Од менаџментот на фирмата велат дека нема поголема материјална штета, ниту повредени. Мешавината од ацетат и алкохол ја користеле за процесот на производство, а пожарот избувнал во просторијата за рециклажа.
Експлозијата во „Киро Дандаро“ доаѓа во време кога Антикорупциската комисија по добиена анонимна пријава има индиции дека во ДИК се краделе државни пари. Од Комисијата за Канал 5 потврдуваат дека поднеле иницијатива до Јавното обвинителство да утврди дали вработени во ДИК местеле тендери со печатници за подготвување на гласачките ливчиња и изборниот материјал за последните четири изборни циклуси, а токму битолската печатница се избирала како најповолен понудувач во преговорите кои секогаш се воделе тајно.
Сомнежите на антикорупционерите се однесуваат на парламентарните избори во 2016 година, локалните во 2017-та, референдумот во 2018-та и последните претседателски избори оваа година. Според нивниот извештај, освен „Киро Дандаро“ во преговорите секогаш била повикувана и печатницата „Европа 92“ од Кочани за да достави понуда на затворениот оглас. Но, сопственикот на оваа печатница, Ратко Димитровски е член на бордот на директори на печатницата од Битола, што според Антокорупциска, значи дека немало тајност во понудите на двете фирми.
Според Комисијата од ДИК за сите наведени избори тврделе дека поради кратки рокови, од затворањето на Избирачкиот список до денот на спроведување избори, немало доволно време да се објавуваат тендери, па морало непосредно да се договараат со печатниците. Но, антикорупционерите сметаат дека се кршеле законите, а изборната комисија имала време да организира јавен повик и да обезбеди транспарентна постапка.
Според нивниот извештај во три изборни цисклуси од ДИК се правеле технички спецификации со кои три печатници се исклучуваат од игра, заради недоволна количина хартија, видот и големината на гласачкото ливче итн,. и се местеле условите за „Киро Дандаро“. Исклучок се локалните избори во 2017 кога од ДИК одлучиле да го сменат шаблонот и повторно на затворени прегопвори била поканета и трета печатница – „Полиестердеј“ од Скопје, која ја добила понудата.
Досега во Антикорупциска на исказ бил повикан Добре Јанчев, генералниот секретар на ДИК, бидејќи многу пати бил дел од комисијата за набавки. Од Јавното обвинителство ја известиле Комисијата дека Обвинителството за организиран криминал ќе постапува за овој случај.