Живот

Масовно убиство на кучиња и мачиња низ Македонија

Анима Мунди предупредува дека суровата појава на убиства и труење на улични кучиња и мачиња може да биде опасна и за луѓето. Тие апелираат да се забрани продажбата на отров и да се најде похуман начин на решавање на проблемот со бездомните животни. Насилството врз животните е срам!

„Обесени кучиња, животни за кои монструм поставил стапици и за кои понатаму поставува се призор со кој се соочија граѓани од Ново Лисиче, кои со денови ги барале маалските миленици.

Тие својот последен здив го испуштија зад Фудбалски сојуз на Македонија, со сајли околу вратот кои при секое движење и обид да се извлечат затегаат се повеќе; умирале во болка од задушување и прережан грклан, бавно но сигурно, без да имаат било каква шанса да се спасат. Сликите се од Сивче, Брзи и Миле, маалски кутриња и верни пријатели на многу локални жители.


Сајлите се поставени на локација каде секојдневно шетаат граѓани, деца и се исклучително опасни – за тоа колкав е ризикот од нив кажува Иван Вучетиќ, секретар на ловно друштво „Елен“ од Струмица – тој вели дека доколку со глава падне дете тоа не би имало никаква шанса да се спаси и преживее. Поточно тврди дека кога ќе се затегне стапицата нема спас.

Настанот го пријавивме во полиција која наводно врши истрага – колку врши говори фактот што сајлите и понатаму се поставуваат, поточно во моментов зад Фудбалски сојуз на Македонија се поставени дупли сајли, стапици со кои на најсуров можен начин се убиваат животните.


Што уште треба да се случи за да полицијата ја сфати сериозноста на оваа ситуација и превземе истрага и сериозни чекори да ваквите дела - кои може да ги направи само психопат - се констатираат а сторителот биде санкциониран, најстрого казнет?!!



МАСОВНО ТРУЕЊЕ НА ЖИВОТНИ ВО МАКЕДОНИЈА



По трите несреќни случаи на угризи од кучиња , кои без исклучок и со потврда и од Агенција за храна и ветеринарство беа предизвикани од кучиња со сопственик , а ниту едно бездомно куче; во кои како пресуден по одговорност (согласно закон) е човечки фактор, ова е сликата на улиците на Македонија!

Отрови кои за 10 минути би убиле и човек се расфрлани по градови и села, на шеталишта, покрај училишта и градинки; наменети за маалски кучиња и мачки кои се тетеравеле, плукале крв, се угушиле во сопствените повраќаници пред очи на растревожени минувачи и неретко деца!


Труењата се случуваат истовремено, синхронизирано и веруваме дека удел имаат и општините. Порачуваме итно да запрат и итно да преземат мерки за истрага и приведување на сторителите, кои вршат повеќе прекршоци и сериозно кривично дело, казниво со казна затвор!

По масовната паника и хистерија која завладеа небаре кучињата се главна опасност во државата, без при тоа да се види статистика која укажува дека се ова изолирани случаи и напади од кучиња со сопственик (научени да бранат или напаѓаат), т.е. дека многу побројни се несреќи предизвикани од насилници, силувачи, педофили и слично, живееме во околности каде отровот ги убива оние кои се недолжни, кои се на улица не по своја вина, кои се нашле во погрешно време на погрешно место зошто друг избор немаат. Потенцираме прашање е на време кога од отровите ќе настрада човек или дете зошто за жал во Македонија отрови слободно се купуваат и масовно злоупотребуваат, а за тоа никој не одговара!


Ги повикуваме институциите – Министерство за внатрешни работи, Агенција за храна и ветеринарство, Единиците на Локална Самоуоправа итно да постапат, изнајдат хумани и ефикасни начини за надминување на проблемот со бездомни животни; да се укине слободната продажба на отрови кои се опасност за сите; да се најде решение за формирање на Полиција за животни зошто е повеќе од очигледен фактот дека насилството врз животните е декаден срам и обележје на Република Македонија!“ соопштија од АНИМА МУНДИ.



Македонија

Велики Четврток - почнуваат велигденските празнувања

Денеска е Велики Четврок - на овој ден рано наутро пред изгрејсонце се вапсуваат  првите велигденски црвени јајца.   

Вапсањето на црвени јајца за Велигден е најраспространетата традиција во целиот христијански свет. Велигденското јајце го симболизира Христовото воскресение. А црвената боја има симболика на победата, кога Синот Божји со своето воскресение ја победил смртта.

„Човекот го изразува преку симбоиката на вапцаното јајце онака како што тоа го направила Марија Магдалена пред римскиот цар кога му поклонила едно јајце, затоа што јајцето бил подарок кај Евреите, оној најскромен подарок што може да се даде, а симболиката на црвената боја е победата , односно победата на живтото на смртта, на воскреснатиот врз демонот, ѓаволот и злото.“- Отец Сашо

Екипата на Канал 5 рано утрината беше во домот на Лиле Цветковска, која раскажа за долгогодишната традиција во нивниот дом.

