Мароко остро ги осудува изјавите на Европскиот парламент

На 23 јануари 2023 година, мароканскиот парламент објави дека е донесена одлука да се преиспитаат релациите со Европскиот парламент 

На 23 јануари 2023 година, мароканскиот парламент објави дека е донесена одлука да се преиспитаат релациите со Европскиот парламент и истите да се стават на целосна проценка, со цел да се преземат соодветни чекори како реакција на последните не толку пријателски позиции на Европскиот парламент кон Мароко.

Ова соопштение беше дадено во изјава објавена во понеделникот, по завршувањето на заедничката средба на двете комори на мароканскиот парламент, на која се обратија претседателите и претставниците на различните парламентарни групи, како и пратениците без политичка припадност.

Со ова, мароканскиот парламент ја осуди штетната кампања кон Кралството, чиј последен резултат беше резолуцијата од 19 јануари 2023 година, изгласана од страна на Европскиот парламент.

Мароканскиот парламент исто така одлучи да го информира Претседателството на европскиот парламент за забелешките од оваа средба, објаснувајќи ги притоа позициите и говорите на различните парламентарни групи, како и одлуките кои ќе следат како реакција.

Кон острата осуда се приклучи и Врховниот совет на судската власт на Мароко, кој во саботата исто така жестоко ги осуди неоснованите обвиненија содржани во резолуцијата на Европскиот парламент, усвоена во четвртокот, на 19 јануари 2023 година.

Врховниот совет во официјална изјава соопшти дека забележува поткопување на независноста на мароканското судство во резолуцијата на Европскиот парламент, која содржи сериозни обвинувања и наводи.

Овие неосновани обвинувања ги извртуваат фактите и сеат сомнежи за легалноста и легитимноста на судските процедури, од кои дел веќе остро беа осудени и отфрлени, додека дел сеуште се под разгледување и ќе добијат одговор.

Од таа причина Советот ја изрази својата жестока осуда на неоснованите обвинувања кои се содржат во резолуцијата на Европскиот парламент.

Советот исто така изрази жалење поради ова извртување на фактите во контекст на судења кои биле целосно спроведени во согласност со законот, со уставните права и меѓународните стандарди за фер судење.

Советот жестоко го отфрла овој пристап усвоен од страна на Европскиот парламент, кој неосновано си зема за право да го оценува мароканското судство на бесрамно непријателски начин, прејудицирајќи ги институциите на судството во Кралството и на тој начин нарушувајќи ја нивната независност, се наведува во продолжение на изјавата.

Што е уште поважно, Советот целосно го отфрла мешањето во судските процеси или обидите да се влијае на судските одлуки, особено што некои од споменатите судски спорови се сеуште во тек.

Во својата изјава Советот нагласи дека ова е во спротивност со сите меѓународни норми и стандарди, вклучувајќи ги принципите и декларациите на Обединетите нации во врска со независноста на судскиот систем.

Советот остро го критикува повикот вклучен во резолуцијата кој вели да се направи притисок на судскиот авторитет неодложно да ги ослободи наведените личности и оценува дека ова претставува опасно прекршување на независноста на правдата, како и обид за влијаење врз судскиот авторитет, особено што дел од наведените судски случаи се сеуште под истрага.

Арапскиот парламент исто така изрази „остро незадоволство“ кон она што тие го нарекоа „континуирано бесрамно мешање“ на Европскиот парламент во внатрешните работи на Мароко.

Институцијата го отфрли користењето на човековите права и „невистинитото и неосновано“ обвинување од страна на Европскиот парламент, со цел мешање во судскиот систем на арапските држави.

Арапскиот парламент исто така ги отфрли сите надворешни обиди за мешање во работите на арапските држави, со барање Европската унија „веднаш да сопре со набљудувачката улога на човековите права во арапските држави“ и да ја верификува точноста на информациите кои ги добива.

Изјавата исто така го поттикнува Европскиот парламент да ги почитува партнерството и релациите со арапските држави, особено со Мароко, наведувајќи дека приоритетот треба да биде ставен на состојбите со имигрантите, бегалците и малцинствата во нивните граници.

