„Досадно ми е“ – Реченица што ги загрижува родителите, а има друго значење - Канал 5

Живот

„Досадно ми е“ – Реченица што ги загрижува родителите, а има друго значење

Денес, родители на деца од различна возраст, од градинка до адолесценција, најчесто велат: „Не може да биде сам/а без да прави нешто ни пет минути“.

„Досадно ми е“ – Реченица што ги загрижува родителите, а има друго значење

Понекогаш тоа „нешто“ е екран, понекогаш е слободна активност, понекогаш некој мора да седи до него, а понекогаш само вели дека му е здодевно и очекува мајката или некој друг да организира нешто. Многу родители денес ова ги загрижува.

Голем број родители, но и наставници, психолози, образовни рехабилитатори, социјални работници и детски психијатри забележуваат дека денешните деца послабо ја поднесуваат досадата во однос на претходните генерации. Тоа не мора да значи дека се поразгалени, туку едноставно пораснале во сосема поинаков свет.

Децата денес бараат постојана забава

Досадата некогаш беше нормален дел од детството. Не затоа што родителите не се трудеа, туку затоа што не можеа постојано да организираат содржини. Децата чекаа автобус без мобилни телефони. Патуваа половина час до час без слушалки. Учеа да си играат сами затоа што немаше секогаш кој да си игра со нив. Немаа постојан пристап до стимулација.

Мозокот што расте во такви услови учи сам да создава своја содржина. Мозокот што расте со постојана стимулација не мора да го учи тоа, затоа што сè му е сервирано.

Мозокот се навикнува на брзи стимуланси

Во бројна литература се наведува дека мозокот на детето е исклучително чувствителен на моделот награда и казна, а особено на награда. Допаминскиот систем реагира посилно во детството отколку во зрелоста. Овој систем ја регулира мотивацијата, интересот за нешто и чувството на задоволство.

Кога детето често прима брзи и интензивни стимуланси (побуди), преку кратки видеа, постојани активности и постојано достапна забава, неговиот мозок се навикнува на повисоко ниво на стимулација. Овој процес во невронаучните истражувања дава објаснување за развојот на вниманието и мотивацијата кај децата.

Чекањето, од друга страна, денес е едно од најтешките нешта за детскиот мозок. Родителите често го забележуваат ова кога детето вели: „Не знам што да правам, здодевно ми е“. Таа реченица звучи безопасно. Можеби звучи како притисок врз родителите да смислат некои активности. Но, всушност значи дека детето сè уште не развило способност самостојно да смислува активности. Тоа е креативност, а креативноста се развива.

Родителите несвесно ја пополнуваат секоја празнина

Родителите се обидуваат да ја спречат досадата и мислат дека така му помагаат на своето дете. Тие организираат различни активности, смислуваат различни идеи обидувајќи се да го пополнат времето на своето дете. Родителите го прават тоа со најдобри намери, но досадата е токму она што понекогаш му треба на детето. Мозокот се развива во тој период помеѓу активностите. Досадата е период кога детето почнува да размислува и игра важна улога во развој на креативноста.

Постојат низа студии кои покажуваат дека неструктурираното време го стимулира развојот на извршните функции на мозокот, како што се планирање, саморегулација и креативност. Ова се функции кои подоцна се важни во учењето, емоционалната стабилност и отпорноста на стрес. Во овој простор, децата експериментираат со идеи, измислуваат игри, се откажуваат, и сето ова е развоен процес.

Децата кои не чекаат тешко поднесуваат фрустрација

Наставниците често први ја забележуваат разликата помеѓу деца што можат да толерираат досада и оние што не можат. Децата што не ја поднесуваат досадата, често имаат тешкотии да чекаат во ред, да завршуваат задачи што не им се интересни и да ја толерираат фрустрацијата. Нивниот нервен систем немал доволно можности да вежба трпение. А, трпението се вежба.

Во литературата често наоѓаме информации дека децата денес имаат пократок распон на внимание отколку порано. И тоа е вистина. Децата денес можат да имаат долг распон на внимание за работи што им се интересни. Проблем е да се насочи вниманието на некоја активност што не им е интересна и што не нуди награда веднаш. Ова го потврдуваат современите истражувања за вниманието во детството. Мозокот се прилагодува на околината во која расте. Ако околината е динамична, мозокот станува брз. Ако околината е бавна, мозокот учи да ја толерира таа бавност. Мозокот работи како што е трениран.

Премногу активност може да биде проблем

Денешните деца живеат во време кога речиси нема празнина помеѓу стимулите. Ако им е здодевно, вклучуваат игра, видео на мобилен телефон или нешто друго. Ако нешто не е интересно, постои алтернативна опција. Постојат многу опции и мозокот го памети тоа. И потоа го очекува истото.

Внатрешната мотивација не доаѓа однадвор

Внатрешна мотивација се јавува кога детето прави нешто затоа што сака. Надворешна мотивација се јавува кога детето прави нешто затоа што добива награда. Ако детето постојано добива содржина однадвор, тоа е награда.

