Нова студија: Коронавирусот сепак има сезонски карактер

Потоплото време и тропската клима навистина можат да помогнат да се намали ширењето на ковид-19, сугерира новото истражување.

Студијата открива дека местата со потопли температури и подолги часови сончева светлина, како што се земјите во близина на екваторот и оние што имаат вистинско лето, имаат пониска стапка на случаи на ковид-19 во споредба со земјите подалеку од екваторот и оние со постудено време.

Наодите се покажале веродостојни дури и откако истражувачите разгледале други фактори кои можат да влијаат на ширењето на ковид-19 до бројот на пријавени случаи, како што се нивото на урбанизација во земјата и интензитетот на тестирањето на ковид-19. Сепак, авторите на студијата нагласуваат дека нивните откритија не значат дека летното време ќе го елиминира ковид-19, но може да им помогне на луѓето да се борат против болеста.

"Нашите резултати не значат дека болеста ќе исчезне во текот на летото или дека нема да влијае на земјите во близина на екваторот. Наместо тоа, повисоките температури и поинтензивното ултравиолетово зрачење во текот на летото веројатно ќе им помогнат на мерките на јавното здравје да го контролираат САРС-CoV-2 , новиот коронавирус што предизвикува ковид-19. “, напишале авторите на трудот објавен на 27 април во списанието Scientific Reports.

Наскоро откако започна пандемијата ковида-19 во зимата 2020 година, се шпекулираше дека летните температури може да донесат олеснување. Навистина, многу респираторни вируси, вклучително и вирусите на грип, покажуваат сезонска шема, достигнуваат врв во зима и опаѓаат во лето. Научниците не знаат со сигурност зошто вирусите следат сезонски модел, но се смета дека голем број фактори играат улога. На пример, студиите сугерираат дека многу респираторни вируси се постабилни и остануваат подолго во воздухот во постудени средини со ниска влага, истакнува Live Science. Човечкото однесување, како што е собирањето во затворено во зима, исто така може да поттикне пренесување на вируси.

Лабораториските студии исто така откриле дека високите температури и влажноста го намалуваат преживувањето на вирусот САРС-CoV-2, но не е целосно јасно дали ова важи и за реалниот пренос. Во новата студија, научниците анализирале податоци од 117 земји, користејќи бројки за ширењето на ковид-19 од почетокот на пандемијата до 9 јануари 2021. Статистичките методи ја испитувале врската помеѓу географската ширина, што влијае на количината на сончева светлина, како температура и влажност, и стапки на ширење на ковид-19.

Тие исто така користеле податоци од Светската здравствена организација за да ги контролираат факторите што можат да влијаат на стапката на инфекција со ковид-19 во една земја, како што се авионските патувања, трошоците за здравствена заштита, односот на постарите кон помлади луѓе и економски развој. Откриле дека секое зголемување на географската ширина од екваторот за еден степен е поврзано со зголемување на бројот на случаи на ковид-19 од 4,3 проценти на милион луѓе. Ова значи дека земја на 1.000 километри поблизу до екваторот во споредба со друга може да очекува 33 проценти помалку случаи на ковид-19 на милион луѓе, под услов сите други фактори да бидат еднакви.

„Нашите резултати се во согласност со хипотезата дека топлината и сончевата светлина го намалуваат ширењето на вирусот САРС-КоВ-2 и преваленцата на ковид-19“, пишуваат авторите на студијата од Хајделберг институтот за глобално здравје во Германија и Кинеската академија за медицински науки во Пекинг.

Наодите исто така значат дека заканата од обнова на епидемијата може да се зголеми во текот на зимата, како што се гледа во многу земји од северната хемисфера во декември 2020 година и јануари 2021 година.

Авторите посочуваат дека нивната студија вклучувала податоци само до 9 јануари 2021 година, пред да започнат да се шират бројните варијанти на ковид-19, вклучително и соеви кои првпат се појавиле во Јужна Африка и Велика Британија, па не е јасно дали овие соеви, исто така, ќе следат сезонски модел на инфекција, заклучува Live Science.

Лазаревска: Со измените на Законот за наставници обезбедуваме сигурност за наставниот кадар

Денеска на Комисијата за образование наука и спорт овде во Собранието расправаме важни измени и дополнувања на закони од областа на образованието.

Со измените на Законот за наставниците и стручните соработници во основните и средните училишта и Законот за Бирото за развој на образованието реализираме две важни ветувања дадени пред граѓаните кои беа дел и од изборната програма на СДСМ за последните парламентарни избори.

Преку измените на Законот за наставници и стручни соработници во основното и средното образование обезбедуваме правна и економска сигурност на наставниот кадар.