Оваа изјава беше завршена со молба од страна на пратениците на мароканскиот парламент да не се користат човечките права во политички цели.

Извори:

https://northafricapost.com/64588-moroccos-cspj-strongly-condemns-allegations-in-european-parliaments-jan-19-resolution-as-unfounded.html

https://www.farodiroma.it/magistrati-marocco-parlamento-europeo/

https://www.capital.gr/diethni/3694112/to-marokino-koinoboulio-tha-sunedriasei-gia-na-antidrasei-stis-epikriseis-tis-ee

https://news.eseuro.com/noticias/1356848.html

Во САД денеска е „Супер вторник“, најважниот ден во трката за претседателските избори

Во САД денеска е таканаречениот „супер вторник“, што е најважниот ден досега во трката за претседателските избори, кои ќе се одржат во ноември годинава.

Денеска гласачите во 15 сојузни држави и една територија надвор од САД ќе избираат кандидати за претседател.

Тоа треба да понуди увид во силата и потенцијалните слабости на поранешниот и актуелниот претседател Доналд Трамп и Џо Бајден, кои се очекува да ги одмерат силите во ноември во обид за уште еден мандат во Белата куќа.

„Супер вторник“ е денот кога повеќето сојузни држави гласаат за кандидат за претседателски избори.

Изборите за номинација ќе се одржат во Алабама, Алјаска, Арканзас, Калифорнија, Колорадо, Мејн, Масачусетс, Минесота, Северна Каролина, Оклахома, Тенеси, Тексас, Јута, Вермонт, Вирџинија и американската територија Американска Самоа. Републиканските избори ќе се одржат во сите овие 15 сојузни држави, додека демократите ќе гласаат во истите држави освен во Алјаска. Исто така, ќе бидат познати и резултатите од Демократската партија во Ајова.

Врз основа на резултатите од секои избори, партиските функционери познати како делегати се доделуваат на првите кандидати. Потребен е одреден број делегати за официјално да се номинираат кандидати на конвенцијата на секоја партија ова лето.

Околу една третина од вкупниот број на делегати - 865 републиканци и најмалку 1.420 демократи - ќе се изберат на Супер вторник. Кампањата на Трамп предвидуваше дека тој ќе освои најмалку 773 делегати на денот и ќе ја добие номинацијата подоцна во март. Тој во моментов има околу 244 делегати, додека неговата републиканска противкандидатка Ники Хејли има 43.

За да се добие републиканската номинација потребни се минимум 1.215 делегати, додека 1.968 се неопходни за демократите.

Доналд Трамп, републиканскиот фаворит, се надева дека конечно ќе го исфрли својот последен преостанат предизвикувач од трката, Ники Хејли.

Од друга страна, кампањата на Бајден доживеа неуспех во Мичиген на 27 февруари, кога 13 отсто од гласачите се изјаснија како „неопределени“ среде кампањата за регистрација за гласање поради поддршката на претседателот за Израел во врска со војната во Газа.

Комисиска расправа по Предлог-законот за нефер трговски практики

Предлог-законот за забрана на нефер трговски практики во синџирот на снабдување на земјоделски и прехранбени производи во второ читање е ставен на дневен ред на денешната 75. седница на Комисијата за европски прашања закажана за 13 часот. 

Членовите на оваа собраниска Комисија се очекува да дискутираат и за Предлог законот за управување со конфискуван имот, имотна корист и одземени предмети во кривична и прекршочна постапка.

Предлог-законот за забрана на нефер трговски практики во синџирот на снабдување на земјоделски и прехранбени производи треба да помине и на собраниската Законодавно-правната комисија, за потоа пратениците да расправаат за него на пленарна седница.

Како што стои во образложението објавено на собраниската веб-страна, со донесувањето на Предлог законот се очекува да се постигнат позитивни ефекти во деловното работење кај сите оператори (купувачи и добавувачи), кои се активни во синџирот снабдување со земјоделство и храна во различни фази на производство, преработка, маркетинг, дистрибуција и малопродажба на земјоделски и прехранбени производи и соодветна примена на забраните на нефер трговски практики во синџирот на снабдување на земјоделски и прехранбени производи.

