По одржување кондиција дома во дворот, Лина Ѓорческа замина на турнир во Белград

По неколку месечниот прекин поради состојбата со коронавирусот, затворените граници и ограниченото движење, најдобрата македонска тенисерка Лина Ѓорческа од Тетово за прв пат периодов учествува на тениски турнир во Белград.

Отворањето на границите со Србија беше можност Ѓорческа да настапува на Источноевропскиот шампионат во Белград, Србија (Eastern European Championship). Во првата недела од турнирот изминатите седум дена, таа успеа со три победи и еден пораз да се пласира во понатамошната втора фаза која почнува од утре.

– Од понеделник 6 јули, продолжувам со дуели во новоформираната група Б со противничките Ивана Јововиќ и Доротеја Јоксовиќ од Србија, Басак Ерајдин од Турција и Марина Дражиќ од Хрватска, истакна Лина Ѓорческа.

Претходно, во првиот циклус на натпревари, Ѓорческа имаше три победи и еден пораз во рамки на групата Ц. Ги совлада Тијана Сретеновиќ со 2-0 (7-5,6-4) и Мариана Дражиќ со 2-0 (6-1, 6-0), Чемре Анил со 2-0 (6-1, 6-1) и пораз од Викторија Томова од Бугарија со 2-0 (6-3, 6-2)

Додека траеше ограничувањето на движењето поради полицискиот час во Тетово, таа кондицијата ја одржуваше дома во рамки на дворот од семејната куќа.

– Полицискиот час и забраната за одржување на тренинзи и спортување беа причина да не може да се тренира во Тетово или Скопје. Тука се и проблемите се немање соодветни места за тренирање кои или не постојат не се одржуваа. Турнирот е прва можност вистински да се вратам на теренот, вели Ѓорческа, благодарна на организаторот на турнирот, тениската академија на српскиот тенисер Јанко Типсаревиќ.

На светската листа на Женската тениска асоцијацијa (Women’s Tennis Association-WTA) Лина е на 342 место, додека во двојки е на 216 позиција. На рангирањето на Меѓународната тениска федерација ИТФ е на 37 место. /МИА

Италијаните му продале заштитен остров на Украинец за 10 милиони евра

Италијанскиот остров Галинара во Лигурското Море е продаден за повеќе од 10 милиони евра на украинскиот бизнисмен Александар Богуслаев, јавија денес италијанските медиуми.

Според Кориере дела Сера, Богуслаев (42) е син на украинскиот претприемач и политичар Бијачеслав Богуслајев, сопственик на компанија која била лидер во производството на мотори за авиони и хеликоптери.

Куќите во форма на желка на островот, кои се наоѓале на 1,5 километар крај брегот на Лигурија меѓу Аласија и Албенка, некогаш припаѓале на Римокатоличката црква, а во последните 150 години на богатите банкари и индустријалци, бидејќи биле приватизирани.

Весникот наведува дека тој потпишал договор со претставниците на девет семејства од Лигурија и Пиемонте, кои биле сопственици во последните 40 години.

Се додава дека Александар Богуслајев поседува недвижен имот и на југот на Франција.

Островот е прогласен за заштитен парк на природата и не е достапен за туристите , пишува„ Кориере дела Сера “.

Со комбинација на лекови, кубанските лекари ги излекувале болните од корона

Голема група кубански научници и лекари објавија студија која сè уште е препринт (не ја поминала т.н. стручна рецензија) што укажува на многу ветувачки резултати во лекувањето на САРС-КоВ-2 .

Заразените со коронавирусот се лекувале со комбинација на интерферон алфа-2б и гама и интерферон алфа-2б.

Според сознанијата на кубанските научници, интерферон-терапијата „негативно“ делува на РНК во вирусите. Стапките на успех за брзо решавање на инфекцијата со вирусот САРС-КоВ-2 се навистина импресивни, но ова е релативно мала студија во која биле вклучени 79 пациенти на возраст од 19 до 82 години заразени со коронавирус. Во едната група, испитаниците добиле комбинација од 3,0 интерферон алфа-2б и 0,5 интерферон гама двапати неделно. Во втората, добиле инјекција од 3,0 интерферон алфа-2б три пати неделно. Покрај тоа, пациентите добиле стандардна кубанска терапија на лопинавир-ритоавир со хлорокин.

Во првата група, вирусот бил „негативен“ кај 78,6 проценти од пациентите за само 4 дена, а во втората кај 40,6 проценти од пациентите. RT-PCR-испитувањата се користеле за верификација и било откриено дека времето потребно за неутрализација на виралноста е помеѓу три до пет дена.

Влошување на респираторните симптоми е забележано кај 6,6% од пациентите во првата група и 3,3% од пациентитево втората група. Ниту еден пациент не развил тешка форма на болеста.

По 14 дена од третманот, тестовите со РТ-ПЦР покажале негативен резултат кај едната група кај 100 проценти од пациентите и во 91% во другата. Кубанците го припишуваат успешното елиминирање на виралноста на значителното зголемување на лимфоцитите, како и на значително намалување на CRP во рок од седум дена.

И во двете групи, сите пациенти закрепнале за 14 дена и нивните лабораториски наоди се вратиле во нормала.

Најчестите несакани ефекти со овој третман биле главоболки, а кај две групи се забележани кај околу 30% од случаите.

Запленет имотот и две телевизии на албански бизнисмен поради шверц со дрога

Албанските обвинители заплениле огромни средства што му припаѓале на бизнисмен и медиумски магнат, осомничен за изградба на неговата империја од трговија со дрога.

Специјалното јавно обвинителство за борба против корупцијата и организираниот криминал, познато како СПАК, соопшти дека властите заплениле имот во кој биле вклучени неколку станови, земјиште, шуми, возила, вклучувајќи Ролс Ројс и две телевизиски станици РТВ Ора и Канал Еден, врз основа на основано сомнение, потврдени со докази дека Или Ндроки, познат и како Џамал Пасмациу, бил вмешан во криминални активности.

Ндроки е виден како одел во полициската станица, но не бил приведен, пренесе АП.

Ндроки претходно бил уапсен во Турција и Италија под сомнение за припадност на криминални организации вклучени во трговија со дрога, но бил ослободен и во двата случаи.

Адвокатите на Ндроки изјавија дека ќе поднесат жалба против запленувањето, а самиот Ндроки изјавува дека запленувањето се случило затоа што тој е во кавга со градоначалникот на Тирана.

притисни ентер