Делегација на Собранието на Македонија во состав: потпретседателот Антонијо Милошоски, заменик шеф на делегацијата и пратеникот Илир Хасани, заменик-член учествуваше на пролетната сесија на Парламентарното Собрание на НАТО што од 29 мај до 1 јуни се одржа во Вилнус, Литванија.

Во контекст на денешните светски безбедносни предизвици, на сесијата беше нагласена стратешката определба на сојузниците за зајакнување на одбраната и трансатлантското единство преку политичка поддршка, зголемени инвестиции и соработка, фокусирајќи се на посилна Европа и кредибилен трансатлантски сојуз.

Во рамките на Комитетите беа разгледани повеќе извештаи меѓу кои и оние кои се однесуваат на зајакнување на отпорноста на сојузниците преку пристап што го опфаќа целото општество; обезбедување на подводната инфраструктура за колективна одбрана; борба против тероризмот; зајакнување на способностите на НАТО на Северното крило; забрзување на одбранбените иновации; создавање на идните сили на НАТО; како и сајбер безбедноста и сајбер отпорноста.

На Пленарната сесија, со која и заврши пролетната сесија на ПС на НАТО, се обрати претседателот на ПС на НАТО Марко Перестрело, кој истакна дека во ова време на силни безбедносни предизвици НАТО сојузниците мора да останат солидарни и посветени на градење силен сојуз, силна Европа и силно сојузништво со САД, кои се клучни столбови на НАТО Алијансата.

Претседателот на Литванија, Гитанас Нуседа посочи дека денеска е многу важно Европа, НАТО, САД, Канада и сите демократски земји да покажат обединетост повеќе од кога било и додаде дека Литванија е посветена на сојузништвото во НАТО и на определбата за одбрана на секој дел од територијата на НАТО сојузниците.

Спикерот на Парламентот на Република Литванија Јузас Олекас нагласи дека улогата на парламентите е клучна во градењето на безбедносните политики, но и во градењето на консензус за безбедносни прашања. Тој истакна дека паралелно со јакнењето на воените капацитети, треба да се работи и на заштита на критичната инфраструктура.

Во своето обраќање литванската премиерка Инга Ругиниене информираше дека Литванија инвестира 5,35 проценти од бруто домашниот производ во одбранбената инфраструктура и нагласи дека Литванија ќе остане со Украина колку што е потребно.

На пленарната сесија се обрати и заменичката генерален секретар на НАТО Радмила Шекеринска која заедно со еврокомесарот за одбрана Андриус Кубилиус потоа учествуваше и во дискусијата посветена на тоа како да се обезбеди значаен напредок во одвраќањето и одбраната и улогата на парламентарната агенда за посилно НАТО.

Таа нагласи дека состанокот на ПС НАТО што се одржува во Вилнус, Литванија праќа порака за значењето на Балтичкиот регион за нашата трансатланска безбедност и порака дека ниту еден сојузник во Алијансата не е сам. Шекеринска нагласи дека НАТО сојузниците мора определбата да ја претворат во акција, а финансиските средства да се претворат во способност за борба, бидејќи мора да се испорача.

Преку видео обраќање се обрати и украинскиот министер за одбрана Михајло Федоров кој се заблагодари за поддршката што Украина ја добива и нагласи дека имаат можност брзо да активираат дополнителни производствени капацитети за одбрана, но предуслов за тоа е финансиска поддршка. Тој додаде дека Украина има искуство на фронтот и спремна е тоа да го сподели со своите сојузници.

Во рамки на Пленарната сесија беше усвоена и Декларација која се однесува токму на јакнењето на одвраќањето и одбраната и улогата на парламентите, која претходно беше усогласена на Постојаниот комитет на ПС на НАТО.

На маргините на состанокот, потпретседателот Милошоски имаше срдечна средба со Олександр Мережко, претседател на Комисијата за надворешна политика на парламентот на Украина, на која разговараа за актуелните политички и безбедносни состојби, при што беше нагласена поддршката што нашата држава и ја дава на Украина.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.