Мицкоски: Истрагата за трагедијата во Кочани ја води јавниот обвинител а не Владата - Канал 5

Македонија

Мицкоски: Истрагата за трагедијата во Кочани ја води јавниот обвинител а не Владата

Ние како извршна власт ќе постапуваме по налог на Јавното обвинителството, а во координација со судот. Истрагата ја води јавниот обвинител, не јас.

Мицкоски: Истрагата за трагедијата во Кочани ја води јавниот обвинител а не Владата

Јавното обвинителството, заедно со судот одредуваат какви мерки и кои лица ќе бидат опфатени, и дали треба да се приведуваат високи владини функционери, порача денеска од собраниската говорница премиерот Христијан Мицкоски, одговорајќи на пратеничкото прашање до каде е истрагата за трагедичниот настан во Кочани.

На денешната собраниска седница посветена на пратенички прашања, пратеникот на СДСМ, Митко Трајчулески, упати прашање до Мицкоски, кое се однесуваше на трагедијата во Кочани. Тој постави прашање до каде е истрагата и дали ќе има морална одговорност во однос на трагедијата која однесе 62 млади животи и над 100 повредени.

-После повеќе од еден месец можеме јасно да заклучиме дека кај највисоките владини функционери не постои морална вертикала, не постои чувство на морална одговорност и затоа денес немаме ниту една оставка од морални причини. Ова е поразително за една влада после несреќа од вакви размери и со толкав број на изгубени човечки животи. Но за моралот не се дискутира, човек или го има или го нема. Вториот заклучок е водење на селективна истрага која во суштина треба да ги заштити сегашните носители на високи позиции во Министерството за внатрешни работи, Државниот пазарен инспекторат и други институции од нивната одговорност. Моето прашање е дали свесното и тенденциозно разводнување на истрагата е со цел да се попречи правдата и да се заштитат актуелни функционери кои се директно виновни за непосредните причини за пожарот, рече Трајчулески.

Премиерот Мицкоски одговори дека истрагата за трагедијата во Кочани ја води јавниот обвинител, а не Владата.

-За пет месеци од денеска ќе почне кампањата за локалните избори. Граѓаните ќе кажат чија политичка кариера завршува, чија политичка кариера продолжува и во каков формат ќе продолжи. Истрагата ја води јавниот обвинител. Не јас, и не Владата. Ако јавниот обвинител одлучи дека мене треба да ме приведат, нека ме приведат во истиот момент. Ако јавниот обвинител одлучи дека треба да одам во затвор, ќе одам, рече Мицкоски.

Како што додаде, не знае кои лица ќе бидат опфатени во истрагата, тоа е прашање кое треба да се постави до јавниот обвинител.

-Вкупно 68 лица досега се опфатени во истрагата, од страна на јавниот обвинител. За разлика од Модуларната болница, кога гореа живи луѓе, Ласкарци, Беса транс, каде што починаа 75 наши сограѓани. Тогаш имаше нула обвинети. Дали ќе останат 68 или ќе бидат 168 не знам, тоа ќе го каже Обвинителството, не јас. Не кажувам јас, не кажува министерот за внатрешни работи. Обвинителството, заедно со судот, одредуваат какви мерки и кои лица ќе бидат опфатени. Ако обвинител каже дека треба да апси и приведува високи владини функционери од оваа Влада, ќе се слушне тоа. На крајот од денот, еден член на Владата е во притвор. Во ваше време, тоа беше невозможна мисија, додаде Мицкоски.

Тој напомена дека постапуваат истите оние обвинители и судии кои се бирани од СДСМ.

-Во однос на тоа е должен да знае дали локалот има лиценца или не, тоа треба да го знае органот кој што го издава, поточно Министерството за економија. Имале лиценца, но тоа што не била легална е друго, како што не биле важечки и легални други лиценци издавани од овој орган. Околу постапувањето по налог на Обвинителството и судот, актуелен градоначалник е во притвор. Кога зборуваме за морал, етика и водење на истраги и постапување на истие, најмалку вие имате право да зборувате. Треба да ги оставиме семејствата и родителите, затоа што кај нив болката и тагата е огромна, напомена Мицкоски.

Тагови: Христијан Мицкоски

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Фудбал

Аргентинска ѕвезда се расплака среде прошталниот говор на Меси (ВИДЕО)

Енцо Фернандез беше видливо потресен за време на прошталниот говор на Лионел Меси на стадионот „Монументал“. 

Аргентинска ѕвезда се расплака среде прошталниот говор на Меси (ВИДЕО)

Играчот од средниот ред на Манчестер Сити се расплака на теренот, а подоцна објави емотивно писмо во кое го опишува своето патување од момче кое му се восхитуваше на Меси до освојувањето на Светското првенство заедно со него.

Емоции по збогувањето на капитенот

Додека Лионел Меси го држеше својот проштален говор по победата на Аргентина од 3-0 над Бенин, Енцо Фернандез не ги криеше солзите на теренот. Видеото од 25-годишниот фудбалер и неговата реакција брзо се проширија на социјалните мрежи. „Искрено, беше многу емотивен ден, со многу измешани чувства“, им рече Фернандез на новинарите по натпреварот. „Се надевам дека Лео уживаше, многу ќе ни недостига.“

Писмо до идолот од детството

Фернандез потоа објави писмо во кое се сеќава како го идолизирал Меси како момче. Тој опиша дека му пишал како 15-годишник, кога напаѓачот накратко се пензионираше од репрезентацијата во 2016 година. „Кога рече дека си заминуваш, бев многу тажен. Бев само дете и постојано броев, споредувајќи ги твоите години со моите, за да видам дали некогаш ќе добијам шанса да играм со тебе“, напиша Фернандез.

„Размислував колку години ти остануваат и колку време ќе ми треба за да стигнам до првата лига. Сонував дека барем еднаш ќе играме заедно за Аргентина.“ Тој сон му се оствари, а најважниот момент беше освојувањето на Светското првенство во Катар заедно со својот херој.

Благодарам за поддршката

Покрај заедничките успеси, Фернандез ја истакна поддршката и менторството на Меси од неговото доаѓање во сениорскиот тим. „Дојдов со надеж дека ќе го споделам теренот со мојот идол, но наместо тоа најдов некој што ме натера да се чувствувам како дел од тимот од првиот момент“, изјави тој.

„Секогаш имаше љубезен збор, совет, прегратка или едноставно знаеше како да ме опуштиш кога беше потребно. Никогаш нема да го заборавам тоа“, додаде Фернандез. „Ти благодарам што се однесуваше вака со мене, ти благодарам за сè што ме научи и што ми дозволи да бидам дел од твојата приказна.“

Иднина без капитен

Фернандез призна дека му е тешко да ја замисли репрезентацијата без Меси во претстојните натпревари. „Денес ми е тешко да ја замислам следната средба без тебе. Да излезам на теренот и да не те видам пред мене со бројот 10“, напиша тој.

„Колку бев среќен, Лео. Тоа дете имаше толку среќа кога броеше, дури и не знаеше дали некогаш ќе стигне на време. Многу ќе ни недостигаш, Капитене.“

Тагови: Лионел Меси

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Унгарија воведува данок на богатство- сѐ ќе се оданочува, па дути и имотот во странство

Најбогатите граѓани на Унгарија ќе мора да плаќаат нов данок на богатство почнувајќи од следната година, а државата има намера да погледне многу подалеку од само парите на нивните банкарски сметки при неговото пресметување.

Унгарија воведува данок на богатство- сѐ ќе се оданочува, па дути и имотот во странство

Новиот данок ќе ги опфати недвижностите, инвестициите, акциите на компаниите, па дури и средствата што ги поседуваат унгарските даночни обврзници во странство.

Владата на премиерот Петер Маѓар предложи годишен данок од 1 процент на делот од нето-имотот што надминува 1 милијарда форинти, или околу 3,1 милиони долари.

За најбогатите, стапката ќе биде уште поголема. Граѓаните со средства што надминуваат 100 милијарди форинти, или околу 308 милиони долари, ќе плаќаат стапка од 1,5 проценти на делот од богатството над тој праг, според Ројтерс.

Недвижностите и средствата во странство исто така се земаат предвид

Се очекува даночната основа да биде многу широка. При утврдувањето на богатството, ќе се земат предвид недвижностите, инвестициите, акциите на компаниите и другите средства, вклучително и оние што се наоѓаат надвор од Унгарија.

Од друга страна, долговите и кредитите ќе можат да се одземат од даночната основа. Ова би значело дека државата не само што ќе гледа колку одредено лице поседува средства, туку и неговата нето вредност по одбивањето на обврските.