Со Предлог законот, како што се посочува во образложението, се обезбедува начинот за поефикасни контроли и надзор на Комисијата за заштита на конкуренцијата која добива дополнителна надлежност.

-За таа цел, Комисијата е должна сите нејзини акти да ги усогласи со одредбите на овој предлог и да обезбеди потребни ресурси на технички, технолошки и квалификуван кадар за правилна и непречена контрола на одредбите во предлог-законот, во рок од шест месеци од денот на негово влегување во сила. Предлог на Законот има за цел да ја регулира постапката за изведување докази и прекршочната постапка, да утврди висината на глобата за сторен прекршок и решенијата кои Комисијата ги донесува, за одлучување по прекршок, се вели во образложението на Предлог-законот.

Надлежните очекуваат да се стави крај на нелојалната конкуренција во трговијата и дека овој закон ќе доведе до намалување на цените на прехранбените производи.

Министерството за економија токму поради тоа не ја продолжи одлуката за гарантирани цени која важеше до 29 февруари.

Голем број прехранбени производи со ознаката „гарантирана цена“ од 20 септември лани се продаваа во маркетите по цена за 10 проценти пониска од износот на 1 август 2023 година, согласно одлуката на Министерството за економија, чија важност заврши на 1 март.

Директорот на Државниот пазарен инспекторат, Горан Трајковски во петокот на прес-конференција рече дека нивните првични информации покажуваат дека дел од маркетите ги немаат зголемено цените, но дел ги имаат. Посочи дека е можно извесно зголемување на цените, но апелираше на општествена одговорност на трговците на големо и трговците на мало. Toј потенцира дека не можат да влијаат на цените, но оти верува дека дел од големите ланци на маркети ќе прават акции со кои ќе има намалувања на одредени прехранбени производи.

На дневн ред на оваа седница се и Предлог на законот за управување со конфискуван имот, имотна корист и одземени предмети во кривична и прекршочна постапка, Предлог на законот за Канцеларија за поврат на имот, Предлог на законот за финансиски инструменти, Предлог на законот за проспекти и обврски за транспарентност за издавачите на хартии од вредност и Предлог на законот за правда на децата, сите во второ читање.

Од Министерството за правда информираа дека целта на Предлог на законот за управување со конфискуван имот, имотна корист и одземени предмети во кривична и прекршочна постапка е да се овозможи брза и ефикасна постапка во која конфискуваниот имот со правосилна судска одлука успешно ќе се продаде и ќе се овозможи враќање на криминално стекнатите средства и имот.

-Успешната конфискација означува успешно завршување и заокружување на претходно водените постапки пред јавните обвинителства, пред другите органи и пред судовите, потенцираа од Министерството.

Со новото законско решение, посочуваат од Министерството за правда, се надминуваат утврдените проблеми, преку воведување на нови механизми согласно европските и меѓународните стандарди за постапување со оваа материја.

Комисијата за европски прашања ќе ја одржи и 74. седница, на која дневен ред се Предлог на законот за изменување на Законот за управување со електрична и електронска опрема и отпадна електрична и електронска опрема, Предлог на законот за изменување и дополнување на Законот за проширена одговорност на производителот за управување со посебните текови на отпад, и двата по скратена постапка.

Снег на повеќе патни правци, укината забраната за камиони на Пресека

Забраната за тешки товарни возила на превојот Пресека што беше воведена во текот на ноќта поради обилни снежни врнежи, од утрово во 06:30 часот е укината, соопшти АМСМ.

Сообраќајот на државните патишта се одвива непречено, по влажни коловози. Врнежи од снег има на Буково, Ѓавато, Пресека и Крушево, послаби врнежи на Попова Шапка, Дебар и Плетвар.

Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.

АМСМ потсетува на законскатра обврска за задолжително поседување на зимска опрема во возилата, без оглед на моменталната временска состојба. Оваа обврска ќе трае до 15.03.2024 година.

притисни ентер