Прес-конференција на портпаролите на Владата, Арсовски и Хоџа

 Новите инвестиции во енергетиката ја потврдуваат зелената агенда на Владата.

Портпаролите на Владата на Македонија, Душко Арсовски и Муамет Хоџа на денешната редовна прес-конференција информираа за заклучоците и одлуките донесени на вчерашната 106-та седница на Владата и одговараа на прашања од интерес на јавноста и медиумите.

За одлуките на вчерашната владина седница, портпаролите информираа дека Владата утврди како стратешки два инвестициски проекти.

Станува збор за проектот на друштвото „ЕФТ Солар" за сончева електрична централа „Ерџелија" и проектот на друштвото „Ветерен парк – Вирови" за ветерна електрана „Вирови" кои ги исполнуваат условите од Законот за стратешки инвестиции и со овие одлуки тие се квалификуваат за вадење банкарска гаранција, која им е неопходна за целосно затворање на постапката за стратешки инвестиции утврдена со Законот.

Портпаролите соопштија дека Владата го утврди и текстот на Предлог-законот за државна гаранција за обврските по Договорот за заем за финансирање на проектот на АД „ЕСМ" за транзиција кон соларни фотоволтаици, кој ќе се склучи со Европската банка за обнова и развој.

Проектот, со вкупна проценета вредност изнесува 25 милиони евра ќе има позитивен ефект врз животната средина, бидејќи со пуштање во употреба на фотонапонските електрани „Осломеј 2", со моќност од 10 MW и „Битола", со моќност од 20 MW, ќе се намали производството на електрична енергија од термоцентралите, со што, нема да има штетно влијание врз животната средина.

Тие истакнаа дека оваа инвестиција ќе придонесе за нови вработувања, што позитивно ќе влијае врз социјалниот аспект во овие два региони, каде што е планирана изградбата на двете фотонапонски електрани.

Портпаролите информираа дека Владата ја разгледа и усвои информацијата за усогласување на договорите и меморандумите кои ќе бидат на дневен ред на заедничката владина седница со Република Косово, која ќе се одржи утре, четврток 16 септември.

„Ова информација произлегува како резултат на ангажманот на работната група составена од претставници од двете Влади. Целта е да се задржи континуитетот во развивањето на добрососедските односи, имајќи предвид дека вакви седници беа одржани и со другите соседни земји. Придобивките од овие средби се подобрување на трговската размена, подобра комуникација на граѓаните и бизнисот од двете страни, проекти од заемен интерес, подобра меѓу гранична соработка и така натаму. На заедничката владина седница ќе бидат потпишани низа договори, односно меморандуми со кои ќе се продлабочи и зајакне соработката меѓу двете држави", посочија портпаролите.

Договорите и меморандумите се од областа на инфраструктурата, дијаспората, енергетика, економија, туризмот, безбедноста, иновациите и технолошкиот развој и други.

Портпаролите соопштија дека на оваа седница, Владата донесе одлука наставата во средните училишта во Тетово и Гостивар да продолжи да се изведува онлајн, заклучно до 20 септември.

Портпаролите информираа дека Пописот се спроведува непрекинато и со силен интензитет, а заклучно до вчера во 20:00 часот попишани се 618.120 лица.

„Граѓаните се најважниот партнер во процесот, и затоа Владата го поздравува позитивниот пристап и отворените врати за попишувачите. Секој граѓанин ќе биде попишан каде што вообичаено живее независно од личната карта. Во текот на целиот процес на потпишување секој граѓанин има право на увид во податоците кои попишувачот ги внесува. Моменталната динамика и соработка со граѓаните се потврда дека Пописот успешно ќе биде завршен во предвидениот рок, до 30 септември", истакнаа портпаролите.

На новинарско прашање за владината одлука за „недела неработен ден" од октомври, портпаролите истакнаа дека Предлог-законот за измени и дополнувања на Законот за работни односи со кој се предвидува денот недела да биде ден за неделен одмор сѐ уште не е ставен на дневен ред на собраниската Комисија за труд и социјална политика.

„Владата очекува дека ова законско решение наскоро ќе помине на матичната комисија, а потоа согласно собраниските процедури да се најде и пред пратениците на пленарна собраниска седница. Апелираме до сите пратеници и од власта и од опозицијата да го поддржат ова законско решение бидејќи е во интерес на граѓаните на нашата држава", нагласија портпаролите.

Продолжува бојкотот на наставата на турски јазик во гостиварската гимназија

Учениците и наставниците од паралелките на турски јазик во Средно општинско училиште во Гостивар (СОУ) продолжија со бојкотот на наставата.

Како причина ја наведуваат одлуката на ресорното Министерство за укинување на една паралелка во прва година.

Во дворот на гостиварската гимназија на протестниот собир покрај учениците и наставниците се придружија и родители. Од протестот беше порачано дека наставата нема да продолжи сè до промена на одлуката.

Наставниците сметаат дека укинувањето на една паралелка претставува етничка дискриминација врз турската заедница.

– Одлуката за укинување на паралелка не е само техничка, таа има и подлабоко влијание. Ние не знаеме кому одговара турската заедница да нема образувани граѓани. Тука станува збор за иднината на турската заедница во Македонија, а не само за иднината на неколку наставници и ученици. Ова училиште со децении образувало генерации кои дале значаен придонес во општеството. Бројот на ученици дозволува да останат три паралелки како што било и 20 години наназад. Затоа МОН треба да ја повлече одлуката за укинување на една паралелка, рече Менсур Матјан, професор во СОУ Гостивар.

Тој во име на неговите колеги го пренесе ставот дека бојкотот на наставата ќе продолжи сè до исполнување на нивното барање да се формира трета паралелка во прва година на турски јазик. За проблемот ќе ги известат и останатите институции и амбасади.

Од училишната управа на гостиварската гимназија информираат дека одлуката за затворање на еден од трите класа по турски јазик е на Министерството за образование и наука. За 102 ученици албанци, запишани во гимназијата во Гостивар, МОН одлучи да има седум паралелки, за 52 ученика за турски јазик две и исто толку за 16 ученици за настава на македонски јазик.

Годинава заради малиот број на ученици, во гимназијата бројот на паралелки се намали за две на албански и една на турски јазик. Управата бараше девет на албански, три на турски и две на македонски.

Во гостиварската гимназија во настава на турски јазик следат вкупно 250 ученици со 28 наставници. /МИА

Единствена Русија потврди дека обезбедила двотретинско мнзоинство на изборите

Владеачката парија на актуелниот руски претседател, Владимир Путин ќе го задржи мнозинството во парламентот и по изборите кои се одржаа изминатите три дена. 

За разлика од порано поддршката за ЕДИНСТВЕНА Русија е намалена, но и покрај тоа според првичните резултати објавени од Централната изборна комисија партијата освоила 49% од вкупниот број гласови или двојно повеќе од второрангираната комунистичка партија. Влез во руската Дума обезбедија и Либерално-демократската партија на Русија која освои 7,55 проценти, Само Русија со 7,37% како и Новата народна партија која го надмина потребниот праг освојувајќи 5,37%.

И покрај огромната победа, ЕДИНСТВЕНА Русија бележи драстично опаѓање на поддршката бидејќи во 2016та оваа партија освои 54% од вкупните гласови. Како причини за падот на рејтингот на владата на Путин,според тамошните анализи се наведуваат обвинувањата за корупција како и затворањето на критичарот на Путин, Алексеј Навални, а организациите кои се поврзани со него беа прогласен за екстремистички со што не им беше дозволено да се кандидираат на изборите.

-Денес завршуваат изборите. Овие избори се многу важни и ќе ја детерминираат иднината на нашиот град и земја. Изборите јасно покажаа дека граѓаните сакаат сувернитет, подобра стратегија за развој и решавање на социјалните проблеми на сите граѓани.-Сергеј Собјанин- градоначалник на Москва.

Резултатите од изборите уште еднаш ја потврдија моќта на партијата на актуелниот руски претседател Владимир Путин која со земјата владее од 1999та, а се уште е непознато дали Путин ќе се кандидира на претседателските избори закажани за 2024та.

На овие избори за прв пат од 1993 гласањето не беше следено од набљудувачите на ОБСЕ, а иако опозицијата обвинуваше за изборни нерегуларности, руското министерство за внатрешни работи соопшти дека гласањето поминало во најдобар ред и дека не се забележани значајни нарушувања во изборниот процес.

Лазаревска: ВМРО-ДПМНЕ се обидува да ги закочи измените за недела неработен ден

ВМРО-ДПМНЕ преку своите коалициски партнери се обидува да ги закочи измените за недела неработен ден.

По налог на Христијан Мицкоски, неговите коалициони партнери Алијанса и Алтернатива, овде во Собранието се обидуваат да закочат уште едни важни законски измени.

Претседателот на Комисијата за труд и социјална политика од редовите на Алијанса-Алтернатива, Хусни Исмаили, упорно не закажува седница на чиј дневен ред се измените и дополнувањата на Законот за работни односи, со кои недела станува ден за одмор за сите работници.

Овие измени на сила треба да стапат на први октомври, а денеска на десет дена пред тоj датум, опозицијата во Собранието се обидува да ги спречи тие измени.

Ништо не е сменето во ВМРО-ДПМНЕ, секогаш кога во Собранието треба да се носат закони кои се во корист на граѓаните, оваа партија на секој начин се обидува да ги блокира и закочи.

Овој пат тоа очигледно го прави преку своите коалициски партнери.

Ваквиот лицемерен и неодговорен однос на ВМРО-ДПМНЕ кон граѓаните е одамна прочитан и препознаен.

ВМРО-ДПМНЕ не може да понуди ништо освен лажни вести, деструкции и блокади, ВМРО-ДПМНЕ не знае ништо друго освен да работи на штета на граѓаните.

Затоа на изборите ВМРО-ДПМНЕ, Мицкоски и нивните коалициски партнери ги очекува нов силен пораз од граѓаните.

Жаклина Лазаревска, пратеничка на СДСМ

притисни ентер