На денешниот брифинг во Владата, националниот координатор за НАТО, Стево Пендаровски посочи дека земјава, судејќи според драфт верзијата на заклучокот, ќе ја добие истата формулација како онаа со која беа поканети последните земји членки на Алијансата.
Најверојатна формулација:
*НАТО ја повикува Македонија да ги започне пристапните преговори за членство.
*Поканата, најверојатно ќе биде со истата формулација како и за Црна Гора, како последна нова членка на Алијансата и како за Хрватска и Албанија, кои беа примени на самитот во Букурешт во 2008-та, смета Националниот координатор, Стево Пендаровски.
Од Владата се убедени дека пристапните преговори до финално членство ќе завршат во наредните три до шест месеци, што се совпаѓа и со рокот за со финализирање на Договорот со Грција до крајот на годинава. На разговорите ќе му претходи план за пристапување, кој првиот човек на НАТО Столтенберг ќе го изготви и ќе испрати до македонската влада, која пак, треба да одговори со писмо за намери и изготвување на квартални Програми за членство. Од Владата сметаат дека не треба да се пролонгира процесот, со оглед на неизвесноста што може да го донесат изборите во Грција следната 2019-та. Конечниот збор ќе треба да го дадат 29-те земји членки на НАТО, по што и формално ќе се потпише протоколот за членство.
Кога сите 29 земји членки дале поддршка Македонија да добие покана за НАТО, очекуваме истото да го сторат и кога ќе треба да го ратификуваат Протоколот за членство,велат од Владата, прашани дали очекуваат некој да го блокира членството на Македонија.
Во меѓувреме, грчки Катимерини, објави дека НАТО во Брисел се очекува само да потврди дека зачленувањето на Македонија ќе зависи од реализацијата на Договорот со Грција, услов што ќе биде вметнат во членовите 59 и 60 од декларацијата. Повикувајќи се на нацрт верзијата, на која имал увид Катимерини, ваквата одлука била договорена на одвоениот телефонскиот разговор на американскиот потпретседател Пенс со Заев и Ципрас.