Наставниците и стручните соработници отсега директно ќе се вработуваат на неопределено време доколку ги исполнат законски предвидените услови, односно, со новиот закон им се трансформира работниот однос на сите наставници и стручни соработници кои до моментот на негово стапување на сила се ангажирани на определено време, ако за тоа ги исполнуваат условите.

На овој начин би се опфатиле над 4.700 просветни работници и тоа: 1.464 наставници и стручни соработници кои во моментов се ангажирани на определено работно време до 2 години и 3.326 наставници ангажирани на определено работно време над 2 години на кои не им е трансформиран работниот однос.

Законското решение ќе обезбеди создавање на правна и економска сигурност на наставниците и стручните соработници преку засновање на работниот однос на неопределено време, подобрување на квалитетот на воспитно-образовниот процес преку воспоставување на континуитет во реализацијата на наставата, како и овозможување на професионален и кариерен развој на овие наставници и стручни соработници.

Со ова ставаме крај на неправдите кон одреден број наставници и стручни соработници кои немаа еднаков статус со нивните колеги.

Сепак јавноста треба да знае дека и покрај тоа што овие измени се во интерес на наставниот кадар, во интерес на образовниот процес и во интерес и на учениците, ВМРО-ДПМНЕ и по однос на овие измени се однесува деструктивно и работи на штета на граѓаните.

Пратениците на ВМРО-ДПМНЕ, членови на Комисијата за образование, наука и спорт денеска се противат наставниците и стручните соработници да добијат правна и економска сигурност, да се ослободат од стресот предизвикан од неизвесноста дали ќе им се продолжи работниот однос, тие се против тоа да се обезбеди континуитет во реализацијата на наставниот процес што е важно, како за самиот наставник, така и за учениците и нивните родители.

Ја уверуваме јавноста, ги уверуваме наставниците и стручните соработници дека и покрај деструкциите, измените на овие важни закони ќе бидат донесени и наскоро ќе започне и нивната реализација.

Прес- конференција, Жаклина Лазаревска, пратеничка на СДСМ

Комуналното претпријатие и вицепремиерот Груби во заедничка акција пред Рамазан Бајрам

Муслиманските верници утре го слават Рамазан Бајрам светиот месец во кој се верува дека се слави победата на верата над неверството, на доброто над злото на великодушноста над скржавоста. 

По тој повод се мијат и дезинфицираат џамиите како и просторот околу нив со цел побезбедно одбележување на празникот од ковид 19 пандемијата..

Во чистењето и дезинфекцијата што ја спроведе Комуналното претпријатие Скопје, синоќа се вклучи и првиот вицепремиер Артан Груби. Тој на фејсбук напиша:

„Вечерва заедно со општинските работници за хигиена ги чистиме, дезинфицираме и подготвуваме џамиите во Скопје во пресрет на Рамазан Бајрам“.

Како што соопшти ЈП Комунална хигиена-Скопје, направено било рачно и машинско миење на поголемите исламски верски објекти на територијата на градот Скопје како што се: џамиите Мурат Паша и Мустафа Паша во Старата скопска чаршија, Јахја паша во Чаир, џамијата Иса Бег на Бит Пазар, џамијата Дуќанџик, џамијата Хусеин Шах во Сарај и други“, се вели во соопштението.

Над 7.000 граѓани вакцинирани во штипскиот регионален пункт

Во регионалниот пункт во салата „Јордан Мијалков" во Штип досега се имунизирани над 7.000 граѓани. Само до 12 часот денеска се аплицирани 600 вакцини на кинеската „Синофарм".

Лекарката на регионалниот пункт во Штип, Дијана Коцева Миланова за МИА изјави дека од отворањето на пунктот, но и при имунизацијата на населението во пунктовите на здравствените домови во општините од штипскиот и струмичкиот регион над 10.000 граѓани примиле вакцина.

-Во нашиот пункт досега се пристигнати околу 14.500 вакцини, од кои дел се дистрибуирани и на здравствените домови во штипскиот и струмичкиот регион. Во моментов се имунизираат граѓаните над 60 години, кои имаат добиено порака од „Мој Термин" и се пријавиле на апликацијата на Министерството за здравство. Покрај вработените од штипските основни и средни училишта, од денеска се имунизираат и вработените во училиштата во Пробиштип, а од утре ќе ги вакцинираме и од Кочани, вели Коцева-Миланова.

Таа додаде дека на пунктот се примаат и лицата со хронични болести, како и вработените во останатата критична инфраструктура. Планирано е и денеска да се аплицираат над 1.500 вакцини. Во текот на денот телефонски се јавувале и граѓани над 55 години, кои имаат изразено интерес за вакцинација на апликацијата и како што вели ги информирале дека добиле порака да се имунизираат во петок, со што старосната граница почнува да се спушта.

притисни ентер