Една од причините зошто родителите денес ги загрижува досадата кај децата е затоа што мислат оти тоа е проблем. Ако на детето му е здодевно, тие мислат дека можеби не е доволно стимулирано, дека нешто му недостасува. И мислат дека треба да им дадат нешто или, на пример, да го запишат на друга активност. Ова изгледа како логичен заклучок. Но, иако звучи логично, не е секогаш точно.

Децата денес речиси никогаш не чекаат

Постои забелешка дека децата кои имаат најзафатени распореди често најтешко го поднесуваат непополнетото време. Кога оваа структура исчезнува, исчезнува и нивното чувство на сигурност.

Во школската медицина често се гледа колку осетлив е процесот на развој на внимание. Родителите понекогаш очекуваат детето природно да знае како да се концентрира, да чека во ред или да заврши задача што не му е интересна. Но, овие способности не се вродени. Тие се развиваат постепено преку искуство. Едно од најважните искуства во овој процес е чекањето. Ова чекање го обликува нервниот систем.

Денес се чека помалку од некогаш. Децата не чекаат ни лифт без содржина, не чекаат ни автобус без содржина, не ги чекаат ни родителите да завршат нешто без содржина, не чекаат храна во ресторан без содржина и често јадат пред екран. Секогаш има нешто што ја пополнува таа празнина. Мозокот се сеќава на тој образец, а она што го памети, го очекува.

Детските психијатри, често нагласуваат една важна работа: способноста да ја поднесуваат фрустрацијата не се развива со задоволство, туку преку искуството понекогаш да се одложи задоволството. Ова е основа на емоционалната регулација подоцна во животот. Децата кои имаат можност да доживеат фрустрација во безбедна околина развиваат поголема отпорност на стрес.

Досадата не е знак на лошо воспитување

Секако, важно е да се разликува досадата од занемарувањето. Дете на кое постојано му е досадно затоа што нема поддршка од возрасните не е во иста ситуација како детето кое расте во стабилна средина, но повремено му недостасува некоја организирана активност. Ова се сосема различни работи. Тука треба да се разбере уште една важна разлика: на децата не им е потребна постојана анимација, но потребно е да знаат дека имаат достапна возрасна личност.

Едно истражување покажува дека децата што имаат повеќе неструктурирано време развиваат поголема способност за самостојно носење одлуки и планирање активности.

Досадата не е знак дека родителот прави нешто погрешно, туку прилика децата сами да откријат што всушност ги интересира.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Судбина

Полицаец од Флорида пронашол мртов човек, па му го украл идентитетот и се вселил во неговата куќа (ВИДЕО)

Полицаец од Флорида е обвинет за кражба на идентитет на маж што го пронашол мртов, а потоа се преселил во неговиот дом и го презел неговиот идентитет.

Полицаец од Флорида пронашол мртов човек, па му го украл идентитетот и се вселил во неговата куќа (ВИДЕО)

Брајан Луис Сгурос, 35, полицаец од Лодерхил, Флорида, беше уапсен претходно оваа недела. Истражителите велат дека Сгурос се претставувал како починатиот Денис Вест, се преселил во двокатната куќа каде што го пронашол неговото тело, а потоа ја реновирал.

Според полицијата, тој живеел во куќата на југот на Флорида со години без никој да ја открие измамата.

Сгурос сè уште не се изјаснил за обвиненијата. Не е познато дали има адвокат. Полициската управа на Лодерхил го отстранила од должностите и го суспендирала, објавува Би-Би-Си.

Организирал кремација на телото на сопственикот на куќата

Во 2022 година, полицијата добила повик да провери за 71-годишниот жител на Лодерхил, Денис Вест. Полицаецот Брајан Луис Сгурос бил испратен да помогне во истрагата.

Кога го пронашол Вест, кој починал од природна смрт, наводно „смислил сложена измама за да ја преземе контролата врз домот на лицето“, се вели во соопштението на шерифската канцеларија на округот Бровард.

Според соопштението, истражителите тврдат дека Сгурос му кажал на канцеларијата на мртовечникот дека е пријател на Вест, иако властите не пронашле докази дека двајцата се познавале.

Судските документи наведуваат дека полицаецот е виден на камерата на телото за време на запирањето и дека нема индикации дека имал претходен контакт со Вест.

Сгурос наводно му кажал и на канцеларијата на мртовечникот дека Вест нема живи членови на семејството, што исто така било неточно. Потоа Сгурос организирал кремирање на телото на Вест.

Вели дека сакал да спречи други нелегално да се вселат во домот

Заедничката истрага на канцеларијата на шерифот и Канцеларијата за проценувачи на недвижности во округот Бровард откри дека Сгурос ја презел куќата и се вселил во неа во август 2022 година.

Властите велат дека тој поднел документација до канцеларијата за проценка на имотот во 2025 година во која наведува дека ја презел куќата во август 2022 година.

Судските документи наведуваат дека Сгурос тврди дека ја презел куќата бидејќи била опасна и сакал да спречи други нелегално да се вселат.

Тој ги плаќал сметките за комунални услуги на име на починатиот. Тој, исто така, аплицирал за дозвола за замена на надворешните врати и прозорци, што би чинело 8.000 долари.

