Падот на резултатите започна уште пред избувнувањето на пандемијата на коронавирусот, која го наруши образованието, и продолжува до ден-денес.

Постоеше надеж дека до 2024 година, кога беа спроведени последните тестови на американските ученици, ќе има знаци на закрепнување. Наместо тоа, резултатите се најновата потврда за широко распространетите предизвици со кои се соочуваат американските училишта и ученици, пишува „Вашингтон пост“.

Стабилни резултати кај најдобрите ученици

Просечните резултати паднаа на најниско ниво откако беа спроведени сегашните верзии на тие тестови, и по математика и по читање, а истото се случи и со резултатите на учениците со најниски постигнувања. Само учениците на самиот врв покажаа стабилни резултати.

Рекордно високи 45 проценти од матурантите по математика постигнаа „под основното ниво“. Оние на основно ниво, на пример, треба да можат да „применат статистичко расудување во организирањето и презентирањето на податоци и во читањето табели и графикони“. Ова значи дека речиси половина од матурантите го завршиле средното образование без овие и други вештини.

Речиси 30 проценти од матурантите во средно училиште биле под основното ниво на читање, што е исто така рекорд. Најмалку успешните ученици забележале просечен резултат од 224, што е за 25 поени пониско од резултатите постигнати од нивните врсници во 1992 година.

„Резултатите се на историски ниски нивоа, а падовите што започнаа пред повеќе од една деценија продолжуваат. Мојот претходник предупреди за овој тренд, а и неговиот претходник предупреди за тоа, а сега и јас предупредувам за овој тренд“, рече Метју Солднер, вршител на должноста директор на Одделот за образовни науки, истражување и податоци на Министерството за образование.

Податоците се репрезентативни за целата земја

Тој рече дека овие резултати значат дека само околу 30 проценти од матурантите во средно училиште се способни да постигнат успех на колеџ ниво по математика и читање. Тестовите беа спроведени од јануари до март 2024 година во јавни и приватни училишта и се репрезентативни за нацијата како целина.

Триесет и пет проценти од средношколците постигнале „напреден/вешт“ резултат во читањето, а 22 проценти биле на „вешт“ ниво по математика - стандарди кои често се потешки за достигнување од оние на државните тестови, но претставуваат она што истражувачите веруваат дека учениците треба да го знаат до моментот кога ќе завршат средно училиште.

Федералните службеници не се обиделе да ги објаснат причините за овие резултати или трендовите. Солднер, на пример, рече дека не е сигурен дали резултатите на средношколците се намалиле во споредба со историските нивоа бидејќи помалку ученици се откажуваат од училиште, што би значело дека има повеќе ученици со ниски постигнувања во тестираната група.

Сепак, администрацијата на Трамп честопати ги посочува таквите податоци од тестовите како доказ дека образовниот систем не успева и ги нуди како доказ дека Министерството за образование треба да се укине. Извршната наредба од март со која се бара затворање на министерството конкретно се осврна на податоците од овие тестови.

Поголема контрола за државите

Во соопштението од вторникот, министерката за образование Линда Мекмахон рече дека резултатите „потврдуваат катастрофален тренд“ што се случил „и покрај тоа што милијарди се трошат годишно за бројни програми од градинка до 12-то одделение“: „Затоа претседателот Трамп и јас сме посветени на враќање на контролата врз образованието на државите за да можат да се реформираат и да одговорат на уникатните потреби на секое училиште и секој ученик“.

Администрацијата на Трамп предложи да им се даде на државите поголема контрола врз тоа како ги трошат дел од федералните средства, иако исто така побара од Конгресот да ги намали вкупните трошоци за тие програми. Службениците не дадоа детали за тоа како промената или укинувањето на Министерството за образование би ги подобрило резултатите од тестовите.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.