Иако здравствениот штаб во Лос Анџелес прв пат објави дека неговата смрт е поврзана со вирусот „Ковид-19“, неколку часа подоцна тие се оградија велејќи дека причина за смртта на тинејџерот може да биде нешто друго.
- Иако првичните тестови покажаа дека тој бил позитивен на „Ковид-19“, случајот е сложен и може да има алтернативно објаснување за неговата смрт. Неговата смрт ќе треба да ја објасни Американскиот центар за контрола и спречување на болести, се вели во соопштението.
Градоначалникот на Ланкастер Рекс Парис изјави дека момчето е хоспитализирано поради респираторни проблеми и починало поради септичен шок, како резултатна широко распространетата инфекција која може да предизвика екстремно низок крвен притисок и слабост на органите.
Парис тврди дека таткото на момчето исто така бил болен од вирусот „Ковид-19“ и дека бил вработен на работно место каде имал директен контакт со луѓе.
Градоначалникот рече дека момчето веројатно имало и други здравствени проблеми, но бил здрав пред да се зарази со вирусот.
Тој рече дека не се сомнева дека тинејџерот починал од компликации предизвикани од вирусот „Ковид-19“.
„Ние сме првиот град во Соединетите држави каде едно дете почина од коронавирус, болката е неподнослива“, рече тој.
Според него, младиот човек отишол во болница поради респираторни проблеми, но тие го пуштиле дома и не го тестирале за Ковид-19. Потоа отишол во друга болница, каде бил примен и тестиран. Дури по неговата смрт, добил позитивен наод за коронавирус.
- Како може да примите дете во болница со респираторни проблеми и да не го тестирате? Многу сум лут“, изјави градоначалникот на Ланкастер.
Искрено сочувство изрази Барбара Ферер, началник за јавно здравје на округот Лос Анџелес.
- Секоја загуба во округот ЛА е трагична. Искажуваме искрено сочувство до семејството и саканите кои ја претрпеа оваа трагедија, рече Барбара Ферер.
„Она што го гледаме во градовите како Њујорк е показател за она за што треба да се подготвиме овде“, рече таа
Во Соединетите држави, само помалку од 3 проценти од сите хоспитализирани со коронавирус се деца под 19-годишна возраст. Статистиката на болни деца е слична во светот од почетокот на епидемијата.
Како и многу други градови во САД, и во Ланкастер е тешко да се добие опрема за тестирање и маски. Парис во соопштението за печат истакнал дека нарачал 100.000 тестови од Европа.
Низ САД, повеќе од 55.000 луѓе се заразени со „Ковид-19“, а најмалку 800 починале.