Кога дојдовме во билетарата имаше над 10 деца кои не даваа знаци на живот – вака на денешното рочиште за кочанската трагедија сведочеа дел од пожарникарите кои интервенирале кобната ноќ во дискотеката „Пулс“. Дојавата за пожарот ја примиле во 2.35 минути, а огнот бил изгаснат околу 4 часот утрото, а Командирот на противпожарна единица сведочеше за драматичната сцена која ги дочекала пред дискотеката.

„Пред објектот имаше многу луѓе, викотници, пискотници, растрчани луѓе и возила. Кога слегов од возилото, одма до него лежеше една девојка каде пристапивме да ја реанимираме бидејќи беше во бессознание. Прво почнавме со вештачко дишење и пумпање на граден кош. Дојде медицинско лице, ме фати и ми рече: Господине, девојката е мртва. Потоа се упативме да влеземе во објектот. Додека одевме имаше многу деца кои панично бараа помош, беа исцрнети. На мене имав ставено апарат со кислород, така се упатив внатре во загушената просторија. На самиот влез затекнав многу лица кои беа паднати на земја, беа во бессознание и беа испреплетени едни врз други.“

Девојка која кобната вечер била во дискотеката, кажа како пожарот брзо се проширил, и додаде дека никој не им дал насоки каде да се движат, а не забележала ниту противпожарни апарати.

„Не видов кога се запалил плафонот, видов кога кажаа да излеземе и беше проширен пламенот до средината на дискотеката. Почнавме сите да излегуваме но настана голема гужва, до влезната врата се сеќавам, веќе кога бев таму, настана стампедо, паднав доле на земјата и натаму не се сеќавам на ништо. Насоки каде да се движиме никој не ни даде, ниту забелажв ПП Апарати и противпожарни знаци за излез.“

Родителите на загинатите во „Пулс“ пак, на денешното судење истакнаа дека се сомневаат дека се врши притисок врз сведоци преку Вибер комуникација од затворот.

Како и на претходното судење, така и денеска, дел од адвокатите повторно побараа да биде повлечено обвинението за некои од обвинетите, бидејќи како што рекоа, тие не се директно поврзани со пожарот.

Судењето го води судијката Дијана Груевска Илиевски и се наоѓа во доказна постапка. Продолжението е закажано за 19 февруари, кога се повикани уште пет сведоци.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.