На судискиот камп кој во оваа форма се организира прв пат воопшто во Европа, пријавени се интернационални фудбалски судии од Словенија, Хрватска, Босна и Херцеговина, Србија, Црна Гора, Косово, Романија, Бугарија, Албанија и Македонија.
Судиите кои ќе ја следат тридневната програма од денеска до 26 јуни ќе имаат можност да се запознаат со најновите програми и потреби за натпреварувањата во рамки на УЕФА.
Претседателот на фудбалската федерација на Македонија, Мухамед Сејдини, на денешното отворање на семинарот во Хотел Хилтон истакна дека како Фудбалска федерација веруваат дека само со работа може да се постигне развој на сите полиња.
– Затоа, и овој сегмент за развој на судиите, континуираната едукација на сите нивоа, е потребна да се достигне повисоко ниво, како на знаење, така и на физичка подготвеност, рече тој.
Дополни дека идејата овој пат е тоа да се прошири и со останатите колеги од регионот, како што рече, „како што го правиме во останатите сегменти од фудбалската игра, да размениме знаење и искуства во делот на судењето и фитнес подготовката и да изградиме нови мостови на поврзување“.
Димитар Мечкаровски, претседателот на Судиската организација на ФФМ, се заблагодари за поддршката за реализација на семинарот и истакна дека истиот е од клучно значење за судиите.
– Ние сме навистина горди што го организираме овој семинар. Како што веќе кажав, за нас како Федерација овој семинар значи многу, за нашата држава, особено тоа што овој семинар е првиот од ваков тип кој се организира на овие простори во Европа воопшто, посочи тој.
Главниот тренер на УЕФА за подготовката на судии, Вернер Хелсен, кој втор пат е во државава, откако во октомври 2021 година беше предавач на семинарот за сите национални главни и асистенти судии од Прва и Втора МФЛ, истакна дека е супер да се биде тука.
– Среќен сум што сум тука со вас.Пред една година бев импресиониран од високиот стандард на едукација и можам да кажам дека денеска, кога ја гледам оваа разнолика група, не само во дресовите, туку и во државните асоцијации и културна позадина, е супер да се биде тука, рече тој.
Теоретските и практичните сесии од претстојниот камп ќе бидат реализирани од националниот фитнес тренер за фудбалски судии, Сашо Даневски, кој воедно е првиот македонски кондициски тренер ангажиран од страна на УЕФА. Тој истакна дека на семинарот најмногу ќе се посветат на високоинтензивна работа.
– Ќе симулираме ситуации од натпревари, бидејќи судиите секогаш треба да бидат подготвени за најлошите ситуации кои може да се случат на терен. Ова е одлична можност да создадеме услови за многу такви ситуации, да може да се преиспитаат себе си при донесувањето на одлука, меѓутоа, и да им дадеме и многу други нови предизвици кои би ги доживеале во иднина, рече Даневски.
Присутните судии, исто така, го споделија задоволството што се дел од овој семинар и истакнаа дека преку учење и пример очекуваат убава соработка со колегите од регионот. /МИА