Еден ден откако младиот хрватски ракометар Денис Тот почина на КАРИЛ се уште се непознати причините за неговата смрт. Последните неофицијални информации упатуваат на тоа дека на смртта сепак и претходел инцидент. Извори од скоспкото обвинителство за Канал 5 потврдија дека тој бил нападнат во Градскиот парк во близина на дискотеката „Привилиџ“ и дека постоел кривично правен настан. Но, што точно покажале снимките од надзорните камери од околните објекти на кои, според нашите извори во обвинителството, се гледаат двајца мажи и една девојка ќе покаже истрагата, како и тоа дали евентуалните физички повреди имале влијание на смртта на 27 годишниот Тот.
„Ќе има ли пресврт во истрагата за смртта на ракоментариот Денис Тот. Што се случувало тука во Градскиот парк во близина на дискотеката „Привилиџ“ ќе биде појасно по обдукицјата на телото на починатиот.“
Како што објави порталот „Вистиномер“, на снимките се гледало како дечко и девојка излегуваат од дискотеката „Привилиџ“ и влегуваат во такси возило, а по нив тргнал и Тот кој им се обратил.По ова тие излегле од возилото и дечкото го удрил со две шлаканици, по што ракометарот веднаш паднал на земја, а девојката неколку пати го удирила со нога по главата. Младиот ракометар воопшто не се придвижил, ниту пак дал отпор. Откако виделе дека е во бесознание, двајцата се обиделе да му помогнат и да го реанимираат, но не успеале, по што избегале од местото на настанот, а такси возилото си заминало уште кога настанала расправијата, пишува порталот.
Вчера дел од хрватските медиуми објавија дека Тот бил претепан пред скопската дискотека, но ова го негираа наводите на лекарите кои кажаа дека на телото на ракометарот немало видливи траги на физичко насилство, а истото беше соопштено и од МВР. Од Карил вчера појаснија дека Тот со возило на Брза помош ноќта меѓу 6 и 7-ми април околу 4 часот по полноќ бил донесен во Ургентниот центар без срцева акција, но и по напорите за спас на неговиот живот и реанимација тој починал. По направените медицински анализи во КАРИЛ било потврдено дека во крвта немал никакви активни супстанци.
Нови официјални детали околу истрагата на МВР и обвинителството се очекуваат во текот на денот. Од двете институции најавија дека подготвуваат соопштение.