Мицкоски: Најважно е да останеме обединети и да не дозволиме образованието, културата и словото да станат празна форма - Канал 5

Македонија

Мицкоски: Најважно е да останеме обединети и да не дозволиме образованието, културата и словото да станат празна форма

Денес, одбележувајќи го делото на Светите Кирил и Методиј, не зборуваме само за двајца просветители, туку за темелот на една цивилизациска идеја.

Мицкоски: Најважно е да останеме обединети и да не дозволиме образованието, културата и словото да станат празна форма

Денес, одбележувајќи го делото на Светите Кирил и Методиј, не зборуваме само за двајца просветители, туку за темелот на една цивилизациска идеја, дека човекот е вистински слободен кога има право да мисли, учи и создава на свој јазик. Нивното дело не е само историски настан, туку победа на знаењето, духовноста и културата над темнината и покорувањето. Од нив започнува нашата културна и духовна преродба, продолжена преку нивните ученици и низ вековната традиција на писменоста и просветата.

Македонија низ историјата опстојувала преку словото, црквата и образованието. Од Охридската Архиепископија до Македонската православна црква, духовниот и националниот континуитет бил чувар на идентитетот и народната свест. Светите Кирил и Методиј му припаѓаат на целиот свет, но нивното дело останува доказ како еден народ се издигнувал преку борба, знаење и духовна сила.

И денес, и покрај политичките предизвици и неправдите со кои се соочува Македонија, најважно е да останеме обединети и да не дозволиме образованието, културата и словото да станат празна форма. Иднината на државата не се мери само со бројки, туку со тоа колку образовани, достоинствени и свесни генерации создава. Затоа мора да ја зачуваме вербата во знаењето, младите и сопствениот идентитет.

Го разбирам незадоволството и негодувањето кај луѓето кои сè повеќе губат трпение од испораката на правдата. Морам да кажам дека и јас не сум до крај задоволен и сметам дека може многу, многу подобро и со многу побрзи резултати. Немојте да мисли кој било од вас дека не ги слушам оние крици на луѓето кои ѝ се смеат на правдата, кои мислат за себе дека се непобедливи и дека ја измамиле правдата. Денес тие се најгласните критичари на Владата и пресоблечени измамници кои се најзагрижени за тоа дека немало правда.

Имаме отсуство кај дел од луѓето на чувство за припадност кон својот народ и подготвеност со гордост да го носат она што јас го велам – мекото ткиво на македонскиот народ. Затоа јас повикувам на народно и интелектуално обединување на државата. Тоа што некои се лидери на политички партии во опозицијата и ја имаат таа улога, не значи и дека се лидери на својот народ. Одбивајќи да се обединиме за националните прашања, тие се осудени на пропаст. Стануваат маргинални служители на туѓите интереси. Затоа вистинското обединување е народното. Затоа да се обединиме сите интелектуални кругови и да си подадеме рака. Ова е последната шанса за Македонија. Мораме да ја искористиме.

Империите се рушеле, границите се менувале, владетели доаѓале и заминувале, но словото останувало. Токму преку словото народите стануваат вечни. Затоа денес имаме обврска да ја чуваме книгата, науката и духовноста како најголема вредност. Народ што има јазик, култура и образование никогаш не е мал народ, а Македонија има со што да се гордее, со својот јазик, истрајност и дух што не се покорува.

Нека е честит и вечен празникот на сесловенските просветители Свети Кирил и Методиј!, објави на ФБ премиерот Христијан Мицкоски.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Едно лице е лишено од слобода од вкупно шест пријави за семејно насилство во последното деноноќие

Се преземаат мерки за расчистување на случаите и по нивно целосно документирање против сторителите ќе бидат поднесени соодветни пријави.

Едно лице е лишено од слобода од вкупно шест пријави за семејно насилство во последното деноноќие

На 12.06.2026 во 20:30 часот во Тетово, полициски службеници од Одделението за криминалистичка полиција при СВР Тетово го лишиле од слобода Б.А.(37) од Тетово, постапувајќи по претходна пријава од неговата поранешна 40-годишна партнерка од тетовско дека од април 2026 година, по прекинувањето на нивната врска, континуирано ја следел низ градското подрачје и телефонски ја вознемирувал од различни броеви, а откако одбила да ја продолжи врската упатувал и закани на неа и нејзиното семејство.

На 12.06.2026 во 13:45 часот во СВР Скопје, 28-годишна жена од Скопје пријавила дека околу 09:50 часот на подрачјето на Центар, нејзината 56-годишна свекрва С.О. го оштетила нивното возило „пежо боксер“ и со употреба на физичка сила ја извадила од возило и ја турнала на земја, при што се здобила со тешка телесна повреда, констатирана во ЈЗУ „Св. Наум Охридски“ во Скопје.