„Јас по традиџција од мојата мајка со лушпа кромид ги врзуам јајца, црвените веќе ги вапцав... а овие ги пуштаме во која боја сакаме....Па ние како деца кога ќе станвме веќе мајка ми ги имаше вапацано јајцата...“- Лиле Цветвковска

А откако ги завршуваат домашните обврски и ги вапсаат јајцата, граѓаните велат секоја година како за Велигденските, така и за сите други празници одат во најблиската црква, да си земат осветена вода, а денеска на Велики Четврток и брашно и зејтин.

„Прво три едно господово нели за куќата, за домот и другите сите обично во четврток јас сите ги фарбам... Првпат земам и брашно и зејтин, не сум земала досега...“

„Сабајлето како што е традицијата да... дојдов да си запалам свеќи за здрваје....“

„И вечер ќе дојдеме да се протнеме и да оставиме јајце, како е редот, обичаите како налагаат така ќе биде...“

„Иако не сум баш добра на сета сила станав и ги направив....“

„Секоја година доаѓаме, секоја година си фарбаме јајца си ги тераме редовите како што треба...“

Велики Четврток денот од Страдалната седмица, е ден кога почнуваат велигденските празнувања. Ден кога Исус Христос бил предаден и осуден.

„Исто така Велики Четврток е денот кога се извршува светата тајна или освештение, се осветува елеј, зејтин и тогаш верниците знаат си носат зејтин во црквата и после литургијата се извршува таа света тајна и си понесуваат во своите домови, тоа е всушност оној зејтин со кој се помачкуваат преку цела година кога имаат и духовна и телесни потреби.“- Отец Сашо

Утре е Велики Петок, најтажниот ден во Христијанството, кога бил распнат Исус Христос. На Велика Сабота на полноќ се чека радосната вест за Христовото воскресение, по што верниците се поздравуваат со „Христос Воскресна“ - „Навистина воскресна“.

Македонија

Зголемен бројот на работници во индустријата

Бројот на работниците во индустријата во март годинава во однос на март минатата година е зголемен за 1,7 отсто, а за 1,9 отсто во првиот квартал споредено со истиот квартал лани, објави денеска Државниот завод за статистика. 

Во секторот Рударство и вадење на камен во март 2024 година, во однос на март 2023 година, бројот на работниците е зголемен за 5,6 проценти, во секторот Преработувачка индустрија пораст од 1,5 проценти и во секторот Снабдување со електрична енергија, гас, пареа и климатизација пораст од 0,7 проценти.

Според главните индустриски групи, бројот на работниците во индустријата во март годинава во однос на март минатата година, бележи пораст кај Енергија за 4,3 проценти, Капитални производи за 16 проценти и Tрајни производи за широка потрошувачка за 11,5 проценти, додека опаѓање бележи кај Интермедијарни производи, освен енергија за 7,1 процент и Нетрајни производи за широка потрошувачка за 3,9 проценти.

Македонија

Денеска нов обид да се намалат цените на осигурителните полиси

Во пресрет на конечната одлука дали ќе продолжиме да плаќаме поскапо осигурување за 15 отсто при регистрација на возилата,  Агенцијата за супервизија на осигурувањето и Групацијата на осигурителните компании и натаму со спротивставени ставов

Од Агенцијата уште еднаш потенцираа дека зголемувањето на цените е неоправдано и оттаму ја охрабрија Владата, преку измени на тарифникот – да ги намали цените на полисите.

Според анализата на Агенцијата, 10 осигурителни компании оствариле добивки за 2023 година, а само една завршила со загуба од работењето. Според супервизорите, со зголемена цена, ќе се создаде комфорна зона во работењето на компаниите, без да се насочат на иновации и подобрување на ефикасноста.

-Зголемувањето на цената на осигурувањето не е во функција на јакнење на заштитата на осигурениците. Тоа е само и исклучиво во функција на покривање на трошоците за оперативно работење на компаниите за осигурување. – Агенција за супервизија на осигурување

Со спротивен став излегоа од Групацијата на осигуритените компании при Стопанската комора. Тие реагираат дека Комисијата за автомобилска одговорност 15 години не извршила корекција на цените, кои според Националното биро за осигурување, се неодржливи. Велат дека осигурителната индустрија во делот на осигурување лани претрпела загуба во износ од 176 милиони денари.

-Јавноста треба да биде запознаена со податокот дека имаме најниска цена за авто осигурување во регионот. Во изминатите години имаме раст на цените на автомобилите од 70% - 100%, на резервните делови за 100%, на платите за 83%, индексот на трошоците на живот од 2008 до 2023 година е зголемен за 52,83%, нето трошоците за спроведување на осигурувањето за 215%, што ги прави неодржливи цените на автомобилското осигурување. – Групација на осигурителни копмании при Стопанска комора

Поскапувањето на полисата за осигурување стапи на сила од минатата недела и граѓаните плаќаат од 840 па до речиси 1600 денари поскапа цена, во зависност од моќноста на возилото.

притисни ентер