Специјалната претставничка на Обединети нации во Авганистан, Дебора Лајонс изјави дека по преземањето на власта од страна на талибанците, огранокот на Исламска држава – Корасан е проширен и сега е присутен во речиси сите 34 провинции во земјата.
Таа пред Советот за безбедност на ОН изјави дека одговорот на талибанците на проширувањето на ИД-К во голема мера се потпира на вонсудскиот притвор и убиствата на осомничените борци.
– Ова е област која заслужува поголемо внимание од меѓународната заедница, нагласи Лајонс.
Нејзините коментари уследија неколку часа откако терористичката организација ИД-К, идеолошки непријател на талибанците, ја презеде одговорноста за двете експлозии, при што загина едно лице, а шестмина беа повредени во шиитска муслиманска населба во Кабул.
Талибанците не можат да го запрат подемот на ИД-К. Некогаш ограничена на неколку провинции и главниот град, ИД-К сега е присутна во речиси сите провинции и е се поактивна, посочи Лајонс, додавајќи дека бројот на напади од групата се зголемил од 60 во 2020 година на 334 оваа година.
Таа повторно предупреди на хуманитарната катастрофа бидејќи доаѓа зима во услови на пропадната економија и последиците од сушата и ја повика меѓународната заедница да најде начини за финансирање на платите на здравствените работници, наставниците и хуманитарните работници. Лајонс нагласи дека сегашната хуманитарна помош е недоволна.