На 12.06.2026 во СВР Скопје, полициски службеници извршиле службен разговор со Ѓ.А.К.(53) и А.А.Р.(56), постапувајќи по претходна пријава дека на 10.06.2026 околу 23:00 часот во семејниот дом на подрачјето на Бит Пазар во Скопје, физички ја нападнале нивната 16-годишна ќерка и внука. Според пријавеното, таа и претходно била физички и психички малтретирана од нејзината мајка Ѓ.А.К., но досега не било пријавувано.

На 12.06.2026 во 19:50 часот во СВР Скопје, 37-годишник од Скопје пријави дека околу 14:00 часот пред неговиот стан на подрачјето на Бит Пазар, неговата тетка А.Н. му упатувала закани и се обидела насилно да влезе во станот, по што истурила боја пред влезната врата. Според пријавеното, таа ѝ претходно доаѓала пред неговиот дом. За настанот е известен јавен обвинител.

На 12.06.2026 во 19:45 часот во СВР Скопје, 34-годишна жена од скопско пријавила дека околу 19:00 часот во скопско село била физички нападната од нејзиниот сопруг С.Ш., со кого не живеат подолг временски период.

На 12.06.2026 во 13:10 часот во СВР Скопје, 71-годишен маж пријавил дека на подрачјето на Кисела Вода, поради претходно нерасчистени имотно-правни односи, бил физички нападнат од неговиот внук. С.О(42).

Се преземаат мерки за расчистување на случаите и по нивно целосно документирање против сторителите ќе бидат поднесени соодветни пријави.

Тагови: семејно насилство

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Автомобилизам

Кинезите тврдат дека нивниот теренец е дизајниран од поранешен дизајнер на Ферари

Нов кинески електричен теренец премногу личи на Ферари, а сега избувна спор околу неговиот дизајнер.

Кинезите тврдат дека нивниот теренец е дизајниран од поранешен дизајнер на Ферари

Кинескиот бренд „Luxeed“, кој работи во соработка со „Chery“ и „Huawei“, претстави нов електричен теренец под брендот „RX“.

Моделот веднаш привлече внимание поради својот дизајн, кој потсетува на „Ferrari Purosangue“, но и затоа што се тврди дека е дизајниран од поранешен главен дизајнер на Ферари.

Според менаџментот на брендот „Luxeed“, „RX“ е дело на неодамна вработен дизајнер кој наводно работел на водечка дизајнерска позиција во Ферари.

Сепак, директорот за односи со јавноста на Ферари за Кина јавно побара да се открие името на дизајнерот, нагласувајќи дека компанијата не го изгубила својот главен дизајнер.

Новиот „Luxeed RX“ е долг 5,02 метри и има модерни „LED“ светла, изразени браници и спортски заден спојлер.

Купувачите ќе можат да избираат од неколку дизајни на тркала и различни бои на сопирачките.

Основната верзија користи електричен мотор од 372 КС кој ги придвижува задните тркала, додека помоќната варијанта со два електрични мотори развива вкупно 586 КС и достигнува максимална брзина од 250 км/ч.

Капацитетот на батеријата сè уште не е објавен, но се знае дека ќе се користат батерии „NMC“ од кинеските производители „CATL“ и „CALB“.

Продажбата на кинескиот пазар се очекува наскоро, а останува да се види дали перформансите на автомобилот или контроверзиите околу неговиот дизајнер ќе привлечат поголемо внимание.

Тагови: ферари Luxeed

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Лишени од слобода девет возачи за безобѕирно управување возило

Сите возеле без возачка дозвола, од кои двајца малолетници, а еден и бил и под дејство на алкохол.

Лишени од слобода девет возачи за безобѕирно управување возило

Во текот на изминатото деноноќие на целата територија на државата, полициските службеници лишија од слобода девет возачи кои управувале возило без возачка дозвола, од кои двајца малолетници, а еден и бил и под дејство на алкохол. По две лица во Скопје и Прилеп и по едно лице во Кочани, Гевгелија, Кратово, Македонски Брод (малолетник) и Кривогаштани (малолетник) возеле без дозвола. Лицето во Кратово претходно учествувало во сообраќајна незгода, како и едно од лицата во Прилеп, кое воедно било и под дејство на алкохол. По целосно документирање на случаите ќе бидат поднесени соодветни кривични пријави.

Апелираме до сите учесници во сообраќајот да ги почитуваат сообраќајните правила и прописи, да не управуваат возило без положен возачки испит или доколку имаат изречена мерка за забрана за управување или доколку се под дејство на алкохол и сите заеднички да придонесеме за побезбеден сообраќај.

Тагови: возачи

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер