Македонија

Мицкоски го прифаќа предивикот на Mицотакис за соочување за преспанскиот на НАТО самитот

Најавата на мандатарот Мицкоски дека на седницата за избор на владата свечената заклетва ќе ја даде со уставното име, кое ќе го користи за време на странските посети, не ги омекнува ставовите на грчкиот премиер Кирјакос Мицотакис. 

Во дeнешното интервју за радиото „Реал ФМ“, Мицотакис повтори дека прашањето ќе го покрене и на НАТО самитот идниот месец каде што Мицкоски ќе се нашол во непријатна ситуација, a зад Грција ќе застанеле многу сојузници. Според него, Преспанскиот договор обезбедил име за севкупна употреба, а не двојна формула, а секое оспорување на договорот ќе создаде проблеми не само со Грција, туку и со НАТО и ЕУ.

-Скопје да сфати дека не може да си игра со Атина за такво прашање, бидејќи ако земјата се стремеше кон двојно име, прашањето ќе беше затворено пред многу години. Скопје влезе во НАТО токму преку Договорот, кој има свои проблеми, меѓутоа обезбеди едно име за сите и ако ова се оспори, тогаш да знае Македонија дека ќе има големи проблеми, не само во нејзините билатерални односи со Грција, туку и во нејзините односи и во НАТО и со Европската Унија кон која има амбиција во некој момент да стане членка,- - Кирјакос Мицотакис – Премиер на Грција.

Мицкоски пак, и денеска повтори дека неговата позиција за користењето на уставното име е јасна. Вели дека е подготвен за средба со Мицотакис, но и за дебата за време на самитот на НАТО во Вашингтон и побара да се разговара врз основа на факти, не само на самитот на Алијансата, но и во Брисел.

-Се подготвувам јас. Јас сум човек кој што се подготвува и сака предизвици и би сакал да го видам и тој предизвик. Мојата позиција е јасна и тука не треба да има никој дилема. / И се додека има манипулации и двојни стандарди и се додека не се држиме до копенхагеншките критериуми и вредностите дефинирани од тројцата многу важни луѓе за ЕУ Де Гаспери, Шуман и Аденауер, нас ќе ни се случуваат вакви анахрони изјави, талибански изјави и враќање во средниот век наместо да гледаме кон иднината,- - Христијан Мицкоски – Мандатар за состав на владата .

Самитот на НАТО треба да се одржи од 9 до 11 јули во Вашингтон, а иако се очекува главна тема да биде војната во Украина, но и ситуацијата на блискиот исток, сепак грчкиот премиер Мицотакис во неколку наврати до сега најави дека ќе го покрене и прашањето за Преспанскиот договор. Сепак, Мицотакис не откри дали тоа ќе биде на посебни состаноци на маргините на самитот или пак на главната сесија.

Регион

Брнабиќ: Курти уште еднаш покажа дека не сака дијалог

Претседателката на Собранието на Србија, Ана Брнабиќ, денеска оцени дека премиерот на Косово, Албин Курти, не сака дијалог и дека се плаши од средба со претседателот на Србија, Александар Вучиќ, бидејќи има слаби аргументи.

Претседателката на Собранието на Србија, Ана Брнабиќ, денеска оцени дека премиерот на Косово, Албин Курти, не сака дијалог и дека се плаши од средба со претседателот на Србија, Александар Вучиќ, бидејќи има слаби аргументи, јави дописникот на МИА од Белград.

Коментирајќи го почетокот на новата рунда дијалог меѓу Белград и Приштина во Брисел, Брнабиќ за ТВ Пинк рече дека Курти не сака да го спроведе Бриселскиот договор и да формира Заедница на српски општини (ЗСО).

- Мислам дека Курти уште еднаш покажа дека не сака дијалог, нема интерес да направи чекор напред за Србите на Косово и Метохија да ги уживаат основните човекови права и нема намера да формира ЗСО, изјави претседателката на Собранието.

Според неа, Вучиќ не ги избегнува тие средби, колку и да се тешки и непријатни.

Високиот претставник на ЕУ за надворешна политика и безбедност Жосеп Борел синоќа на прес-конференција по билатералните средби со претседателот на Србија, Александар Вучиќ и со премиерот на Косово, Албин Курти, рече дека Курти побарал „формализација на основниот договор, да се отфрли писмото во кое поранешната премиерка на Србија, Ана Брнабиќ, кон средината на декември минатата година изрази резервираност кои се однесуваат на обврските кои произлегуваат од договорот за патот кон нормализација на односите со Република Косово, вклучително и на анексот за неговото спроведување и за испорачување на Милан Радоичиќ на правосудните органи во Приштина“.

Свет

ИДФ: Нападнавме училиште во кое се криеја терористи

Израелската армија (ИДФ) денеска ги нападна милитантите на Хамас кои беа во училишниот комплекс во Кан Јунис, кој служеше како команден центар на групата.

-Борбени авиони на израелските воздухопловни сили, управувани од Јужната команда, ги нападнаа терористите кои се наоѓаа во училишниот комплекс „Ал Хасана“ во областа Кан Јунис. Терористите на Хамас планираа, режираа и изведоа бројни терористички операции додека беа на училиште, се вели во соопштението на ИДФ.

Во нападот беа направени најмногу напори за да се избегнат цивилни жртви.

Забава

Ана Ванчевска и Алексеј Ивановски ќе нѐ претставуваат на Детската евровизија во Шпанија

По одржаната аудиција, Македонската радио-телевизија, ги избра Ана Ванчевска и Алексеј Ивановски за претставници на Република Македонија на годинашниот „Јуниорски евросонг“. 

Музичкиот натпревар ќе се оддржи на 16 номеври во Мадрид, Шпанија, информираат денеска од МРТ.

- Ана и Алексеј со извонреден талент и хармонични гласови го привлекуваат вниманието на љубителите на музиката насекаде. И покрај нивната возраст, имаат неверојатни гласовни способности што никого не оставаат рамнодушен, наведуваат од МРТ.

Двајцата се родени во Битола, учествувале на голем број музички фестивали.

- Таа е родена на 3 мај 2010 година, извонредно талентирана млада пејачка која веќе се прослави со учество и освоени први места на голем број музички фестивали. Нејзиниот моќен глас и неверојатни изведби ги воодушевуваат публиката и судиите, прикажувајќи ветувачка иднина во музичката индустрија. Посветеноста и природниот талент на Ана, ја прават извонреден изведувач и инспиративен млад уметник. Годинава беше избрана за единствена претставничка на Македонија на престижниот меѓународен фестивал „Сан Ремо јуниор“ Италија. Покрај музичкиот успех, Ана е посветен ученик и добитник на бројни државни награди по математика, физика и француски јазик и е вклучена во реализација на многу проекти, се додава во соопштението до јавноста.

Алексеј е роден на 7 декември 2011 година.

- Тој е исклучително талентиран млад пејач, кој учествувал и победил на бројни музички фестивали. Неговиот волшебен глас и импресивно сценско присуство го издвојуваат, правејќи го истакнат изведувач со светла иднина во музичката индустрија. Алексеј е активен на бројни општински, регионални и државни натпревари по предметите математика, англиски и француски јазик, од каде има освоено голем број први места. Сака да плива, да шета во природа и да се дружи. Тој многу ги сака животните и дел од своето време посветува на грижата за нив, пишува во соопштението.

притисни ентер