Македонија

Општина Тетово најавува дистрибуирање заштитни маски до домовите на граѓаните

Трисет илјади заштитни маски добила општина Тетово од владините институции за кои од Кризниот штаб соопштија дека дел ќе се дистрибуираат до домовите на граѓаните. Кризниот штаб денеска одржа девети состанок.

– Владата позитивно одговори на барањето на Кризниот штаб на Општина Тетово и добивме донација од 30.000 заштитни маски кои ќе бидат дистрибуирани во домовите на граѓаните, а дел од нив ќе бидат дистрибуирани и до вработените во ЈКП Тетово и Територијалната противпожарна единица, кои секојдневно вршат дезинфекција на улиците и ја одржуваат хигиената во Општина Тетово, истакна градоначалничката Теута Арифи по денешниот состанок на Кризниот штаб.

Според Кризниот штаб, во тетовскиот регион има 74 лица заразени со коронавирус. Од друга страна попладнево Министерството за здравство објави дека вкупно се 75 лица.

-Сакаме да го потенцираме фактот дека во општина Тетово се идентификувани 5 нови извори или кластери на можна инфекција со КОВИД19, па затоа е многу важно граѓаните да бидат многу внимателни и да ги почитуваат мерките и препораките на надлежните здравствени органи.

Апелираме до сите граѓани да го следат регуларниот начин на лекување, особено да се почитува здравствениот протокол на правилно презентирање на симптомите пред матичните лекари и надлежните здравствени установи, истакна Арифи.

Тетово повторно има најмногу заболени, 29 (двајца починати), општина Боговиње 26 заболени (еден починат), општина Теарце пет заболени, општина Брвеница шест заболени (еден починат), општина Јегуновце и општина Желино по четири заболени. Министерството за здравство објави дека денеска се бележи и прв смртен случај во Желино, 58-годишна жена на Клиниката за инфективни болести. /МИА

Македонија

Двајца загинати во тешка сообраќајна несреќа на патот Радовиш-Штип

Во сообраќајната несреќа што се случи на магистралниот пат Радовиш-Штип загинаа двајца возачи, а сопатничка од едното возило е пренесена во штипската Болница.

Веста за МИА ја потврди портпаролката на СВР Струмица, Александра Трајанова, која информираше дека во несреќата учествувале автомобили „пасат“ и „опел“.

- На местото на несреќата починале возачите на двете возила, а сопатничка од патничкото возило „опел" е пренесена во Медицински центар Штип, изјави Трајанова.

Увид на местото на несреќата врши јавен обвинител, а сообраќајот се пренасочува по стариот пат.

Од полицијата повеќе детали за несреќата најавуваат за утре.

Свет

Во ЕУ 7,1 отсто од вработените работат 49 или повеќе часа неделно, најмногу во Грција

Во Европската унија во 2023 година, 7,1 отсто од вработените работеле 49 или повеќе часа неделно, што спаѓа во долго работно време, покажуваат податоците објавени од Евростат.

Од земјите на Европската унија најголем удел на работници со долго работно време има Грција, поточно 11,6 отсто, потоа Кипар со 10,4 отсто и Франција со 10,1 отсто.

Најмал удел на вакви работници е забележан во Бугарија, 0,4 отсто, како и во Литванија и Летонија, по 1,1 отсто.

Речиси една третина од самовработените или поточно 29,3 отсто од оваа категорија работат 49 или повеќе часа неделно, додека кај вработените овој процент е значително помал и изнесува 3,6 отсто.

Долгите работни часови најчесто се застапени кај квалификуваните работници во земјоделството, шумарството и рибарството, како и кај менаџерите.

Како што пренесува порталот Статиста, вработените со полно работно време во Европската унија во првиот квартал од 2023 година работеле во просек по 40,4 часа неделно.

Македонија

Истражителка на ОЈО Скопје за компјутерски криминал со меѓународно признание од ИЛЕА

Меѓународната академија за спроведување на законот (ИЛЕА) во Будумпешта додели признание за работата и постигнувањата на Марина Пешовска, истражителка за компјутерски криминал од Истражниот центар на Основното јавно обвинителство Скопје.

Пешовска беше избрана како финалист во категоријата “оперативен успех” поради успешна примена на вештините за дигитална форензика во борбата против локалниот и транснационалниот сајбер-криминал.

Успехот на Истражниот центар го истакна и Амбасадата на САД во Скопје. “Американската амбасада е горд партнер на Основното јавно обвинителство Скопје во неговата борба против компјутерскиот криминал и промоцијата на одговорноста”, објави Амбасадата на САД во Скопје за признанието од ИЛЕА.

Пешовска е еден од 17-те истражители во Истражниот центар на ОЈО Скопје.

Истражниот центар е своевидно јадро на обвинителството и бројот на предмети во кои постапувале истражителите за една година е практично речиси удвоен – од 150 предмети во 2022 на над 280 предмети во текот на 2023 година. Истражителите самостојно преземаат голем број различни дејствија – прибирање документација, барања до институции, учествуваат при претреси и лишување од слобода на лица, а се ангажирани и во дејствија на меѓународна соработка со истражни органи од други земји.

Најголем дел од опремата за Истражниот центар на ОЈО Скопје е донација од Амбасадата на САД, соопштија од Обвинителството.