Данокот би се плаќал еднаш годишно, врз основа на даночна пријава поднесена од самиот даночен обврзник. Првата обврска треба да се утврди според состојбата на средствата на крајот на 2026 година, додека рокот за поднесување и плаќање би бил 31 август 2027 година.

Најбогатиот Унгарец има 5,5 милијарди долари

Новата мерка особено ќе го погоди самиот врв на листата на најбогати луѓе во земјата. Според листата на унгарското издание на Форбс, 28 лица имаат богатство од повеќе од 100 милијарди форинти, што ги става во категоријата за која е предвидена повисока даночна стапка.

На врвот на листата е Лоринц Месарош, бизнисмен чија бизнис империја вклучува банкарство, енергетика, туризам, градежништво и земјоделство. Неговото семејно богатство се проценува на околу 1,786 трилиони форинти, или приближно 5,5 милијарди долари.

Вториот најбогат човек во земјата е претседателот на ОТП банка, Шандор Чањи, чиј имот се проценува на приближно 2 милијарди долари.

Петер Маѓар рече дека за време на подготовката на данокот, имало обиди за лобирање против новиот данок.

- Предлагам чесно да ги плаќаат даноците - е пораката што ја испрати премиерот.

Зошто Унгарија го воведува новиот данок?

Данокот на богатство беше едно од изборните ветувања на партијата Тиса, која ја победи Фидес на априлските избори и го заврши 16-годишното владеење на Виктор Орбан.

Новата влада сега се соочува со сериозен проблем со јавните финансии. Буџетскиот дефицит на Унгарија за оваа година е проектиран на дури 7,5 проценти од БДП, додека Унгарците ветија дека ќе го намалат на три проценти до 2030 година.

Ова треба да ѝ помогне на земјата да ги исполни фискалните критериуми потребни за евентуалното воведување на еврото.

Сè уште не е познато колку пари владата очекува да собере од новиот данок. Се очекува да биде вклучен во буџетот за 2027 година, кој се очекува да биде презентиран во октомври.

Нацрт-законот веќе е објавен за јавна консултација, која ќе трае до 14 октомври, по што треба да биде доставен до парламентот.

Доколку се усвои според сегашниот план, најбогатите Унгарци ќе мора да пресметаат не само колку заработуваат, туку и колку вредат вкупно, почнувајќи од следната година.

Тагови: данок Унгарија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Судбина

Магационер бил отпуштен поради наводна кражба на два пара боксерки- сега ќе добие 12.710 евра отштета

Суд во Холандија донесе пресуда во случајот на привремен работник во магацин вработен во Темпо-Тим, на кого ќе му бидат исплатени вкупно 12.710 евра отштета откако судот утврди дека бил отпуштен без основана причина.

Магационер бил отпуштен поради наводна кражба на два пара боксерки- сега ќе добие 12.710 евра отштета

Компанијата го отпуштила поради наводна кражба на два пара боксерки „Келвин Клајн“ од магацинот каде што работел, објави „NL Times“.

Фотографија како доказ

Работникот тврдел дека долната облека ја купил неколку месеци претходно на распродажба на примероци и дека ја имал во чантата бидејќи одел во теретана по работа.

Тој доставил фотографија од јануари како доказ на која носи една од боксерките, објаснувајќи дека се продавале во пакувања од по три.

Темпо-Тим тврдел дека вработениот го прекршил правилото на клиентот дека вработените не смеат да носат или поседуваат облека од „Келвин Клајн“ или „Томи Хилфигер“ на работа.

Компанијата изјавила дека работникот не докажал дека легално ја стекнал долната облека.

Отпуштањето било незаконско

Сепак, судот утврди дека дури и евентуалното кршење на правилата за носење брендирана облека не претставува доволен доказ дека работникот имал намера да украде долна облека од магацинот.

Судот изјави дека Темпо-Тим не дала доволно причини за таков заклучок и утврди дека отпуштањето е незаконско.

На компанијата ѝ беше наложено да му исплати на работникот 6.000 евра за изгубена заработка, 1.550 евра надомест за промена на работното место и 3.000 евра за неоправдано отпуштање, плус повеќе од 2.150 евра за наплата и судски трошоци, како и камата во случај на доцнење.

Тагови: боксерки отштета

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер