Долгогодишниот експерт за европски политики Драган Тилев во изјава за Канал 5 наведува неколку негови предлози за проактивен однос на државата во потрагата по можно решение за надминување на статус кво ситуацијата за почеток на преговорите со ЕУ. Според Тилев уставните измени се политичка волја, но претходно треба одново да се изанализираат и да се бара прецизно толкување на сите билатерални акти и документи кои ги потпишаа Македонија и Бугарија, како вториот протокол, а кои влегоа во заклучоците на ЕУ. Во тоа треба да се инсистира на поддршка од ЕУ и од клучните земји, пред се, Франција и Германија.

-Говорам во мое лично име, на пример, јавно признавање на македонскиот јазик како еден од официјалните јазици на ЕУ како дел од пристапните преговори. Ние не бараме нешто што не треба да се случи. Второ, обезбедување од страна на ЕУ на непречена работа на Комисијата за историски и образовни прашања. Дополнително, гаранции од ЕУ за воздржување од унилатерално толкување на спорните делови од билатералните договори. Бидејќи кога ЕУ разговара на тема билатерални односи меѓу две држави, дали меѓу Бугарија и Македонија или меѓу Бугарија и Грција секогаш тие седат на масата и го даваат своето толкување, ние не сме на масата и не можеме да го дадеме своето, смета Тилев.

Факт е дека од технички аспект никој не би можел да ни даде гаранции дека не би имало нови опструкции на нашиот европски пат, смета Тилев, бидејќи одлуките во ЕУ се носат консензуално, но она на што треба да се инсистира е да нема политички притисоци за билатерални прашања.

-Зборот гаранции многу луѓе различно го толкуваат. Некој ќе го гледа тоа од самиот технички процес на евроинтеграција, тоа е овој што г-ѓа Кос го говори дека никоја нема гаранции кога ќе ги почне преговори и кога ќе ги заврши и дека се ќе биде мазно и ние сите услови преавни и технички ќе ги исполниме, но кога говориме за таков тип на гаранции ние не говориме за отстапување од европското право или дерогации туку за отстранување на опасноста да се користат билатерални прашања којшто можат да се внесат преку преговарачката рамка во тој процес и да го блокираат, изјави Тилев.

Чекор напред според Тилев би било и утврдување на заеднички правила од страна на ЕУ за следење и елиминирање на говорот на омраза од двете страни и на сите нивоа од општеството и особено неселективно признавање на сите одлуки на Судот за човекови права на Советот на Европа, како и писмен договор за завршување на Коридорот 8 и од македонска и од бугарска страна со гаранции од ЕУ.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.