Ова е прв пат од 2 мај Русија да има помалку од 10,000 заразени за 24 часа. Оперативниот штаб против коронавирус соопшти дека 93 лица починале во текот на ноќта.
Од почетокот на епидемијата во Русија, заразени се 252.245 лица, закрепнати се повеќе од 53.000, а починале 2.305 лица.
Рускиот претседател Владимир Путин во вторникот го укина карантинот прогласен на национално ниво против коронавирусот и покрај порастот на бројот на заразени.
Сепак, тој им даде на регионалните лидери сами да решат дали да ги продолжат карантинските мерки на локално ниво.
Главниот град Москва и околниот регион, каде се регистрирани повеќето од заразените, остануваат во карантин до крајот на овој месец.
Скоро половина од заразените се во Москва, а градоначалникот Сергеј Собјанин минатата недела изјави дека вистинскиот број на заразени во градот е веројатно три пати поголем.
Путин истакна дека брзиот раст на бројот на заразени е главно резултат на повисоката стапка на тестирање.
Портпаролот на Путин, Дмитриј Песков, во вторникот објави дека е позитивен за коронавирус и дека се лекува во болница. Тој додаде дека последен пат го сретнал Путин во живо пред еден месец, јавуваат руските медиуми.
Песков е последен во низата високи руски функционери кои се заразени со коронавирус. Пред него се заразија премиерот Михаил Мишустин и министрите за култура и градежништво Олга Љубимова и Владимир Јакушев.