Поради коронакризата оваа учебна година заврши надвор од училишните клупи, но целата неизвесност која ја создаде вирусот во овој период не ги одложи запишувањата во средните училишта, кои веќе почнаа да ги формираат новите генерации.Запишувањата се одвиваат под посебни заштитни протоколи, односно таканаречените „коронауслови“, а децата и родителите се придржуваат до истите.
Кризата со корнавирусот ги реорганизираше и го промени начинот на запишување во средните училишта. Но раководителите уверуваат дека се оди во најдобар ред.
Оваа година повторно најистакнат е интересот за медицинските училишта и гимназиите кај полуматурантите, но сепак забележителен е и порастот на заинтересираност за стручните училишта. Директорката на ГУЦ, Атина Томовска смета дека ќе се исполни капацитетот на ученици, поготово во стручните смерови.
Можеме да речеме дека сме задоволни особено во паралелките во висока градба и дизајнери, нешто е помал интересот во геодетската и градежната струка, но сепак сметам дека е добро за прво пријавување. Нашите техничарки струки, сметам дека се на добар пат и дека конечно можеби луѓето сфатија колку е неопходно да се фаворизираат стручните училишта во нашата држава, вели Атина Томовска-директорка на ГУЦ.
Канал 5 го посети и уметничкото училиште Лазар Личеновски кое денеска го заврши првиот дел од приемниот испит.
-Ова училиште е единствено од ваков тип во нашава земја, од значаен интерес е и има пријавени ученици од секаде во Македонија. Се беше во најдобар ред, имаме обележано на два метра да влегуваат учениците, сите учесници кои што дојдоа ги запазија сите мерки, така да немаше ниту гужва, вели Александра Таневска – психолог.
Приемен испит ќе има исто и во училиштата каде што се пријавуваат повеќе ученици од капацитетот на истото. Ќе биде организирано квалификационо тестирање од предметите значајни за струката.