По документарецот за „кралевите на рокот“ ќе следува филм од фестивалската гала-програма - „Светиот Гра“ на Џанфранко Роси, добитникот на годинашниот венециски „Златен лав“.

Фестивалот ќе трае до 23 ноември под мотото „Европа тоа најдобро го прави“ и покрај филмови во трка за награди (10 во Официјалната селекција избрани од Бернд Будер и шест во програмата СинеБалкан), ќе прикаже и кратки и документарни, гала-програма со светски остварувања и наградени на последните најзначајни фестивали.

Во гала-програмата се филмови од Џармуш, Торнаторе, Содерберг, Брајан де Палма, Вуди Ален, Винтерботом, Вонг Кар Ваи, Анджеј Вајда, Абделатиф Кешиш (добитникот на „Златна палма“ во Кан), добитниците на „Златна мечка“ и „Сребрена мечка“ на Берлинале - Калин Петер Нецер и Данис Тановиќ.

И во официјалната програма има наградени филмови, како победникот во Ротердам - „Моето куче Килер“ на чешката режисерка Мира Форнеј и грузискиот „Во цут“, кој победи на Сараевскиот филмски фестивал.

Премиера на „Синедејс“ ќе има филмот „Дуран Дуран“ на Дејвид Линч, а во исто време со светската премиера на скопскиот фестивал ќе биде прикажан и филмот „Фамилијата” на Лик Бесон.

Фестивалот на 23 ноември во „Милениум“ ќе биде затворен со „Фалсификатор“ на Горан Марковиќ. Покрај во „Милениум“, „Синедејс“ ќе се одржува и во „Фросина“, Џебното кино на МКЦ и во Кинотеката на Македонија.

Програмата „Земја во фокусот“ годинава ќе опфати регион - африканската кинематографија и во Кинотеката на Македонија ќе прикаже филмови од неколку земји на тој континент продуцирани со европски партнери. Ќе има и филмови од Еквадор, која е водечка земја во јужноамериканската кинематографија, а гостин ќе биде Рик Сегреда, кој е и член на жирито во програмата СинеБалкан.

Од македонската продукција ќе бидат прикажани најновиот краток филм на режисерот Иво Трајков, „Само за губитници“, документарниот „После дождот: Сведоштва за климатските промени“ на Билјана Гарванлиева и скопските премиери на „Влакна“ на Елеонора Венинова и „Барајќи ја среќата“ на Марија Џиџева, кои беа прикажани на ИФФК во Битола.

Во соработка со најголемиот европски фестивал на кратки филмови, „Интерфилм Берлин“, ќе бидат прикажани најдобрите кратки филмови во изминатите години, а ќе гостува и директорот на фестивалот Хајнрих Херманс.

„Синедејс“ оваа година има ексклузивна соработка со Римскиот филмски фестивал и ќе биде прикажана ревија на современи италијански филмови. Гостин ќе биде Паоло Минуто, уметнички директор на Италијанската федерација на филмски здруженија. Од Италија ќе гостува и познатиот актер, сценарист и режисер Масимо Андреи.

Ќе гостуваат и браќата Гас и Лук Холверда, режисери на контроверзното и успешно прво филмско остварување, документарецот „Неверниците“, во кој од сопствен агол за религиските верувања говорат познати режисери, актери, продуценти.

Гости ќе има од екипите на речиси сите филмови во програмите за награди, а ексклузивен гостин на 12. „Синедејс“ е стрип-цртачот и концептуален уметник Крис Бејкер, познат по соработката со Тим Бартон и Стивен Спилберг. Бејкер ќе одржи специјално предавање посветено на култниот филм „А.И Вештачка интелигенција”, последниот проект на Стенли Кјубрик.

Предавање („Првите три минути од отворањето на филм“) ќе има Јан Харлан, продуцент на сите Кјубрикови филмови. Работилница („Психолошките аспекти во снимањето звук за филмови“) ќе одржи Ерик Шпицер, професор на Виенскиот универзитет за музика и изведувачки уметности, како и македонската режисерка Билјана Гарванлиева („Драматургијата во документарниот филм“).

Добитниците на наградите за најдобар филм, режисер, актер и сценарист ќе бидат соопштени на затворањето на фестивалот, кога ќе биде објавен и победникот на Конкурсот за најдобра филмска критика, што е новитет на годинашниот „Синедејс“.

За филмовите во официјалната селекција ќе одлучува жири во состав: Алесандро Гроплеро, Грегоар Колин и Стивен Далтон, а за филмовите од „СинеБалкан“ - Бранко Шмит, Рик Сегреда и Лукаш Мациејевски.

Со подеднаков дел во вкупниот буџет од 2.400.000 денари учествуваат Град Скопје, Министерството за култура и Делегацијата на Европската унија во Скопје.

Цената на билетот останува 100 денари. Организаторот на фестивалот, Младинскиот културен центар, очекува уште поголема посетеност од рекордната лани, кога биле продадени скоро 26.400 влезници.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.