правото.

Со сите овие елементи започнаа подготовките за изолација на Македонија, во случај на воведување црни листи и санкции за членови на владејачката коалиција, од страна на Американската влада.

Една од работите што паралелно се случува се и предизвикувањата на намерен конфликт со Бугарија и со тоа оправдување за да не продолжат преговорите, со објаснување за постоење на уцени од ЕУ членки, а целта е да се запрат ЕУ интеграциите.

Владата дури и одбива разговори на оваа тема, блокирајќи ги ЕУ преговорите, за да го одржи националистичкиот наратив, потребен за кампањата, а под дополнително влијание од Белград.

Владата не само што не го решава проблемот, туку го продлабочува со повторно отворање на тема за македонскиот јазик и со изјави за лажни проблеми, кои вчера ги демантираше и Министерството за надворешни работи на Бугарија.

Документот што требаше да биде технички чекор напред, прерасна во нов политички судир.

Втор конфликт што се создава со иста намера за кампања се случи само пред неполн месец, по изјавата на Мицкоски дека веќе е вртено старото име, следеа реакции од грчкото Министерство за надворешни работи.

Ова се сите делови од посебна анти-ЕУ кампања која има за цел да предизвика негативна реакција кај граѓаните (гласачите) кон Европската унија, со што ВМРО добива олеснителна околност за оправдување на запирањето на процесот на интеграција во европското општество. Сè има подлабока позадина, а тоа е дека оваа владејачка коалиција не смее да дозволи контрола на обвинителството и судовите на Европската унија, туку само на домашното правосудство, кое сега е под нивна целосна контрола, со усвојување на нови Собраниски закони за правосудството и обвинителството, кои ќе бидат уште еден камен на сопнување во отворањето на кластерите.

Идентична работа прави и Вучиќ во Србија, како примерот на намерно дезинформирање на населението за воведување санкции за транспорт на гас од 01 јануари 2026 година, што Европа го демантираше, дури и преку силна реакција (крајот на октомври) на комесарката за проширување Марта Кос, која на изјавите на Вучиќ за санкциите, реагираше дека е „апсолутна лага и дека наместо тоа, ЕУ ја поддржува Србија да ги диверзифицира сите извори на снабдување и да се интегрира во енергетските мрежи на ЕУ.“

Заедно со ова, Вучиќ токму преку Собраниски закон се обидува да го укине Обвинителството за организиран криминал, кое води процеси околу коруптивни активности што доведоа до падот на надстрешницата во Нови Сад и случајот Генералштаб - фалсификување документи за Трамп проектот.

ВМРО постојано ги копира кампањите на СНС од Србија, особено кампањите што започнаа од кога се организирани протестите во Србија, од декември 2024 па до денес. Анти-ЕУ кампања, поделба на општеството (изјави на Мицкоски за секој неистомисленик: „талог на општеството“ и „медиокритети“) и слично.

Колку далеку оди соработката на Мицкоски со Вучиќ? Покажува примерот кога Мицкоски правеше кампања заедно со Вучиќ дури и со настраданите во Кочани, кога со камери влегоа во одделението за интензивна нега, каде што не смее да влезе никој што не е во стерилна опрема кај луѓе со такви изгореници. Вучиќ ги злоупотреби повредените што лежеа во Србија за својата кампања, доведувајќи ги во опасност, само за да покаже како тој се грижи за настраданите. Затоа што имаше протести поради настрешницата во Нови Сад. А Мицкоски копирајќи го него ги загрози луѓето на интензивна нега во Македонија само заради заедничката кампања со Вучиќ. Copy-paste сценарио.

СДСМ предупредува веќе подолг период за„copy-paste“ тактиките на ВМРО: користење на одредени медиуми кои ги има под своја контрола за кампањи против опозицијата, слично на она што СНС го прави против демонстрантите во Србија, според извештаите на многубројни светски и регионални медиуми.

Директното влијание на ВМРО врз поединечни медиуми се очигледни, според извештајот на „Freedom House“ за 2025 година, измените на Законот за аудиовизуелни медиуми кои овозможуваат државни реклами во приватни медиуми доведува до политичко влијание.

„Shadow report“ од јуни 2025 година открива дека преку 10 милиони евра се потрошени на политичка пропаганда.

Исто така, фабрикување лажни вести, вклучително „deepfakes“ против опозицијата, е документирано во „Balkan Insight“ од септември 2025 година.

„Reporters Without Borders“ нè рангира на 42. место во „World Press Freedom Index“ 2025 година, со предупредувања за притисоци врз новинарите од власта на ВМРО.

Дополнително, ситуацијата околу Вучиќ се влошува и на судски процеси во Црна Гора, каде што се споменува тој, неговиот брат Андреј Вучиќ и поранешниот министер за полиција Небојша Стефановиќ во врска со организиран криминал.

Според New York Times, во текстот под наслов: „Претседателот, фудбалските хулигани и подземјето - ‘Куќа на ужасот’“ Вучиќ е поврзан со шефот на криминалната група Вељко Беливук. На затворени судски сослушувања, Беливук и неговата група признаа дека работеле за државата. За страшните случувања поврзани со оваа група, пишуваа многубројни медиуми.

Sky преписки (заштитена комуникација), објавени во медиуми како „Vijesti“, откриваат комуникации на трговци со дрога кои го споменуваат „Оскар“ како организатор на криминалната група, а Вучиќ негира дека тоа е тој, додека медиумите претпоставуваат дека се работи токму за него.

Целата ситуација кулминира со Трамповиот закон за Западниот Балкан, потпишан во декември 2025 година, кој воведува санкции за корумпирани лидери и дестабилизирачки актери.

Законот, според пишувањата на „Serbian Times“ и „EUAlive“, ја критикува Србија за нефер избори и корупција меѓу лидерите.

Ова е јасна порака: корупцијата и криминалот на Балканот, вклучително врските меѓу ВМРО и СНС, нема да бидат толерирани.

Мицкоски и неговиот „модел на Вучиќ“ нè водат во изолација, како што тоа сега може во секој момент да ѝ се случи на Србија.

Време е да се разбудиме и да се вратиме на патот на демократијата и ЕУ.

СДСМ повикува на единство против политиката на режимот ВМРО-ЗНАМ, која е насочена кон изолација на Македонија и дистанцирање од влијанието на Александар Вучиќ, режим кој нашата земја ја турка во пропаст, само за да ја зачува својата власт и личната безбедност, надвор од досегот на правдата.

Не смееме да дозволиме, ниту на нашите деца, да се вратиме во темнината што ја живеевме под Никола Груевски и Сашо Мијалков само пред 10 години.

Борбата за слободна, демократска и европска Македонија започна!

Не ни треба еден лидер, ни треба систем!

Царот е гол!

Време е да го симнеме од престолот!

Скопје, 06.01.2026

СДСМ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.