Не заборавајте дека фотелјата не е поудобна од гајбата пред кооперација, а уличниот макадам од килимот по хотели и канцеларии – им порача премиерот Христијан Мицкоски на партиските функционери во обраќањето на свеченоста по повод 35 годишнината од основањето на ВМРО-ДПМНЕ што се одржа синоќа во Хераклеја. Ги посоветува и да не заборават од каде се дојдени, кому му служат и дека еден ден ќе треба да се вратат меѓу своите соседи.

-Најскапата работа што еден човек може да му ја остави на своето потомство не се парите и имотот, туку честа и чистиот образ. Не смеат функционерите да заборават дека макадамот по селата е поавтентичен и помек од килимот по скапите хотели и канцеларии. А фотелјата е секогаш понеудобна од гајбата пред кооперација, зашто таму извира твојата моќ и твојата цел. Токму затоа, сите функционeри во нашата партија треба да бидат свесни дека она што го работиме не е лична игра, туку служба. Клупата во вашите маала, е таму каде еден ден пак ќе се вратите и луѓето таму да ги погледате гордо в очи, а не да се срамите и криете од нивните прекорни погледи, - Христијан Мицкоски- премиер.

Мицкоски во текот на своето обраќање посочи дека владата предводена од ВМРО-ДПМНЕ работи на санирање на штетите од минатото, на создавање стабилна и предвидлива економија, на отворање на нови работни места, подобрување на услови за сите работници, посебно младите, земјоделците и пензионерите.

Премиерот се осврна и на надворешната политика при што укажа дека надворешна политика е принципиелна и се темели на заштита на заедничка историја, култура и идентитет.

-Македонија нема повеќе да биде земја на понижување и предавство. Нашата надворешна политика е достоинствена, принципиелна и се темели на заштита на нашата заедничка историја, култура и идентитет. Не можеме да дозволиме да не кодошат во странство оние кои треба да бидат чувари на националните интереси. И да не мислат дека ветувањата за отстапки, деградации и понижувања ќе ги донесат повторно во Владата. Народот е свесен и нема да дозволи повторно да биде измамен. Она што Венко Филипче го направи во Атина само не потсети дека кодошењето на сопствената земја не е туѓо и не смее да се заборави, за да не се повтори- изјави Мицкоски.

На обраќањето на Мицкоски со реакција се јави претседателот на СДСМ, Венко Филипче. „Најдоброто допрва доаѓа“, оценува тој, е најлошиот слоган за кампања и потценување на интелигенцијата на граѓаните по четири години локална власт и една година централна власт.

-Тоа што Мицкоски пробува да воспостави авторитарна диктатура во Македонија и тоа што на меѓународна сцена беше откриена таа негова намера не е „кодошење“ туку патриотизам. ВМРО, НОБ и АСНОМ се генеза на борци против диктатура, авторитарни режими и врховисти. Да се биде авторитарен значи да се биде врховист, а никако патриот. Врховизмот во начинот на владеење на Мицкоски е најголемото предавство кое може еден Македонец да го направи. – стои во реакцијата на - Венко Филипче- претседател на СДСМ..

Од ВМРО ДПМНЕ пак, му одговорија дека кога зборува, јавноста не слуша план, туку ехо од Дубаи. Му порачуваат на Филипче наместо да навива против Македонија, конечно да го прифати фактот дека времето на шминка, лажни пресови и празни флоскули завршило.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.