Хроничниот недостиг на судии, обвинители, помошници и ИТ експерти влијае врз испорачувањето на судските случаи навреме, како и на квалитетот на одлуките – порача евроамбасадорот Михалис Рокас од денешната конференција посветена на потребните промени во правосудството. Довербата од јавноста во него, како што кажа, останува ниска, а последните податоци од „Евробарометар“ покажуваат дека само 28 проценти од граѓаните ја перцепираат независноста на судството како праведна или многу добра.

-Судската ефикасност не може да се постигне без адекватни и предвидливи ресурси. Со државниот буџет за 2025-та и неговите додатоци уште еднаш се потфрли за обезбедување доволно финансии за правосудниот сектор. Само 0,3 или 0,29 проценти од БДП се распределени далеку под законски потребните 0,8 проценти. Ова хроночно недоволно финансирање ја ослабнува институционалната независност и го ограничува капацитетите на системот да испорача правда, изјави Рокас.

Судството што е кадровски ослабено, организациски нерамномерно оптоварено или финансиски ограничено тешко може да биде навистина независно, смета претседателот на Судскиот совет, Александар Камбовски. Минстерот за правда Филков пак, решението го гледа во дигитализацијата и човечките ресурси..

-Министерството за правда, во текот на 2024 и 2025 година утврди алармантни состојби во правосудството, кои директно кореспондираат со идентификуваните слабости во Патоказот. Реформите мора да обезбедат пополнување на работните места, модернизација на инфраструктурата, зајакнување на институционалниот интегритет и зголемување на довербата на јавноста преку транспарентност и високи етички стандарди, порача министерот Филков.

-Кај нас пак зависноста од министерството за финансии за секое ново вработување, па дури и за пополнување на одамна испразнети работни места создава системиски застој. Финансиската независност на судството не е привилегија туку претставува предуслов за одговорност, професионализам и борба против корупцијата. Судството што самостојно планира и одговара за своите ресурси е судство што може да биде повикано и на одговорност за резултатите, изјави Камбовски.

И претседателот на Врховниот суд Африм Фидани е на став дека судството треба да има финансиска независност со зголемување на кадровската екипораност во сите судови, но забележува дека за законите и измените кои се носат како што беа за Судскиот совет и новите измени на КЗ, треба да биде прашан и Врховниот суд.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.