Сгурос тврдел дека ја зголемил вредноста на имотот и инвестирал повеќе од 214.000 долари во куќата.

Тој плати кауција од 25.000 долари

Мажот е обвинет за злоупотреба на службена должност, незаконска употреба на идентитет на починато лице, незаконска употреба на лични идентификациски информации, кривично дело против корисник на компјутер и незаконска употреба на двонасочен комуникациски уред.

Тој беше ослободен од притвор со кауција од 25.000 долари. Локалните агенции за спроведување на законот дознаа за случајот кога наследниците на Вест се обидоа да го продадат имотот.

Тагови: полицаец флорида

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Снимен е моментот на судар на два борбени авиони на војската на Филипини- загинаа сите четворица пилоти (ВИДЕО)

Два авиона на Филипинските воздухопловни сили се судрија за време на тренинг лет и се урнаа во воздухопловна база јужно од Манила. 

Снимен е моментот на судар на два борбени авиони на војската на Филипини- загинаа сите четворица пилоти (ВИДЕО)

Сите четири пилоти загинаа во несреќата, соопштија филипинските власти.

Два авиони SF-260 се судрија вчера попладне за време на лет на ниска надморска височина пред да се срушат во воздухопловната база Фернандо во Липа Сити, во крајбрежната покраина Батангас јужно од главниот град. Нема повредени на земја во несреќата, соопштија официјални лица.

Филипинските воздухопловни сили не дадоа детали за несреќата, која ја опишаа како случајна. Двајца филипински службеници запознаени со инцидентот рекоа дека авионите се судриле во воздух. Тие зборуваа под услов на анонимност бидејќи не биле овластени јавно да коментираат за случајот.

Еден од двата двоседни авиони се урна во близина на воената касарна во воздухопловната база, изјави сведок за Асошиејтед Прес. Воздухопловните сили објавија дека привремено ги приземјиле сите преостанати авиони SF-260, набавени од Италија, во исчекување на истрага. Не е објавено колку од овие авиони сè уште се во употреба.

Филипинската војска се соочува со недостаток на средства

Во мај, филипински SF-260 се урна и за време на навигациски тренинг лет во планинската покраина Бенгет на север од земјата, додека леташе со неколку други авиони од ист тип. Двајцата пилоти беа убиени.

Според податоците на воздухопловните сили, во 2023 година, друг SF-260 се урна за време на тренинг лет во оризово поле во покраината Батаан, северозападно од Манила. Двајцата членови на екипажот беа убиени. Вчерашната несреќа е уште еден удар за филипинската војска, која долго време се соочуваше со недостаток на средства.

Поради буџетски ограничувања, Филипините со години се борат да ги модернизираат своите воздухопловни сили, морнарица и армија. Во исто време, земјата се соочува со децениски комунистички и муслимански бунтови и сè понепријателски територијални спорови со Пекинг во Јужното Кинеско Море.

Тагови: пилоти Филипините

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Најмалку 150 лица се убиени во напад со дрон на пазар во Судан- реагира ОН

Советот за безбедност на Обединетите нации повика на истрага за нападите со беспилотни летала во Абјеи, спорна територија меѓу Судан и Јужен Судан, во кои загинаа десетици луѓе.

Најмалку 150 лица се убиени во напад со дрон на пазар во Судан- реагира ОН

Советот остро ги осуди нападите во близина на пазар во градот Тодах, соопшти најмоќното тело на ОН.

Локалните власти велат дека најмалку 150 лица се убиени

Локалните власти соопштија дека најмалку 150 лица се убиени во нападите . Обединетите нации потврдија најмалку 80 смртни случаи, а по други сè уште се трага.

Нападите, исто така, предизвикаа големи пожари, од кои повеќето беа изгаснати од мировната мисија на ОН во Абјеи (UNISFA), соопшти ОН.

Советот за безбедност нагласи дека Абјеи мора да остане демилитаризиран и предупреди дека намерните напади врз цивили би можеле да претставуваат воени злосторства.

Локалните медиуми објавија дека портпаролот на владата во регионот богат со ресурси рекол дека целите биле цистерни во дел од пазарот каде што суданските трговци работеле.

Владата на Јужен Судан ја обвини суданската армија за нападите, но армијата негираше одговорност.

Во нападите со беспилотни летала загинаа стотици цивили оваа година

Јужен Судан доби независност од Судан во 2011 година по една деценија граѓанска војна. Статусот на Абјеи останува нерешен, а мировна мисија на ОН е стационирана таму од 2011 година.

Суданската армија и паравоените Сили за брза поддршка (RSF) се борат за контрола врз земјата од април 2023 година. Граѓанската војна дополнително ја дестабилизираше ситуацијата во спорниот граничен регион, според ОН.

Инцидентот е дел од серија напади со дронови што драматично го променија текот на војната во Судан оваа година. Според Канцеларијата за човекови права на ОН (OHCHR), најмалку 1.120 цивили беа убиени во напади со беспилотни летала во Судан само во првата половина од годината.

Тагови: дрон Судан

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер