Живот

Потребен е развој на технологијата за подобар свет на лицата со оштетен вид

Развиената технологија овозможува подобар живот за сите, но таа има „моќ“ да го направи светот уште подостапен за слепите лица.

Сепак, прашање е колку земјите во развој може да им овозможат на овие лица понезависен живот од било кога, токму со помош на технологијата.

Суарет Алиша од коалицијата „Менуваме“ за МИА вели дека нашата држава сè уште не е целосно подготвена да одговори на предизвиците и да ја искористи напредната технологија, поради слабиот развој.

Појаснува дека во развиените земји се користат апликации и технологии, кои доколку Северна Македонија покаже „интерес“ може да бидат достапни и кај нас.

– Постои говорната апликација Џос како пример за слепите лица. Со помош на таа апликација она што вие го гледате, Џосот го конвертира на тонски звук. Тој може да се синхронизира и на македонски јазик, но државата не собра сили да направи нешто, вели Алиша.

Оценува дека во светот е развиена далеку подобра технолошка култура.

– Постојат виртуелни асистенти кои му помагаат на слепото лице да функционира во просторот без проблем. Тоа го има развиено во Индија. Верувам дека може и тука да се развие таа апликација каде паметните уреди се водач на слепите лица. Има и технологии коишто овозможуваат дигитална писменост за деца со различна попреченост, но ние како држава сме настрана од тоа, многу сме назад, оценува Алиша.

Едно од поновите усовршени помагала за слепите лица е токму смарт стапот кој се повеќе се користи ширум светот, бидејќи има вграден тонски звук кој му кажува на лицето што се наоѓа околу него.

-Бидејќи смарт стапот е големо олеснување за овие лица, она за што како организација разговаравме со министерот за здравство изминатиот период, беше тоа да биде на товар на Фондот за здравство и се надеваме дека наскоро Фондот ќе го направи смарт стапот подостапен за овие лица, истакнува Алиша.

Вели дека со развиената технологија, исто така, може да им се помогне на овие лица и во образовниот процес, посочувајќи ги како пример паметните браеви таблети кои, како што вели, ние ги немаме.

– Зборуваме за инклузивно образование, но какво е тоа инклузивно образование ако нема компјутер за слепото лице. Мислам дека веќе е време да се изменаџираат подобро некои работи и лицата да имаат подобар пристап до развиените технолошки уреди, смета Суарет Алиша.

За да го направиме светот поотворен и поповрзан, мораме да поврземе луѓе од сите потекла и способности, а таа поврзаност несомнено може да резултира со поголема самодоверба кај слепите лица, односно лицата со попречености.

– Ние немаме некоја добра алатка која ќе служи во образованиетоза да може да ги надминеме попреченостите односно нервно развојните проблематики со кои се соочуваат родителите на овие дечиња, вели за МИА Моника Тончевска од коалицијата „Менуваме“.

Креирањето и користењето на визуелната содржина предизвик за слепите лица во нашата држава

Секој ден, луѓето поставуваат и споделуваат повеќе од две милијарди фотографии на „Фејсбук“ , „Инстаграм“ и други слични социјални платформи. И додека визуелната содржина обезбедува забавен и експресивен начин за луѓето да комуницираат онлајн, таа понекогаш создава и предизвици за луѓето со слепило.

Како резултат на тоа, некои луѓе може да се чувствуваат изолирани и фрустрирани кога не можат целосно да учествуваат во интеракцијата.

Бојан Кордалов, кој е специјалист за односи со јавност и нови медиуми, за МИА вели дека ако се користи правилно, дигитализацијата ја зајакнува демократијата, оневозможува дел од луѓето да бидат оставени настрана или да бидат дискриминирани.

– Дигитализацијата бара еднакви можности за сите, а тоа е пристап до компјутери, квалитетни паметни телефони и брз интернет. Доколку ова не биде овозможено за секого, тогаш наместо за инклузивност, ќе зборуваме за уште поголем јаз, привилегирани наспроти непривилигирани граѓани, односно за огромна дискриминација и подвоеност во општеството, нагласува Кордалов.

Според него, тука е предизвикот кој, како што вели, секое општество, односно власт и институции мора да го земат предвид.

Посочува дека напредокот на интернетот и технологијата овозможуваат полесен и целосен физички пристап и до најнедостапните локации, напредок на медицината, достапност до извори на информации, образование, работни места…

Во светот, развојот на технологијата се движи со нејверојатна брзина. Покрај смарт стапот, кој им овозможува на корисниците повеќе слобода за да ја истражуваат околината, се појавуват и други технолошки уреди. Едни од нив се 3Д звучните мапи. Станува збор за детална аудио мапа што го поврзува она што е во околината со лицето со оштетен вид. Има и екрани на допир на Брајово писмо кои работат на ист начин како таблетите и кои се покажаа како особено популарни меѓу учениците и наставниците. Тука се и неверојатните електрични возила со вградена вештачка бучава./МИА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Над 600 загинати во катастрофалните порои во Непал и Кина, се трага по илјадници

Бројот на жртви од катастрофалните порои што го погодија хималајскиот пограничен регион меѓу Непал и Кина се искачи на најмалку 623, а речиси 2.500 лица сè уште се водат како исчезнати.

Непалската полиција во понеделник соопшти дека се пронајдени 616 тела. Кина потврди уште седум смртни случаи на тибетската страна од границата, каде што 554 лица сè уште се водат како исчезнати. Во Непал, 1.924 лица се водат како исчезнати, вклучувајќи 517 странци, според најновите бројки од агенцијата за управување со катастрофи.

Размерите на катастрофата се особено видливи во областа Читван во јужен Непал, стотици километри низводно од областа прва погодена од поплавата. Таму се пронајдени дури 233 тела, повеќе од една третина од сите жртви пронајдени досега во Непал. Уште 158 тела се пронајдени во Навалпараси Исток.

Повеќе од 4.400 лица се извлечени на безбедно место

Непалската армија ги засили напорите за пребарување и спасување, но операциите се попречени од дебели слоеви кал, уништени патишта и мостови и лошо време.

Досега се спасени повеќе од 4.400 луѓе, а 14 хеликоптери се вклучени во операциите во тешко достапните области, изјави портпаролот на непалската армија, Раџа Рам Баснет.

Калта е толку длабока што хеликоптерите не можат да слетаат или полетуваат на некои места. Областите Тимуре, Сјабрубеси и Маилунг се особено тешко достапни.

Обилните дождови би можеле дополнително да ги комплицираат спасувачките операции. Непал сè уште е во сезоната на монсуни, која обично трае до септември, а дожд се прогнозира и за кинеската страна од границата овој викенд.

Повеќе од 100 луѓе би можеле да бидат заробени во тунелите

Еден од најголемите проблеми се тунелите на хидроцентралите во планините, каде што работниците беа заробени по ударот на поплавниот бран.

Само четири лица беа извлечени од тунелите до петок наутро. Спасувачите стравуваат дека повеќе од 100 луѓе се уште се заробени во областа на хидроцентралите.

Снимките од катастрофалната област покажуваат како спасувачите ги извлекуваат работниците целосно покриени со кал од тунелот. Двајцата преживеани мораа да бидат носени на грб до хеликоптерот.

„Испратени се два хеликоптери, но е многу тешко бидејќи дури и пронаоѓањето на влезовите во тунелите е проблем“, рече Баснет.

Тела се пронајдени десетици километри низводно

Поплавниот бран во среда ги зафати речните системи Бхотекоши и Тришули, однесувајќи куќи, патишта, мостови, возила и хидроцентрали.

Силата на водата беше таква што телата на жртвите сега се пронајдени десетици, па дури и стотици километри од местото на катастрофата. Тие се пронајдени во осум области на Непал, сè до областа во близина на границата со Индија.

Потрагата продолжува и во кинески Тибет. Државната телевизија покажа спасувачки екипи како газат низ огромни количини урнатини и кал во областа Ѓиронг, каде што поплавите уништија важен граничен премин меѓу Кина и Непал.

Преминот Ѓиронг се наоѓа на една од главните трговски и туристички рути меѓу двете земји и го користат многу аџии на пат кон планината Каилаш.

Катастрофата веројатно била предизвикана од уривање на глечери и карпи

Прелиминарните сателитски и сеизмолошки анализи покажуваат дека катастрофата била предизвикана од големо уривање на карпи и дел од глечер високо во Хималаите.

Огромна количина мраз, карпи и седименти се урнале во долината, а потоа започнале синџир од поплави и порои по речните системи кон Непал и Тибет. Сателитските снимки покажуваат голем прекин на карпестата подлога и глечерите во областа на планината Лангтанг Лирунг.

Во последните два дена, кинеските тимови го следеле и новото езеро кое се формирало над Ѓиронг откако калта и остатоците ја блокирале водата. Постоел страв дека пукањето на таа природна брана би можело да предизвика уште еден поплавен бран.

Опасноста оттогаш е намалена бидејќи водата од езерото сега се исцедува природно, но спасувачките екипи остануваат во готовност за можни понатамошни лизгања на земјиштето и поплави.

Тагови: Непал

Метео

Сончево и топло време со температура до 37 степени

Времето денеска ќе биде сончево и топло со мала до умерена локална облачност.

Според УХМР, наместа ќе биде нестабилно со пороен дожд, грмежи и засилен ветер. Локално процесите ќе бидат во форма на невреме со пороен дожд, силен ветер и услови за појава на град. Ќе дува слаб до умерен ветер од југоисточен правец. Максималната температура ќе биде во интервал од 32 до 37 степени.

Во Скопје, сончево и топло со мала до умерена облачност. Во попладневните часови наместа ќе има појава на нестабилност со пороен дожд, грмежи и засилен ветер. Во делови од котлината процесите ќе бидат во форма на невреме со пороен дожд, силен ветер и услови за појава на град. Максималната температура ќе достигне 36 степени.

Македонија

СДСМ: Мицкоски договорил дата центи – само кога граѓаните би знаеле со кого?

Мицкоски изјави дека не се откажува од дата центрите, споменува 5-6 инвеститори и најавува реализација.

Значи Мицкоски веќе договорил дата центри пода радарот.

Само кога граѓаните на Македонија би знаеле со кого?

На кого Мицкоски му ги поклонува водата, земјата и струјата?

Се прават дилови за профити додека се крие од јавноста.

Мицкоски договорил и не се откажува. Граѓаните никој не ги прашува. Ќе биде како што ќе каже Мицкоски.

Земјоделците нема да имаат вода за нивите. Граѓаните ќе плаќаат повисока цена за струјата.

Храна нема да имаме, Македонија од дата-центрите нема ништо, но затоа имаат некои приватни компании и поединци.

Дата-центрите не се технолошки напредок. Дата-центрите се само хардвер за туѓ технолошки напредок, на штета на граѓаните на Македонија, како и сè со ОКГ ВМРО.

Секогаш кога Мицко договара, разговара, граѓаните ништо не знаат.

Инвестициите мора да бидат во интерес на Македонија, а не ресурсите на Македонија да се ставаат во функција на туѓи профити.

Затоа бараме целосна транспарентност:

Кој е инвеститорот со кој преговара Мицкоски?, се наведува во партиското соопштение.