Аргументот на одбраната бил дека напаѓачот не можел да ги разбере последиците од неговите постапки, но судот не го прифатил.
Алек Минасијан, 28, е осуден денеска за 10 точки од обвинението за убиство од прв степен и 16 точки за убиство во обид.
Додека ја читал пресудата, главниот судија на Онтарио, Ен Малој, одбила да го именува напаѓачот, нарекувајќи го под општо име што се користи за странци - Џон До. Таа рече дека нема да му даде публицитет „што тој го бараше од самиот почеток“.
На судењето, бранителот на обвинетиот Борис Битенски изјавил дека на неговиот клиент му бил дијагностициран аутизам, поради што тој немал способност да развие емпатија, па дури и не ја разбирал тежината на своите постапки. Малој ја прифатила психолошката дијагноза на обвинетиот, но го отфрлила аргументот дека не бил свесен за последиците од неговото дело.
„Недостатокот на емпатија за страдањето на жртвите, дури и неможноста да се соживее од која било причина, не е одбрана“, рече таа.
На 23 април 2018 година, Минасијан возел изнајмено товарно комбе по прометна улица во Торонто, намерно газејќи ги пешаците. Осум жени и двајца мажи на возраст од 22 до 94 години загинале во нападот. Една од убиените жени била влечена од комбето повеќе од 150 метри. Шеснаесет лица претрпеле сериозни повреди во нападот, како оштетување на мозокот и ампутација на нога. Меѓу жртвите на нападот биле 80-годишната баба Дороти Сивел, 45-годишната самохрана мајка Ренука Амарасинге и 22-годишниот Џи Хун Ким, студент од Јужна Кореја.
Судењето се одвивало преку видео конференција поради пандемијата. Минасијан преку видео повик во вторникот изјавил дека тој „не е кривично одговорен за сите обвиненија“.
Бидејќи Минасијан признал дека планира да го изврши нападот, судењето се фокусирало на неговата ментална состојба. Обвинителите тврдат дека Минасијан бил мотивиран од омраза кон жените и бил активен на радикални форуми преку Интернет.
Меѓу жртвите од Минасијан имало претежно жени. Минасијан бил мотивиран од движењето „инцел“, кое е кратенка за „несакан целибат“, или „целибат против нечија волја“. Инцел е онлајн заедница во која се приклучуваат сексуално фрустрирани мажи кои мразат жени. Инцелите ги осудуваат жените заради негирање на правото на сексуален однос. Тие сметаат дека жените треба да бидат третирани со насилство и да бидат обвинети ако немаат сексуални односи со нив. Најекстремните членови на заедницата пропагираат силување и други форми на насилство врз жените и негуваат омраза кон другите мажи кои имаат повеќе партнерки.
„Сигурен сум дека незадоволството кон жените кои никогаш не го интересираа беше фактор во овој напад, но не и движечка сила“, рече судијката Молој. Во нејзината пресуда се вели дека напаѓачот бил „длабоко осамен“ и се гледал себеси како неуспешен, бидејќи со часови гледал на „корумпирани“ веб-страници. Молој рече дека Минасијан сакал да создаде свој углед и да стане славен преку убиствата. Обвинетиот со години фантазирал за злосторството. „И покрај тоа што размислуваше како тоа може да влијае на неговото семејство, тој намерно ги остави тие мисли настрана, игнорирајќи ги затоа што не сакаше да го одвлекува вниманието од постигнувањето на оваа важна цел“, рече таа.
Минасијан, кој рече дека никогаш немал девојка и дека е девица, признал дека го користел комбето како оружје и рекол дека сакал да поттикне повеќе напади. Минасијан по апсењето и соопштил на полицијата дека бил во контакт со Елиот Роџер, студент кој убил шест лица и ранил 13 лица во пукањето во 2014 година во близина на Универзитетот во Калифорнија, Санта Барбара, пред самиот да изврши самоубиство.
Пред убиството, тој објавил на Фејсбук: "Бунтот на Инцел започна! Секој Чед и Стејси ќе бидат симнати од власт! Секој го поздравува врвниот кавалер Елиот Роџер!"
Минисијан денеска е осуден на доживотна казна затвор , без можност за помилување по најмалку 25 години.