Станува збор, како што рекоа, за „варварски“ чин во кој е употребен невротоксин класифициран како хемиско оружје, кој, според нивните тврдења, можел да го употреби само режимот на рускиот претседател Владимир Путин.

Навални почина на 16 февруари 2024 година, во казнена колонија во Сибир, на 47-годишна возраст. Не е познато како наводно бил администриран отровот, наречен епибатидин, пишува „Скај њуз“.

Епибатидинот е моќен невротоксин пронајден кај одредени видови отровни жаби во Еквадор. Според достапните податоци, тој е дури 200 пати појак од морфинот. Домородните племиња во Јужна Америка наводно го користат кога ловат, нанесувајќи го на стрели или дувачки пушки.

Навална: Тешко ми е да ги најдам вистинските зборови

Резултатите од истрагата ги објави Јулија Навална, вдовицата на рускиот дисидент, на прес-конференција на маргините на Минхенската безбедносна конференција. Таа беше придружувана од министрите за надворешни работи на Обединетото Кралство, Германија, Шведска и Холандија.

Овие четири земји, заедно со Франција, работеа заедно во последните месеци за да ја утврдат причината за смртта на Навални. Тие планираат да ги достават своите наоди до Организацијата за забрана на хемиско оружје (OPCW), телото на Обединетите нации одговорно за следење на спроведувањето на Конвенцијата за забрана на хемиско оружје.

„Тешко ми е да ги најдам вистинските зборови“, рече Навална на англиски, видливо потресена. Таа беше во Минхен и на 16 февруари 2024 година, кога беше објавена веста за смртта на нејзиниот сопруг.

„Тоа беше најлошиот ден во мојот живот. Излегов на сцената и реков дека мојот сопруг, Алексеј Навални, бил отруен. Што друго можеше да му се случи на непријателот број еден на Путин во руски затвор? Но, сега разбирам и знам дека ова не се само зборови. Тоа е научно докажано“, нагласи таа.

Тој беше погребан во предградието на Москва

Руските власти претходно тврдеа дека смртта на Навални не била сомнителна и дека починал од „комбинирани болести“, вклучително и нарушување на срцевиот ритам.

Британската министерка за надворешни работи, Ивет Купер, изјави дека Велика Британија и сојузниците работат „со неуморна решителност“ за да утврдат што навистина се случило.

Според достапните информации, британските научници од лабораторијата Портон Даун одиграле клучна улога во идентификувањето на токсинот. Не беше веднаш јасно како ги добиле примероците, но Навална претходно тврдеше дека примероците биле шверцувани од Русија.

Навални беше погребан во март 2024 година во предградие на Москва. „Како резултат на работата на Обединетото Кралство, Шведска и други партнери, потврдивме дека во телото на Алексеј Навални е пронајден смртоносен токсин. Тој токсин е идентификуван како токсин пронајден во еквадорските отровни жаби“, забележа Купер.

Таа додаде дека „само руската влада имала средства, мотив и можност да го употреби тој токсин против Алексеј Навални во затвор“ и дека целта на денешниот говор е „да се фрли светлина врз варварскиот обид на Кремљ да го замолчи неговиот глас“.

Шефот на шведската дипломатија: Ова е начин да се зголеми притисокот врз Русија

Германскиот министер за надворешни работи Јохан Вадефул ги детализираше ефектите од труењето со токсин, нарекувајќи го „особено моќен“ нервен агент. „Жртвите се задушуваат во агонија“, рече тој.

Шведската министерка за надворешни работи Марија Малмер Стенергард нагласи дека е клучно да се утврди вистинската причина за смртта за да се повика Русија на одговорност.

„Ова е исклучително важно за да можеме да ја сметаме Русија за одговорна за она што го прави и да продолжиме да ги разоткриваме нивните континуирани лаги. Сега ќе ги доставиме овие информации до ОЗХО. Ова е уште еден начин да се зголеми притисокот врз Русија“, тврди таа.

Кремљ сè уште не ги коментирал овие обвинувања

Владата на Путин претходно беше обвинета за обид за убиство на Навални во 2020 година со нервниот агент Новичок, истото хемиско оружје за кое се верува дека Русија го користела во Солсбери во 2018 година во неуспешен обид да ги отруе поранешниот руски двоен агент Сергеј Скрипал и неговата ќерка.

Потоа Навални го преживеа труењето и се опорави во Германија, по што се врати во Русија, каде што беше уапсен и затворен.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.