Лидерите на ЕУ дискутираат за суспендирање на патентот, идеја поддржана од американскиот претседател Џо Бајден, на дводневниот самит што започна денеска во португалскиот град Порто, но се поделени околу придобивките од предлогот.
"Никој нема да биде сигурен сè додека не бидеме сите. Ако се вакцинираме само во развиените земји, нашата победа против ковид-19 ќе трае кратко. Сведоци сме колку брзо вирусот мутира, создавајќи нови варијанти кои носат нови предизвици", рекоа лидерите на Белгија, Шведска,Франција, Данска и Шпанија во заедничко писмо до Европската комисија.
"Вакцините станаа клучна безбедносна политика, а ЕУ не може да си дозволи да доцни. Затоа, зголемувањето на европскиот производствен капацитет е клучен приоритет", се вели во писмото.
Експертите сметаат дека за укинување на патентите ќе се преговара со години и дека нема да се допираат клучните прашања за зголемување на производството на вакцини, пишува Ројтерс.
„Кое е моменталното прашање? Не е тоа интелектуалната сопственост. Можете ли да ја дадете вашата интелектуална сопственост на лаборатории кои не знаат како да произведуваат и нема утре да произведат?“ рече францускиот претседател Емануел Макрон во воведот на самитот.
„Главното прашање е солидарноста во распределбата на дозите“, нагласи Макрон, додавајќи дека Франција соработува со Германија за ова прашање. Берлин исто така вчера се спротивстави на идејата за суспендирање на патентите.
Во средата, Бајден го прифати повикот на Индија и Јужна Африка да се откажат од патентите, одговарајќи на притисокот од пратениците и стотици други држави, но исто така ги разбесни фармацевтските компании.
Некои официјални претставници на ЕУ изјавија дека ќе бидат потребни две години да се постигне согласност за суспензија на патентите во Светската трговска организација (СТО), сè додека вакцините не станат ирелевантни за сегашната пандемија.
Лидерите на ЕУ во Португалија најверојатно ќе ја слушнат препораката на Европската комисија дека суспензијата на патентите нема да го забрза производството, особено во посиромашните земји, бидејќи за производствениот процес се потребни напредна технологија и постројки, пишува Ројтерс.
Германија, каде е седиштето на BioNTech, која ја разви вакцината mRNA против covid-19 со американски Pfizer, се спротивставува на откажувањето од патентот, додека Италија го поддржува, откриваат официјални претставници на ЕУ.